KIDUNG AGUNG 7 - Susula Malalaok Hehelu Palak Ma Hehelu Beuk

Tou ana ka

¹ O anafe'oanak maneni-mafa'dak, o eim-ma tete'ek ka mana'ahiik no ta'bueis ndia. O puu manafe'dum-ma, sama leo lilo-henu, fo tuka lilo-henu esa lima leen ndia.

² O use-ma sama leo nggalaa bobongok fo beita kulang nita angol nanasese'dok fa. O teim-ma nono'kabai gandum madodouk-ka, Laisona se'ba okofeo-lan.

³ O su'um-ma, sama leo nusa ana 2, nusa susula muku takalapak.

⁴ O botoliim-ma, sama leo uma puni madema nga'di noli. O matam-ma, sama leo lifu manai Hesybon-nala, deka no Batrabim lelesuinan-na. O panam-ma, sama leo uma puni madema manai letek Libanon-na, fo nasale leo kota Damsyik-ka neu.

⁵ O langam-ma, sama leo pupukuk Karmel-la; O langa doom fo mananala'ek-ka, sama no bunga malolongek fo bunan-na pilabalanggeok, makeek nanseli sama leo manek esa.

⁶ Tete'ek-ka, o manahiik manseli fo nanasuek nai nananamahokok-kala tala'da.

⁷ O aom-ma mana'ahiik leo ai korma, fo boa ngginggitan-na, nde o su'um-ma.

⁸ Au ahiik kae leo ai korma ndia lain u, fo au hapu boan-nala. Sa'di leo been-na, o su'um-ma, sama leo ai angol-la boa ngginggitan-na, o hahaem-ma, nabomeni leo boa apel-la,

⁹ o bafam-ma makeek leo oe angol-la. nemen-na fo angol ndia oen-na faa leo au touana susueng-nga neu no ta ketu basa fan; ma nafofo'a susue tou-ta'ek, nakalenak soaneu hataholi bei manasunguk-kala.

Inaanak-ka

¹⁰ Au touana susueng-nga nuun au, de nahiik au.

¹¹ Mai fo ata teu leo mook-ka teu, au touana susueng-ngo, ma teu sungu nai tina nai bunga pacar-ra tala'da.

¹² Mai fo fafaianak soona, ata teu leo osi teu, fo ata mete, ade ai angol-la napako so do beik, ma bunan-na nakapela so do beik; ade, ai dalima nabuna so do beik. Nai naa, neukose au fe o, au susue tou-ta'eng-nga.

¹³ Ai luluu-a naboomeni hapu ai boa mala'da hiik, deka nai ita lelesun-na, hapu nanaseu palaak ma nanaseu beuk; Au pe'das ba'eneu o, au touana susueng-ngo.