KIDUNG AGUNG 8 - Susula Malalaok Hehelu Palak Ma Hehelu Beuk

¹ Ah, sa'di leo been-na, au tolanoo bonging o, fo o su'u mita au inang su'un-na so, metema au atongo o o nai enok soona, tao leo bee-o, au de'i o, neukose ta hapu hataholi nakadadaek au fa.

² Neukose au o o leo au inang uman neu, fo ela o manoli au. Neukose au fe o minu angol kaboomenik, ma dalima boak-ka oen-na.

³ O lima kiim-ma tia-to'ba au, o lima konam-ma holu au.

⁴ Maheluk leon, hai anafe'oana Yerusalem-mala lemi, mae emi ta mapanggengge susue tou-ta'ek-ka fa losa name'da namahokok.

Nakamee ka 6 Inak-kala

⁵ See manamaik neme moo solokaek-ka mai ndia, nasalai dean-na neu inaana susuen-na? Au fafae afo'a o nai ai apel-la huun-na, nai mamanak fo o nananailuk ma nanabongik.

Inaanak-ka

⁶ Tao au da'di o inaana susuem, boso holu esa boen, te holu ka'da au mesang-nga; nanahu susue tou-ta'ek ndia balakain-na ba'u mamates-sa, ma dale hihii sao-anan-na, sama leo mamates-sa. Pilan-na sama leo ha'i pilan-na fo ana pila lo'a-lo'a.

⁷ Faa oek-ka ta bisa tao nakamate susue tou-ta'ek-ka fa ma faa ta bisa ba'u neni fan. Metema hataholi esa fe basa hata-heton lala'en-na fo ana asa susue tou-ta'ek soona, tao leo bee-o ana hapu ka'da nakadadaek.

Tolanoo touk tolanoo inak

⁸ Ami fa'di inanam esa, su'un-na bei anak-ka. Ami muse taon tao leo beek metema hataholi mai a'du-natanen?

⁹ Leounik-ka, ndia papala nanadamak esa soona, neukose ami mapadedeik uma puni madema lilofulak-ka nai lain. Leounik-ka ndia lelesuina esa soona, neukose ami betubalan nenik ai kaiou.

Inaanak-ka

¹⁰ Au ia papala nanadamak esa, ma au su'ung-nga uma puni mademan-na. Au touana susueng-nga bubuluk nae au o ndia soona, au aua-anale.

Touanak-ka

¹¹ Salomo nanuu osi angol nai Baal-Hamon; Ala fe osi ndia neu manamanea-la. Esan-na bae doi fulak lifun esa, soaneu bae osi ndia buna boan,

¹² ma ana hapu 200 soaneu ndia sosota-mamangun. Nemen-na, fo doik ndia soaneu o Salomo, ma soaneu basa manamanea o osim-ma. Tehu au osi angol la, au nuun mesang ndia nai au matang-nga.

¹³ Hai osi isin-nala lemin, o tia-laim-mala hii lamanene o halam-ma; fe au amanene o halam ndia!

Inaanak-ka

¹⁴ Au touana susueng-ngonei, mai leon, sama leo nusa susula mukuk-ka, sama leo nusa ana nai letelepak Beter-ra.