MAZMUR 107 - Susula Malalaok Hehelu Palak Ma Hehelu Beuk

SUSULAK KA LIMA: MAZMUR 107–150 Kokoa-kikiok ba'eneu Manetualain dale malolen-na

¹ “Moke makasi neu Manetualain, nana Ndia malole, susue-lalain manaketu-basa tak, neme doon losa dodoon-na.”

² Mafa'da dede'ak ndia la'i ba'uk-ka, hai emi fo, nanasoi-tefa basak, neme susa dalek mai so.

³ Ana tao nakabubua basa emi, neme nusa dea-la mai so, neme dulu ma muli, kii ma kona mai.

⁴ Hapu nggelok laleu-lalaak lai moo maloa, de ala ta bubuluk enok fo, leo mamana leleok manai kota neu fa.

⁵ Ala lamala'a-lamandoe, ma maa ma'da, ma mopo basa namahehenak lala'ena so.

⁶ Nai sila susan-na dalek, ala laloo bou-bou neu Manetualain, de Ana soi-po'is, leme makase'ek-ka dalek mai.

⁷ Ana hela-noles, tunga eno mandoo-a, leo mamana leleok manai kota neu.

⁸ Nandaa, ala loke makasi neu Manetualain nanahu susue-lalain-na, nanahu tatao-nono'in fo, hataholi daebafak-ka dodoo doak-kana.

⁹ Nana, Ana fe hataholi manamaa ma'dak-ka, ninu losa nakabete, ma Ana fe hataholi kamala'ak-ka, nakabete nenik basa hata malole lala'ena.

¹⁰ Hapu nggelok langatuuk nai makahatuk dale, hataholi nanahukuk, fo ana doi-doso nai lange besi dalek,

¹¹ nana ala ta nau la'ban Manetualain paletan-na, ma ta taoafik neu Manetualain Fo Mademaina, paletan-na fa.

¹² Ana tao nakalulutuk hataholi sila dalen-na, nenik ue-le'dis mabelaina; ala tu'da, tehu ta hapu manatulu-fali fa.

¹³ Nai sila susan-na dalek, ala laloo bou-bou neu Manetualain, de Ana soi-po'is leme makase'ek-ka dalek mai.

¹⁴ Ana noos kalua leme makahatuk dale mai, ma Ana tao nala'di sila langen-nala.

¹⁵ Nandaa, ala loke makasi neu Manetualain nanahu susue-lalain, nanahu tatao-nono'in fo, hataholi daebafak-ka, dodoo doak-kana.

¹⁶ Nana, Ana tao natu'u lelesu liti-la, ma Ana tao nakalulutuk ai betu balak besi-la.

¹⁷ Hapu nggelok nggoak-panganaa, ma doi-doso, nanahu sala-singon-nala, boema, nanafepa-li'uk, nanahu sila salan-nala.

¹⁸ Ala malua basa nana'ak lala'ena, mamaten-nala deka so

¹⁹ Nai susa dalek, ala laloo bou-bou neu Manetualain de Ana soi-po'is, leme makase'ek-ka dalek mai.

²⁰ Ana tao nalea-nahais nenik paletan-na, ma Ana fes lala bolo mamates-sa deak.

²¹ Nandaa, ala loke makasi neu Manetualain, nanahu susue-lalain, nanahu tatao-nono'in fo, hataholi daebafak-ka, dodoo doak-kana.

²² Nemen-na fo, ala loke makasi nenik lini tunu-hotuk, ma ala tui-benga tatao-nono'in nenik nakamee namahoko-seteleek.

²³ Hapu nggelok seluk, ala sa'e ofak tunga tasi lai, fo ala sanga so'dan-nala nai tasi maloa dale.

²⁴ Ala lita Manetualain tatao-nono'in-nala, tatao-nono'in, fo dodoo doak-kana, nai tasi lai.

²⁵ No paletan-na, de ani-sangu mai, ma Ana fe lii-la lapoponu.

²⁶ Ofak-kala do'uk henis leo lalai leu, boema ana fepas leo tasi buin-na neu. Mopo hataholi-la palanin-nala, nai lelek, lasasalematak loo soe matuaina ndia.

²⁷ Langan-nala laleo, ma laleu-lilok, sama leo hataholi manamafuk-ka, ma mopo dudu'a-aafin-nala.

²⁸ Nai sila susan-na dalek, laloo bou-bou neu Manetualain, de Ana soi-po'is leme makase'ek-ka dalek mai.

²⁹ Nadenu ani-sangu, fo ana hahae, lii-la boeo, tenak henin.

³⁰ Boema, ala lamahoko, nanahu ani-sangu hahae so; noos leo ofa see-seek fo, ala sanga leu see lai ndia.

³¹ Nandaa, ala loke makasi neu Manetualain, nanahu susue-lalain, nanahu tatao-nono'in fo, hataholi daebafak-ka, dodoo doak-kana.

³² Ala koa-kio Manetualain matua-mademan, nai anan-nala tala'da ma ala koa-kion nai hataholi lasik-kala majelis-nala dalek.

³³ Ana tao nasafali lee-la, da'di moo solokaek, ma oemata-la, da'di dae tokotiik

³⁴ Ana tao dae maoe-maisik-ka, da'di mook fo, daen-na masik, nanahu hataholi manaleo nai dae ndia, tatao-nono'i mangalaun-nala

³⁵ Ana tao nasafali moo solokaek-ka, da'di lifuina, ma dae tuuk-ka, da'di oemata.

³⁶ Ana fe hataholi kamala'a-kamandoek-kala, ala leo lai naa; ala lapadedeik kota, fo da'di sila mamana leleon.

³⁷ Ala sele-nggali tin-la, ma ala sele ai angol, boema lakaduduluk-la, buna-boak makadotok nanseli.

³⁸ Manetualain ba'e-bati fes, anak makadotok, ma bana-manun-nala, boetai lamade'u.

³⁹ Tehu ala kala, de ela ka'da lumanak, nanahu doidosok-ka, ma tuni-ndenik mabelaina.

⁴⁰ Manetualain nakadadaek, basa sila manakoasan-nala, ma nadenus, fo leu laleu-lalaak lai mook maloaina, fo ta hapu enon-na fa.

⁴¹ Tehu, Ana soi-po'i hataholi nuu ta-hata tak-ka, neme susan-nala dalek mai, teidalen-nala, boetai lamaba'u, sama leo bi'ilopo bubuak-ka.

⁴² Hataholi manatao tunga ndoo-na, nita boema, namahoko-setelee, tehu, hataholi manatao tatao-nono'i mangalauk-ka, ko'o bafan-na.

⁴³ Ela leo bee-na, hataholi manatee tenok-ka, dudu'a-dodoo basa dede'ak sila-la, ma ana manaku, nae Manetualain sue-lai nahele.