MAZMUR 115 - Susula Malalaok Hehelu Palak Ma Hehelu Beuk

Kokoa-kikiok ba'eneu Manetualain Fo Manakoasa

¹ Ami ta, ou Manetualain, ami ta, tehu ka'da O nde, muse nanakoa-nanakiok, nana O lilineka, ma sue-lai mahele.

² Tao le'e de, leoina-la muse lafa'da lae, “Sila Manetualain-na, nai bee?”

³ Ita Manetualain-na, nai nusa so'dak-ka, Ana tao hata fo, nahiik-kana.

⁴ Sila sosongo-tatangon neme lilopilas ma lilofulak-ka mai, fo hataholi daebafak-ka lima tataan ndia.

⁵ Sila mabafak-kala, tehu ala ta hapu kokolak fa, mamatak-kala, tehu ala ta hapu lita fa.

⁶ Sila madi'idook-kala, tehu ala ta hapu lamanene fa, mapanak-kala, tehu ala ta hapu de'i fa.

⁷ Sila malimak-kala, tehu ala ta hapu lafangganggao fa, maeik-kala, tehu ala ta hapu la'ok fa, ma ta hapu halak kalua neme botolii koko'don-na mai fa.

⁸ Ela leo bee-na, hataholi manataok-kala, ua-nalen-nala leondiak ma basa hataholi fo, lamahele neun.

⁹ Hai Israel, mamahena neu Manetualain, nana, Ndia nde tulu-fali, ma nasulu-nahapa emi.

¹⁰ Hai basa imam-mala lemin, mamahena neu Manetualain, nana, Ndia nde tulu-fali ma nasulu-nahapa emi.

¹¹ Hai basa hataholi kamahehelek-kala lemin, mamahena neu Manetualain, nana, Ndia nde tulu-fali ma nasulu-nahapa emi.

¹² Manetualain nafandendelek ita, de neukose Ana fe ita baba'e-papalak, neukose Ana fe hataholi Israel-la, baba'e-papalak, ma basa imam fo, Harun tititi-nonosin-nala.

¹³ Neukose Ana fe hataholi kamahehelek-kala, baba'e-papalak, nau ana do matua boe.

¹⁴ Ela leo bee-na Manetualain ba'e-bati anak makadotok, fe emi ma emi tititi-nonosim.

¹⁵ Ela leo bee-na, Manetualain fo, manamakadada'dik lalai no daebafak-ka, Ana fe emi baba'e-papalak!

¹⁶ Manetualain nanuu ka'da lalai, tehu Ana fe daebafak-ka, leo hataholi daebafak-ka neu.

¹⁷ Hataholi manamatek-ka, ma hataholi manakona leo mamana nee-nee lino-linok-ka neu so, ana ta koa-kio Manetualain fa.

¹⁸ Tehu ita fo, bei maso'dak-kala, toke makasi neun, neme besak ia, losa dodoon-na. Koa-kio Manetualain leona!