MAZMUR 109 - Susula Malalaok Hehelu Palak Ma Hehelu Beuk

Huhule-haladoik nai susa dalek

¹ Soaneu mauli-malanga nakameek-ka. Dauk Kokoa-kikiok. Ou Manetualain, fo au koa-kion tataas esa, boso denge-denge.

² Nana, hataholi mangalauk-ka, ma manatipu-daik-ka, sapu-la au, ma ala tui, tutui pepekok la'eneu au.

³ Ala sapu-la au, nenik dede'ak fo, henuk no nakamumulu-nakamamaek, ma ala musu loo au, tehu ne'ek ta.

⁴ Ala lakasasa'ek dede'ak neu au, leomae au sue-lais, ma au hule-haladoi fes.

⁵ Ala balas au maloleng-nga, nenik mangalauk, ma au susue-lalaing, nenik nakamumulu-nakamamaek.

⁶ So'u-ma, hataholi mangalauk esa, fo naketu-nala'din, nemen-na fo, musu noon-na, kalaak-kana.

⁷ Nemen-na fo, nananaketu-nala'dik, fo nananafa'dak, ndia nasala, ma nemen-na fo, huhule-haladoin, nananafa'dak, sala-singok.

⁸ Nemen-na fo, so'dan-na nate'e lai-lai, ma hataholi fe'ek, ho'i-na kandela nangatutuu-na.

⁹ Nemen-na fo, anan-nala da'di, anamaak, ma saoinan-na, da'di inafalu.

¹⁰ Nemen-na fo anan-nala da'di hataholi nuu taa-hata tak, boema nanausi henik leme uma nakalulutuk ndia dalek.

¹¹ Nemen-na fo, manala'ok hutak-ka, beslaa-na, hata-heton lala'ena, ma hataholi loso-na, basa hata fo, ana hapun neme sosota-mamangun mai.

¹² Hataholi boso dale malole non, do sue-lai anan fo, ana la'oelak-kala.

¹³ Nemen-na fo, basa tititi-nonosin lala'ena, nanatao namopo-namatek, ma bobongi makabuik-kala, lafandele heni na'den-na.

¹⁴ Nemen-na fo Manetualain nafandendelek nahele, bei-ba'i kain-nala, tatao-nono'i mangalaun-nala ma ta koka heni, inan sala-singon fa.

¹⁵ Nemen-na fo, Manetualain nafandendelek tataas esa, neu sala-singon-nala, ma ta hapu hataholi nafandeles, nai daebafak-ka fa.

¹⁶ Nana, hataholi ndia, beita la'iesa fo, natu'du dale susue-lalaik boen. Ana fepa-li'u hataholi nuu ta-hata tak fo manadoi-dosok-ka, ma ana tonisa hataholi fo, manatulu-manafalin ta.

¹⁷ Ana nau ka'da supa-soo hataholi; nemen-na fo, supa-sook la'e seluk-kana! Ana ta hii fe hataholi baba'e-papalak fa, nemen-na fo, ana boso hapu baba'e-papalak.

¹⁸ Ba'eneu ndia soona, supa-sook ndia, tatao-nono'i biasa ndia, sama leo ana pake papake-ngganggaon. Nemen-na fo, supa-sook ndia, sama leo oe-a, fo ana susi leo aon dale neu, ma sama leo mina, fo ana faa leo dui-nala dalek neu.

¹⁹ Nemen-na fo, supa-sook ndia, nalu'e-nan sama leo papake-ngganggaok, ma fefeo-nan, sama leo kalikee-a.

²⁰ Manetualain, maketu hataholi manakalaak au-a, huhukun-na leona, ma hataholi manakokolak mangalauk la'eneu au-a.

²¹ Tehu, tulu-fali au, sama leo O hehelu-balataam, ou au Amang Manetualain, soi-tefa-mala au, hu kande O dale malolem-ma, ma O susue-lalaim.

²² Nana, au nuu ta-hata tak, ma manadoi-dosok, ma au daleng-nga, he'dis-sa nanseli.

²³ Isabain-na, mopo au, sama leo salaok-ka, nai fai le'donoson-na, ma au nananggafu henik, sama leo lamak-ka.

²⁴ Au lungulangang-nga dele, nanahu okaaok-ka, ma au aong-nga namanggo'a.

²⁵ Hataholi mananita au-a, nakamumulu-nakamamaek au, boema nakakale langa.

²⁶ Tulu-fali au, ou au Amang Manetualain, soi-tefa-mala au, nandaa no O susue-lalaim.

²⁷ Soona, au musung-nga, neukose bubuluk, nae O tatao-nono'im ndia, ma nae O, fo Manetualain nde manataok-ka.

²⁸ Leomae ala supa-soo au, tehu ela leo bee-na, O fe au baba'e-papalak. Leomae ala fo'a, tehu neukose, sila nananakamumulu-nakamamaek; tehu, ela leo bee-na, O fe O atam-ma, namahoko-seteleek.

²⁹ Nemen-na fo, hataholi manakalaak au-a, nakamumulu-nakamamaek-ka, poti-nalas, ma bibii-mamaek-ka nalu'e-nalas sama leo ba'du manalua.

³⁰ Au nau koa-kio apane'e Manetualain, koa-kion nai masene-do'ok dale.

³¹ Nana, nasala'e ma soi-tefa-nala hataholi nuu ta-hata tak-ka, neme hataholi fo, laketu huhuku mamates soaneun.