KIDUNG AGUNG 1 - Susula Malalaok Hehelu Palak Ma Hehelu Beuk

¹ Kidung Agung fo Salomo taok-ka.

Nakamee makasososak-ka Inaanak-ka

² De'i au leona, menik o difadoom-ma o susuem-ma la'da-na lena heni angol-la!

³ O maboomeni manseli, o na'dem-ma sama leo mina kaboomenik fo po'a henin; hu ndia de anafe'oanak-kala hii o!

⁴ Ata la'o lai-lai, ou au maneng-ngonei, moo au leo o kamam dale neu. Hu ka nde o de ami basa-basam-mala mamahoko, ma koa-kio o susue tou-ta'em lena heni angol-la; hu ndia de anafe'oanak-kala susue tou-ta'en soaneu o!

⁵ Leomae au nggeok, tehu au mata makeek, hai anafe'oana Yerusalem-mala lemin; nggeok sama leo Kedar lalaa teman-nala, tehu mana'ahiik sama leo tema lelesu manai Salomo uma manen-na!

⁶ Boso taoafik neu au lou nggeong-nga, nana au ahoi le'do mahaak. Au ka'ang-ngala lamanasa au, de ladenu au aue-ale'di nai osi angol dale; de au ta hapu loak painote au aoinang-nga fa.

⁷ Mafa'da leon, hai au susueng-ngo nei, o foo bi'ilopo-la nai bee, nai fai le'donoson-na, o fes hahae nai bee? Masa bole, neukose au sama leo maleu-malaak nai o nonoom-mala bi'ilopon-nala tala'da?

Touanak-ka

⁸ Masa bole o ta bubuluk mamanan-na fa hai anafe'oanak manai inak-kala tala'da? Tunga ka'da bi'ilopo bubuak-kala ei mamanan-nala, ma foo o bi'ihiim-mala nai deka noo manafoo-la ofun-na.

⁹ Au susueng-ngo nei, o nono'kabai ndala ina fo ana hela mane Masir-ra kaletan-na.

¹⁰ O nasebu'um-ma mana'ahiik nai lilo-henu tala'da, o botoliim-ma mana'ahiik no henu poemata.

¹¹ Ami tao fe o lilo-henu lilopilas, nenik lilofulak de'elutu.

Inaanak-ka

¹² Au maneng-nga bei nai pepe'un lain, au mina narwastung-nga naboomeni.

¹³ Au taouana susueng-nga sama leo laluteik-ka boomenin-na, nai lelek nangape'uk nai au fanang lain.

¹⁴ Au taouana susueng-nga nono'kabai bunga pacar bubuak esa nai En-Gedi osi angon-nala.

Touanak-ka

¹⁵ O mana'ahiik manseli, ou au mata makeeng-ngonei, te'e-te'e o mata makeek! O matam-ma sama leo manupui kalua.

Inaanak-ka

¹⁶ O manahiik ma malelak susueng-ngo, te'e-te'e o manahiik ma malelak! Ita mamana susungun-na nai na'u momo'dok lain.

¹⁷ Ai Aras-sa da'di ita uman-na diin-na, ma ai kaiou-a, da'di uma hunun-na