MAZMUR 102 - Susula Malalaok Hehelu Palak Ma Hehelu Beuk

Huhule-haladoik nai susa dalek

¹ Hataholi manadoi-dosok-ka, huhule-haladoin nai sosota-mamanguk-ka dalek, ana dokodoe neu Manetualain.

² Ou Manetualain, mamanene au huhule-haladoing, nemen-na fo, au dokodoeng-nga losa O matam.

³ Boso lepos masadea au, metema au nai susa dalek. Mamanene leon, metema au aloo bou-bou, fo mataa au no lai-laik.

⁴ Au so'dang-nga mopon, sama leo ha'imasuk-ka; au duing-ngala lamahana beloo, sama leo ha'i pilak-ka,

⁵ Au sota-mangu, sama leo na'u tuuk-ka, ma au ta hii u'a-inu fa.

⁶ Au ahoo apane'e; au aong-nga, ela ka'da louk palu duik.

⁷ Au sama leo manupui undan-na, nai moo solokaek-ka, sama leo ko'donaok-ka nai felak manandefak fo, nee-nee lino-linok.

⁸ Au ta bisa sungu fa, sama leo manupui-a, mesa-mesak-kana nai uma punin-na.

⁹ Fai katemak esa dalen-na, musu-a nakamumulu-nakamamaek au; hataholi fo lamanasa au-a ala tao au na'deng-nga, da'di na'dek nanasupa-sook.

¹⁰ Au u'a afu, da'di leo loti, au nininung-nga, nanasese'dok no luuoe,

¹¹ nana O so'u-ma au, de O tapaheni au nai O nasa-melum, manapila lo'a-lo'am-ma dalek.

¹² Au so'dang-nga sapu-lalo, sama leo salaok-ka, nai fai le'onoson-na; au male sama leo na'u-a.

¹³ Tehu O, ou Manetualain, Manek losa dodoon-na, nananafandendele nahelek, neme bobongik leo bobongik neu.

¹⁴ Neukose O fo'a, fo O sue-lai Sion, fain-na losa so, soaneu tao dale susue-lalaik neun.

¹⁵ Nana O atam-mala sue-lain, leomae ana da'di ai batu manandefak so. Dalen-nala, tu'da kasian neun, leomae ana da'di daesopuk so.

¹⁶ Neukose leoina-la bii-lamata'u neu Manetualain koasan-na; ma basa mane-manek-kala, hia matua-mademan,

¹⁷ metema Manetualain nafofo'a falik Sion, fo ana to'da mai, nai matua-mademan-na dalek.

¹⁸ Neukose namanene anan manaleu-laan-nala huhule-haladoin, ma Ana ta tipa dokodoen-nala fa.

¹⁹ Sulak-ma, basa Manetualain tatao-nono'in, soaneu bobongik manamaik-kala, fo ela ngileo-bobongik manamaik-kala, hapu koa-kion.

²⁰ Manetualain mete neme mamana mademan-na mai, Ana dongek leo daebafak-ka, neme nusa so'dak-ka mai,

²¹ soaneu namanene hataholi nanahukuk-kala hoo-nggu'un, ma Ana soi-po'i hataholi nanahuku nisak-kala.

²² Soona na'den-na, neukose nanatui-bengak nai Sion, ma neukose nanakoa-kiok nai Yerusalem,

²³ lelek leoina-la, ma nusa-nusak-kala lakabubua soaneu fe ha'da-holomata neu Manetualain.

²⁴ Manetualain helu la'di au bei-balakaing, nai lelek au bei muli-solung-nga, ma Ana tao keke'u au teu-faing.

²⁵ Boema au afa'da ae, “Ou Manetualain, boso ho'i-ma au so'dang-nga, nai lelek au so'dang-nga ba'e duak.” Manetualain, O maso'da losa dodoon-na,

²⁶ makahulun-na, O makadada'dik daebafak-ka; O lima tataam, lalai boe.

²⁷ Basa sila-la, neukose ala sapu-lalo, tehu O mahele; basa sila-la, neukose po'os sama leo bua papakek-ka. Fo O tapa henis, sama leo ba'du palaak-ka, boema basa sila-la, neukose mopo-mate.

²⁸ Tehu O matak esa mahele, O so'dam-ma, mate'en ta.

²⁹ Ami upu-anam, neukose laso'da no mole-dame, ma nee-nee lino-linok tataas esa nai O nasulu-nahapam-ma dalek.