MAZMUR 104 - Susula Malalaok Hehelu Palak Ma Hehelu Beuk

Kokoa-kikiok ba'eneu manamakadada'dik-ka

¹ Koa-kio Manetualain, hai au samaneng-nga! O matua-madema manseli, ou Amang Manetualaing! O pake papake-ngganggao nanakoa-nanakiok, ma mandela-masa'ak,

² ma O malu'e mangale'dok-ka. O bela lalai-a, sama leo lalaa temak-ka,

³ ma O mafofo'a O Umam-ma, nai oe manai lalai-a lain. O tao ko'as-sa da'di O kaletam, O sa'e anin-na li'dan-na.

⁴ O tao anin-na da'di O hataholi nadedenum, ma ndelas-sa da'di O malalau-maoonom.

⁵ O pasak daebafak-ka no matea-mahelek neu buin lain, nalosa, neukose ta nanggengo losa dodoon-na

⁶ O poti ketun nenik tasi maloaina, de oen-na lifu-na, letelepak-kala poin-na.

⁷ Lelek O masapala boema, oe ndia ana faa, ana faa de naneni, nanahu O halam-ma ngguun-na.

⁸ Oe faa tunga letek-kala leo dokek-kala dalek neu, leo mamanak fo, O sadia basan ba'eneun.

⁹ O maketu too-lane, fo ana ta bole tunga ndia fa, fo ela ana boso fali ma'in, fo lifu-na daebafak-ka.

¹⁰ O fe oemata-la lasapupulak nai dokek-kala, leeanak-kala faa, lai pupukuk-kala tala'da,

¹¹ fo basa bana-manu manai tina-la linu, ma keledei fuik-kala mopo maa ma'dan-nala.

¹² Manupui-la tao ndunuk deka lon; ala nggasi lai akidook-kala tala'da.

¹³ O fe u'dan-na neme lalai mai, nai letelepak-kala, daebafak-ka henuk no O ue-le'dim buna-boan.

¹⁴ O makamomolik na'u, soaneu bana-manu, ma basa bubu'u-palusa mata-matak-kala soaneu hataholi daebafak-ka, boema ana hapu foi-fala,

¹⁵ de nabuna-naboa oe angol mala'dahiik-ka, Boeo mina setun, fo tao-na mata-panan napena, ma nana'ak fo, neni fen be'i-balakaik.

¹⁶ Manetualain ain-nala hapu u'dan makadotok ana sele matan ai kaiou Libanon-nala.

¹⁷ Manupui-la landunu lai ndia, manupui ranggung-ngala landunu lai poin-na.

¹⁸ Lete mademaina-la, da'di bi'ihii fuik-kala mamanan; nusa-la, ke'ke lai batu piak-kala.

¹⁹ O tao bulak-ka da'di manamafa'da li'u do jam, le'do-a bubuluk fai tetenan-na.

²⁰ Metema, O fe makahatuk-ka mai soona, faik-ka da'di le'odaek, fo basa bana fuik-kala kalua.

²¹ Singa molisoluk-kala, langao sanga nana'ak, loke nana'ak fo, Manetualain sadiak-ka.

²² Metema le'do tii soona, lakadedeak, fo lakandondoo lai mamana nafunin-nala.

²³ Boema, hataholi daebafak-ka kalua, fo ana ho'u ue-le'din, fo naue-nale'di nakandoo, losa le'donoso.

²⁴ O ue-le'dim makadotok nanseli, Manetualain, O makadada'dik basa-basan nenik manatee-tenok; daebafak-ka henuk no basa hata, fo O makadada'dik-kana.

²⁵ Mitak tasi fo maloaina lenga-lenga, no basa mahahaek ana matua ta leke-nala fas.

²⁶ Ofak-kala la'ok lai ndia, ma Lewiatan-na, buta tasi fo, O makadada'dik-kana, lakaminak lai ndia.

²⁷ Sila basa-basas lamahena O, fo ala hapu nana'ak nandaa no fain-na.

²⁸ O fe, de sila lakaduduluk-kana, O sadian, de sila la'a losa lakabete.

²⁹ Metema O lepos masadea soona, ala bii; metema O ho'i falik ani hahaen-na soona, ala mopo-mate fo ala da'di falik dae, sama leo makasososan-na.

³⁰ Tehu metema, O fes ani hahaek soona, sila nananakadada'dik; O fe so'da beuk neu daebafak-ka.

³¹ Ela leo bee-na, Manetualain matua-mademan nahele losa dodoon-na! Ela leo bee-na, Ana namahoko-setelee nenik basa hata lala'en fo, nakadada'dik-kana!

³² Ana mete daebafak-ka, de Ana tao-nan dele, ana koila'e letek-kala, nalosa masun-nala kalua.

³³ Au nau akamee ba'eneu Manetualain, nai au fai maso'dang-nga dalek, akamee koa-kio ba'eneu au Manetualaing-nga, beidai, au beita mate fa.

³⁴ Ela leo bee-na, au nakameeng-nga, nandaa no dalen-na, nana Ndia nde tao nanahoko au daleng-nga.

³⁵ Nemen-na fo, hataholi masala-masingok-ka, mopok-kana neme daebafak-ka poin-na mai, nemen-na fo, hataholi mangalauk-ka, mopo-mate la'iesak-kasa. Koa-kio Manetualain leona, hai au samaneng-nga! Koa-kio Manetualain leona!