MAZMUR 103 - Susula Malalaok Hehelu Palak Ma Hehelu Beuk

Manetualain susue-lalain

¹ Neme Dauk mai. Koa-kio Manetualain, hai au samaneng-nga, koa-kio na'den fo, malalao-malafuk-ka, hai au dale katematuang-nga.

² Koa-kio Manetualain, hai au samaneng-nga, boso mafandele heni dale malolen lala'ena!

³ Ndia nde, fe do'o do ampon neu basa o sala-singom lala'ena, ma Ndia nde tao nalea-hai basa o he'di-laum lala'ena,

⁴ Ndia nde, soi-nala o so'dam-ma, neme lates dale mai, de Ana fe o pake ti'ilanga manek-ka, nenik susue-lalaik ma dale kasian.

⁵ Ndia nde, tao natetu o so'dam-ma, nenik hata fo malole nalosa o fai muli-solum-ma, da'di beuk sama leo manupui kaka'ka.

⁶ Manetualain nakalala'ok hoholo-lalanek ma ndoos ma matetuk-ka, ba'eneu hataholi nanatuni-ndenik-ka.

⁷ Ana nafa'da dale tutu'un-na neu Musa, ma tatao-nono'in, neu leoina Israel-la.

⁸ Nana Manetualain manasue-laik, Ana ta haelai namanasa, ma susue-lalain sasi kao-kao.

⁹ Ana ta nasapala nakandondoo henin fa, ma ta namanasa losa dodoon-na fa.

¹⁰ Ana ta huku ita, nandaa no ita sala-singon fa, do Ana balas ita, nandaa no ita salan-na fa.

¹¹ Tehu, sama leo lalai-a dedeman-na nai daebafak-ka lain, susue-lalain dema-ba'u ndia, ba'eneu hataholi kamahehelek-ka.

¹² Sama leo dulu dodoon-na neme muli mai, Ana tu'u-tapa heni ita sala-singon-nala, dodoon-na leondiak.

¹³ Manetualain sue-lai hataholi kamahehelek-ka, sama leo amak esa, ana sue-lai anan-nala.

¹⁴ Nana, Manetualain bubuluk, ita da'di teme beek-ka mai, Ana nafandele, ita ia, ka'da dae sopuk mesan.

¹⁵ Hataholi daebafak-ka, so'dan-na keke'uanak sama leo na'u-a; ana nakapela sama leo bunga nai tina;

¹⁶ metema, anin-na fuun soona, ana sapu-lalo, nakalenak, mamanan-na, ta bubuluk-kana nai bee so'on.

¹⁷ Tehu Manetualain sue-lai nahele hataholi kamahehelek-ka, ma dale malolen-na nakandoo, neme bobongik leo bobongik neu

¹⁸ ba'eneu hataholi fo, ana ho'u nahele hehelu-balataan, ma nakalala'ok paletan-na no lilinekak.

¹⁹ Manetualain paleta nai nusa so'dak-ka, Ndia manek fo manakoasa neu basa hata lala'ena.

²⁰ Koa-kio Manetualain, hai ata nusa so'dan fo, makadelek-kala, fo lamanene ma lakalala'ok paletan-na.

²¹ Koa-kio Manetualain, hai basa mahahaek manai nusa so'dak-ka, basa atan fo lakalala'ok hihii-nanaun-na.

²² Koa-kio Manetualain, hai basa lima tataan lala'en, fo manai Ana koasa nusak-kala lala'ena. Koa-kio Manetualain, hai au samaneng-nga!