KELUARAN 6 - Susula Malalaok Hehelu Palak Ma Hehelu Beuk

Manetualain naloo Musa

¹ Manetualain kokolak no Musa nae, “Au nde Manetualain.

² Au atu'du Au aoinang-nga neu Abraham, Isak ma Yakob da'di leo Manetualain Fo Manakoasa, tehu Au ta fes lalelak Au nenik na'dek ‘Manetualain fa’.

³ Au boeo tao hehelu-balataak os boe. Au helu ae neukose Au fes nusa Kanaan-na, nusak fo makahulun-na, ala leo da'di leo hataholi manamai.

⁴ Au amanene basa hataholi Israel-la hoo-ngu'un, fo leoina Masir-ra taos da'di ata, boema Au afandele neu Au hehelu-balataang ndia.

⁵ Da'di, po'a-benga neu leoina Israel-la, mae Au afa'das ae, Au nde Manetualain; neukose Au soi-po'i emi neme leoina Masir-ra tuni-ndenin mai. Neukose Au atu'du Au koasa matuainang-nga, soaneu soi-tefa emi, ma Au aketu huhuku-dodoki mabelaina neu leoina Masir-ra.

⁶ Neukose Au tao emi da'di Au anang, ma Au da'di emi Manetualaim-ma. Soona neukose emi bubuluk, mae Au ia Manetualain, fo emi Manetualaim manasoi-po'i emi neme ata nai Masir.

⁷ Neukose, Au o emi leo nusak fo Au helu basan nenik soo neu Abraham, Isak ma Yakob; Au fe dae ndia neu emi, fo da'di emi pusaka mesam. Au nde Manetualain.”

⁸ Musa nanduku-nalosak basa Manetualain hala hehelun ndia neu leoina Israel-la, tehu ala ta taoafik neu Musa fa, nanahu tuni-ndenik fo ta nanuu susue-lalaik ndia, taon-nalas ketu namahehenan-nala so.

⁹ Basa boema, Manetualain nafa'da Musa nae,

¹⁰ “Muu leo manek Masir-ra muu, fo mafa'dan, mae muse ana po'i leoina Israel-la, la'o ela ndia nusan-na.”

¹¹ Tehu, Musa nataa nae, “Hataholi Israel-la, ta nau lamanene au fa. Masa bole, manek Masir-ra namanene hataholi sama leo au ia, fo ta kokolak nalelak fa?”

¹² Leondiak, Manetualain, nadenu Musa no Harun, fo landuku-lalosak halak neu leoina Israel-la, ma neu manek Masir-ra, lae Manetualain nadenu sila, fo lauli-lalanga leoina Israel-la, kalua leme Masir mai.

Musa no Harun bei-ba'in tutuin-na

¹³ Musa no Harun bei-ba'in tutuin-na nde ia: Ruben, fo Yakob ana ulun-na, bongi anatouk haa, fo nde: Henokh, Palu, Hezron, ma Karmi. Fo leo-ingu manai leo Ruben-na dalek, bei-ba'i kain nde hataholi sila.

¹⁴ Simeon no saon fo hataholi Kanaan-na, ana bongi anatouk nee, fo nde: Yemuel, Yamin, Ohad, Yakhin, Zohar ma Saul. Fo leo-ingu-leo-ingu manai leo Simeon-na dalek, bei-ba'i kain nde hataholi sila.

¹⁵ Lewi bongi anatouk telu, fo nde: Gerson, Kehat ma Merari; fo leo-ingu-leo-ingu manai leo Lewi-a dalek-ka, bei-bai kain nde hataholi sila. Lewi naso'da losa teun 137.

¹⁶ Gerson bongi anatouk dua, fo nde: Libni ma Simei; hataholi sila tititi-nonosin makadotok.

¹⁷ Kehat bongi anatouk haa, fo nde: Amram, Yizhar, Hebron ma Uziel. Kehat naso'da losa teun natun esa teluhulu telu.

¹⁸ Merari bongi anatouk dua, fo nde: Mahli ma Musi. Leo-ingu manai leo Lewi-a dalek no sila esa-esak tititi-nonosin nde ndia.

¹⁹ Amram sao Yokhebed, fo aman fa'di inaanan-na, de anan-nala nde Harun no Musa. Amram naso'da teuk 137.

²⁰ Yizhar bongi anatouk telu, fo nde: Korah, Nefeg ma Zikhri.

²¹ Uziel boeo bongi anatouk telu, fo nde: Misael, Elsafan ma Sitri.

²² Harun sao Eliseba, fo Aminadab anafe'on-na; ma Nahason feton-na. Eliseba bongi Nadab, Abihu, Eleazar ma Itamar.

²³ Korah anatoun telu, fo nde: Asir, Elkana ma Abiasaf. Fo leo-ingu Korah bei-ba'i kain nde hataholi sila.

²⁴ Eleazar, fo Harun anamanen-na, sao Putiel anafe'on esa, de anan-na nde Pinehas. Basa malanga leo-ingu, ma mane leo manai leo Lewi-a dalek nde sila.

²⁵ Harun no Musa ndia, nde Manetualain paletas, soaneu loo hataholi Israel-la, kalua leme Masir mai.

²⁶ Duas leu loke manek Masir-ra fo daenga ana soi-po'i hataholi Israel-la.

Manetualain fe Musa no Harun paleta

²⁷ Lelek Manetualain kokolak no Musa neme Masir-ra,

²⁸ Manetualain nafa'da nae, “Au nde Manetualain. Manduku-malosak basa hata lala'en, fo Au afa'dan neu o, neu mane Masir-ra.”

²⁹ Tehu, Musa nataa nae, “Manetualain, O bubuluk, mae au ta kokolak alelak fa. Masa bole, manek-ka nau namanene au?”