KELUARAN 38 - Susula Malalaok Hehelu Palak Ma Hehelu Beuk

Tao mei tunu-hotuk soaneu tutunu-hohotuk nanatunuk

¹ Bezaleel ho'in-na ai akasia, boema ana tao mei tunu-hotuk soaneu tutunu-hohotu nanatunuk. Mei tutunu-hohotuk ndia balakak, nanalu loloan metel dua senti 20, ma dedeman-na metel esa senti 30.

² Nai basa bu'uk manai lain-na, ana tao masusulak sama leo bana susulan-na fo da'di esa no mei tunu-hotuk ndia. Basa-basan lala'en-na, nananakadiditak nenik liti.

³ Tao ma uledae, sakoob, mango, besi kabaek sama leo po'da ma la'o. Muse tao bua-lo'as sila-la neme liti mai.

⁴ Tao ma mala'e kafa neme liti mai fo fefeon neu mei tunu-hotuk-ka boboan dae, dedeman-na ba'e duak mei tunu-hotuk-ka deman-na.

⁵ Boema ana tao na suek 4 soaneu ai ndondolok-kala nai bu'u kahaan-nala dae.

⁶ Ai ndondolok sila-la ana taos neme ai akasia mai, de nakadiditak-kasa nenik liti.

⁷ Boema ana lo'do ai ndondolok ka duak sila leo suek manai mei tunu-hotuk ndia boboan duas dalek neu. Ana tao mei tunu-hotuk-ka tala'dan-na louk ma nanataok neme papak-ka mai.

Tao baak oe neme liti mai

⁸ Bezaleel tao baak oe no buin-na neme liti mai. Liti sila-la nana taok neme titinok fo inak manamalalau-maoono manai Manetualain Lalaa Teman-na lelesun-na, nuun sila.

Manetualain Lalaa Teman-na uma so'dan-na

⁹ Bezaleel pa'aketu Manetualain Lalaa Teman-na so'dan-na nenik temak, fo taon neme temak abalutu mai. Boboan kona, nanalun-na metel 44,

¹⁰ fo dii liti 20 lakatakan, de esa-esak nai dii eik liti dale, no soloka'do ma ndelin-na neme lilofulak-ka mai.

¹¹ Nai boboa kiin-na, ana tao sama leondiak boe.

¹² Nai boboan muli, ana tao temak neu, de temak ndia nananalun-na metel duahulu dua, no dii 10 ma dii eik 10; soloka'do ma ai tututin-na ana taon neme lilofulak-ka mai.

¹³ Lelesun-na nai boboan dulu, fo teman-na loloan-na metel duahulu dua boe.

^14-15 Nai lelesu ndia kii konan, ana tao laa neu, de laa ndia esa soona, nanalun-na metel 6 senti 60, no dii 3 ma dii eik 3.

¹⁶ Basa temak manaokofefeon-na uma so'dak ndia, ana taon neme temak abalutu mai.

¹⁷ Dii-la dii ein-nala ana taos neme liti mai, te soloka'do, tututin-na ma dii-la poin-na, ana taos neme lilofulak-ka mai. Basa dii manai uma so'dak ndia boboa-kaisun, latututiao no ndeli lilofulak-ka.

¹⁸ Ana tao uma so'dak ndia lelesuinan-na tema lelesun-na neme temak abalutu, fo nanatenuk nenik temak kabelik balau, pilabalanggeok ma pilas, boema nanabalias nenik seseu-sosook mana'ahiik. Nanalun-na metel 9 ma loloan-na metel dua, sama no temak maneme uma so'dan-na mai.

¹⁹ Dii 4 ma dii eik liti 4, lakataka tema lelesu ndia. Basa soloka'do, tatana poin-nala, ndelin-nala, ana taos neme lilofulak-ka mai,

²⁰ tehu ai papakuk soaneu Lalaa Temak ma soaneu pa'an-na, ana taos neme liti mai.

Bua kabelik fo nanapakek nai Manetualain Lalaa Teman-na dalek

²¹ Susulak fo nana sulak bua kabelik fo nanapakek nai Manetualain Lalaa Teman dale nde, batu ka duak fo Manetualain Paleta ka Sanahulun sila-la mamana pepe'dan-na nde ia. No Musa paletan-na de susulak ndia nanataok, ma hataholi Lewi-la sulak matalololen de Itamar fo Imam Harun-na anan-na de nauli-nalanga.

²² Bezaleel, fo Uri anan-na, ma Hur fo neme leo Yehuda, upun-na, tao basa hata lala'en fo Manetualain paletan.

²³ Manatulu-falin nde Aholiab, fo Ahisamakh neme leo Dan-na, anan-na nde been-na tuka manadoki-dulak esa, manatutu'u dulak ma manatenu temak abalutu, boema temak kabelik balau, pilabalanggeok ma pilas.

²⁴ Lilopilas fo nanatunu-hotuk leo Manetualain soaneu Lalaa Temak Malalao-malafuk-ka basa-basan lala'en-na kilo lifun esa, nanataik tunga tatais fo nanapakek nai Manetualain Lalaa Teman-na.

²⁵ Ala hapu lilofulak neme lelek leke leoina Israel-la dede'un-na kilo 3.430 nanataik tunga tatais fo nanapakek nai Manetualain Lalaa Teman-na.

²⁶ Lilopilas, lilofulak dede'un-na sama no hata fo basa hataholi nanasulak nai leleke samanek ndia dalek, baba'en-nala. Basa hataholi-la bae tunga dede'uk fo nanaketu basak, ma nanataik tunga tatais fo nanapakek nai Manetualain Lalaa Teman-na. Nai leleke samanek ndia dalek, hapu touk fo teun duahulu leo lain neu, dede'un-na hataholi 603.550.

²⁷ Ala pake lilofulak sila-la kilo 3.400 soaneu tao Manetualain Lalaa Teman-na diin-nala ndi eik natun esa, ma tema lelesun-na. Batu netes esa soona, belan-na kilo 34.

²⁸ Bei ela lilofulak kilo 30, de Bezaleel pakes soaneu tao ai-la tututin-nala, ma soloka'do soaneu dii-la, boema dii sila-la tatana poi lain-na.

²⁹ Liti fo nanatunu-hotuk soaneu Manetualain-na, basa-basan kilo 2.425.

³⁰ Liti sila nanapakek soaneu tao dii lelesu manai Manetualain Lalaa Teman-na dii ein-nala, mei tutunu-hohotuk-ka no kafa nananala'ek neme liti mai, basa mei tunu-hotuk-ka hata-heton lala'en-na,

³¹ temak manaokofefeon-na uma so'dan-na, dii ein-nala, ma lelesuinan-na, Lalaa Temak ai papakun-na ma uma so'dan-na.