KIDUNG AGUNG 5 - Susula Malalaok Hehelu Palak Ma Hehelu Beuk

Touanak-ka

¹ Au u leo au osing dale u, fa'ding-ngo, au saoinang-ngo, au hehele akabubua au ai daa tuung-ngala, ma au bumbung-ngala; au u'a au fani popolang-nga, ma au inu au fanioeng-nga, au inu kapoe, ma au angol-la. Mi'a-minu leon, tia-laing-ngala lemin, Minu losa mafuk hu kande susue tou-ta'ek.

Inak-kala Nakamee ka 4 Inaanak-ka

² Au sungu, tehu au daleng-nga kame'dak. Mamanene te, au touana susueng-nga dedelu lelesu-a. Soi lelesu fa'ding-ngo, au inaana susueng-nga, au manupui kaluang-nga, au susueng-nga; Au langa doong-nga nakadoe dinis le'odaek-ka.

Touanak-ka Inaanak-ka

³ Au o'du heni au ba'dung-nga so; ade, neukose au bei pake seluk-kana do ta? Au safe basa au eing-nga so, ade, neukose au bei tao anggenggeo seluk-kana do ta?

⁴ Au teneng-nga hako nanahu au touana susueng-nga ho'u lelesu nggoen-na.

⁵ Boema au fo'a leona fo au sanga soi fe au touana susueng-nga lelesu-a. Laluteik-ka ti'ti neme au limang-nga, ma au lima ku'ung-ngala mai, de nakadoe lelesu nggoen-na.

⁶ Au soi fe au touana susueng-nga lelesu-a, tehu ana lepos de ana la'o so. Au ahiik anseli no halan-na; au sangan, tehu manada'di tak. Au aloo na'den-na, tehu ta nataa fa.

⁷ Basa manamanea kota, latongo loo au; ala fepa au de au akahina, ala ho'i-la au lalaa langang-nga no nakasetik.

⁸ Hai anafe'oanak Yerusalem-mala lemin, maheluk leona, metema emi matongo moo au touana susueng-nga soona, mafa'dan mae au amahe'di susue tou-ta'ek.

Inak-kala

⁹ Ade o touana susuem-ma lena heni touana susuek fe'ek-kala, hai anafe'oana mana'ahiik-kanei? Ade, o touana susuem-ma lena heni touana susuek fe'ek kala, nalosa o madenu ami maheluk?

Inaanak-ka

¹⁰ O touana susuem-ma makadelek ma mana'ahiik, nai hataholi lifun sanahulu dalek, ndia nai uluk.

¹¹ Langan-na, sama leo lilopilas-sa, lilopila isik, langadoon-na leo lii-a ma nggeok, nggeok leo manupui kaa.

¹² Matan-na, sama leo manupui kalua nai oemata, manupui kalua nadiu kapoe de nangatuuk nai lifu su'un-na.

¹³ Nasebu'un-na, sama leo osi bumbu kaboomenik, difadoon-na nde been-na, bunga tale manati'ti lalutei isik.

¹⁴ Liman-na mana'ahiik, ana pake ndeli lilopilas no poemata aon-na sama leo ngga'di noli nanadulak batu nilam.

¹⁵ Ein-na, sama leo batu marmar fulak-ka diin-nala, nakadiditak-kana nenik lilopilas isik. Heo-haan lolen-na sama no letek manai Libanon-nala, ma nanahelek sama leo ai aras.

¹⁶ Hala-kokolan makeek nanseli aoinan-na lala'en-na nadoe dale, au touana susueng, ma au tia-laing-nga leondiak, hai anafe'oana Yerusalem-mala lemin!