MAZMUR 106 - Susula Malalaok Hehelu Palak Ma Hehelu Beuk

Manetualain dale malolen-na, neu anan-nala

¹ Moke makasi neu Manetualain, nana Manetualain malole; susue-lalain manaketu-basa tak, losa dodoon-na.

² See hapu tui-benga, Manetualain palanin-na, ma ana fe kokoa-kikiok ba'eneun?

³ Maua-manalek ba'eneu hataholi fo, ana tunga paletan-nala, ma hapu ndoos tataas esa nai tatao-nono'in-na dalek.

⁴ Mafandele au leona, ou Manetualain, no O dale malolem-ma, ba'eneu O anam-mala, Metema O soi-tefa-mala soona, mafandele au boe.

⁵ Ela leo bee-na, au ita O hataholi hehelem-mala tetu-teman, ma amahoko sama-sama o, O anam-mala. Ela leo bee-na, au daleng-nga namatua, ma amahoko-setelee, sama-sama o, hataholi fo ala da'di O nuum so.

⁶ Ami masala-masingo basa, sama leo ami bei-ba'i kaim-mala so; ami tao basa tatao-nono'i mangalauk, ma malelesi so.

⁷ Lelek ami bei-ba'i kaim-mala leme Masir-ra, ala ta lalelak fa; ala ta lalelak O tatao-nono'i matuainam-ma, sosoa-ndandaan fa. Ala lafandele heni, O susue-lalaim fo, manasasi kao-kaok-ka, ma ala la'ban Manetualain Fo Mademaina paletan-na, nai deka no Tasi Gelagah.

⁸ Tehu Manetualain soi-tefa-nalas, hu kande na'den-na, fo ela napalanin-na, da'di nananitak.

⁹ No paletan-na, de Tasi Gelagah ma'dan, de Ana noo anan-nala tunga tasi dale, sama leo, ala la'ok nai moo solokaek-ka.

¹⁰ No enok ndia, Ana soi-tefa-nalas, leme musu nook-ka liman mai ma Ana soi-po'is, leme musu koasan-na mai.

¹¹ Tehu oe tao-na, sila musu noon-na bolo; de tae la hataholi esa boen.

¹² Boema anan-nala, lamahele hehelu-balataan; de lakamee koa-kio ba'eneun.

¹³ Tehu no lai-laik, ala lafandele heni Manetualain tatao-nono'in, de ala tao no, ta loke nanoli-nafa'dan fa.

¹⁴ Nasan-nala dudungu-papaus, leme moo solokaek-ka, de ala so'ba Manetualain.

¹⁵ Ala loke beek soona, Ana fe, tehu he'di-laus-sa, sapu-nalas boe.

¹⁶ Nai moo solokaek ndia nde, lape'da dalek neu Musa. Ma Harun, fo Manetualain atan malalao-malafun-nala.

¹⁷ Boema, daebafak-ka natangga, de ana ko'do-na Datan, ma nakadofu ketu Abiram no uma isin-nala.

¹⁸ Ha'i kona mai, de ana sapu-na sila nakabubuan-na, ma na'a naputu basa manamalelesi basak-kala.

¹⁹ Ala tao sapiana lilopilas-sa neme Lete Sinai-a, de ala sene-do'ok neu, dodoki-dudula nanapolik ndia.

²⁰ Ala tuka Manetualain fo, matua-madema nenik sapi mana'a na'u-a, dodoki-dudulan.

²¹ Ala lafandele heni Manetualain fo, sila manasoi-manatefan-na, fo manatao basa dede'a matuaina-la leme Masir.

²² Tete'ek-ka, tatao-nono'in nai nusak ndia, anseli nanseli, Ana tao manada'di beuk neme Tasi Gelagah.

²³ Boema, Manetualain tutu'u, sanga tao namopo-namate anan-nala, tehu Musa fo, hataholi hehelen-na, ana ka'in. Musa da'di hataholi tala'dak soaneu sila, de nalosa Manetualain nasan-na tenak.

²⁴ Basa boema, ala ta nau sipok nusak mana'ahiik ndia fa, Nanahu, ta lamahele neu Manetualain hehelu-balataan fa.

²⁵ Ala lakamuu-muu nai sila lalaa teman dale, ma ala ta nau lamanene Manetualain halan-na fa.

²⁶ Boema Ana soo, ma Ana helu nae, neukose Ana taonisas nai moo solokaek-ka.

²⁷ Neukose, Ana tu'u-tapa heni, sila tititi-nonosin leo leoina-la tala'da neu ma Ana tao tapasasalas, lai nusa dea-la.

²⁸ Basa boema, ala sene-do'ok neu Baal neme Peor, ma la'a nana'ak fo, nanatunu-hotuk soaneu lamatua daebafak-kala.

²⁹ Tatao-nono'ik ndia, tao nafo'a Manetualain nasan-na, nalosa he'di-laus sapu-nalas.

³⁰ Tehu Pinehas fo'a napadeik, de ana huku hataholi masalak-ka, boema, he'di-laus ndia hahae.

³¹ Ana namahele, tatao-nono'ik ndia da'di leo tatao-nono'i malole ba'eneun, de nafandendelek nahelen losa dodoon-na.

³² Ala tao-la, Manetualain namanasa neme oedolu manai Meriba-la, ma ala tao susa Musa, nenik sila tatao-nono'in.

³³ Ala tao-la dalen-na ta tesa-tama fa, nalosa ana kokolak, ta pake dudu'a-dodook fa.

³⁴ Ala ta tao lamopo-lamate leoina fe'ek-kala fa, sama leo Manetualain paletan-na.

³⁵ Nakalenak, ala leo-lapalasa loo leoina sila-la ma ala na'da hataholi fo, ta lalelak Manetualain ndia, so'dan-nala eno-dalan.

³⁶ Boema, ala sene-do'ok neu sosongo-tatanok-kala, de dede'ak ndia nde da'di hihi'ik ba'eneus.

³⁷ Ala tunu-hotu anan-nala, fe sosongo-tatangok Kanaan-nala.

³⁸ Ala do'do heni, hataholi sala tak-ka daan-na, fo sila anan-nala daan-na, soaneu ala tunu-hotu fen neu sosongo-tatangok-kala; nalosa ala tao langgenggeo nusak ndia.

³⁹ Hu kande tatao-nono'ik ndia, de ala da'di langgenggeo, ma ala ta lilineka neu Manetualain fa.

⁴⁰ Boema Manetualain nasan-na lua ponu-ponu soaneus, Ana malua seluk, Ndia nuu mesan-na.

⁴¹ Boema, Ana fe henis leo leoina fe'ek-kala neu, Ana po'ilotak musu koasas.

⁴² Boema, musun-nala tuni-ndenis, de musun-nala fes lakatele nai sila koasan dae.

⁴³ Manetualain soi-po'is la'i ba'uk-ka, tehu ala nau ka'da la'ban Manetualain paletan-na, nalosa mopo-mates lai sala-singon-nala dalek.

⁴⁴ Tehu Manetualain namanene hoo-nggu'un-nala, boema, Ana taoafik neu susan-nala.

⁴⁵ Hu kande sila de, Manetualain nafandele-na hehelu-balataan, de Ana sue-lais, nanahu susue-lalai matuainan-na.

⁴⁶ Ana fe basa hataholi fo, manafoo nenis-sala, sue-lais.

⁴⁷ Soi-tefa-mala ami, ou ami Amam Manetualain, Tao makabubua ami nai leoina-la tala'da, fo ela ami hapu moke makasi, ma koa-kio O na'dem fo, malalao-malalafuk-ka.

⁴⁸ Koa-kio Amak, fo Israel Manetualain-na, besak ia, losa dodoon-na. Nemen-na fo, hataholi-la lafa'da lae, “Amin!” (Tete'ek-ka!) Koa-kio Manetualain leona!