MAZMUR 122 - Susula Malalaok Hehelu Palak Ma Hehelu Beuk

Kokoa-kikiok ba'eneu Yerusalem

¹ Dauk nakamee dodonge-dadaman. Au amahoko-setelee, nai lelek hataholi-la lafa'da au lae, “Mai fo, ata teu leo Manetualain Uman-na teu!”

² Besak ia, ami losa nai kota Yerusalem-ma, lelesuinan-na so.

³ Yerusalem, kota fo nananafofo'ak da'di leo kota nananakatoto'dok no malole ma mana'ahiik.

⁴ Nai kota ia nde, nggileo-bobongik-kala mai, leoina fo, Manetualain heles, fo loke makasi neun nandaa no paletan-na.

⁵ Nai kota ia nde, mane-manek fo, Dauk tititi-nonosin-nala laketu-lala'di laun-nala.

⁶ Hule-haladoi leon, ba'eneu Yerusalem tetu-teman mae: “Ela leo bee-na, basa hataholi fo manasue-lai o-a, ala hapu tetu-temak.

⁷ Ela leo bee-na, hapu mole-dame nai o nusam dale, ma so'da-molek, nai o kota musum-mala dalek.”

⁸ Hu kande au tolanoo ka'a-fa'ding, ma au tia-laing-ngala, de au afa'da ae, “Ela leo bee-na, o so'da-molek!”

⁹ Hu kande, ita Aman Manetualain Uman-na, de au hule-haladoi, fo ela o ua-nalem malole.