MAZMUR 108 - Susula Malalaok Hehelu Palak Ma Hehelu Beuk

Huhule-haladoik fo dokodoe tutulu-fafalik ba'eneu musu-a

¹ Nakameek. Dauk Kokoa-kikiok.

² Au amahele no matea-mahelek, ou Manetualain, au nau akamee, ma koa-kio O. Hai au samaneng-ngonei, fo'a leona!

³ Hai gambus ma kecapi, fo'a leona! Au nau afofo'a dulufula.

⁴ Manetualain, au nau oke makasi neu O, nai leoina-la tala'da. Au hii akamee kokoa-kikiok ba'eneu O, nai hataholi daebafak-ka tala'da.

⁵ Nana, O susue-lalaim matuaina, losa lalai ma O lilinekam, losa ko'as-sa.

⁶ Ou Manetualain, matu'du O matua-mademam nai lalai leona! Ma O mandela-masa'am, nai basa daebafak-ka lala'ena.

⁷ Soi-tefa-mala ami, nenik O koasam-ma, mataa ami huhule-haladoim, fo ela, hataholi fo, O sue-laik-kala, nanasoi-tefak.

⁸ Manetualain nafa'da neme, mamana leleo Mandela-malalao-malalafun-na mai nae, “Au nau eeki-latadale, ma baba'e dae Sikhem-ma, tehu Dokek Sukot-ta soona, neukose Au tu'u batu.

⁹ Gilead ma Manasye nde bee-na, Au nuung, Efraim nde bee-na, Au topi baing-nga, ma Yehuda nde bee-na, Au aitete'e manapaletang-nga.

¹⁰ Tehu Moab nde bee-na, Au mamana safe eing-nga; Au eki sesengik, neu Filistea, Au tapa Au tabueing-nga, neu Edom, fo da'di leo ta'du-tana, nae Au nuung ndia.”

¹¹ Neukose, see nde noo au leo Edom neu? See hela-nole au, leo kota fo, makota musuk ndia neu?

¹² Ou Manetualain, ade, O ta tunga moo au fa do? Ade, O ta tutulumatak moo ami solda'dum-mala fa do?

¹³ Tulu-fali ami, neme musu mamain-na, nana hataholi daebafak-ka, tutulu-fafalin, sosoa-ndandaan ta.

¹⁴ Sama-sama to Manetualain soona, neukose ita tapalani; nana, Ndia nde sengi ita musun-na.