KELUARAN 37 - Susula Malalaok Hehelu Palak Ma Hehelu Beuk

Tao Peti Hehelu-balataak-ka nana taok

¹ Bezaleel tao Peti Hehelu-balataak-ka neme ai akasia mai, nanalun-na senti 110, loloa dedeman esa soona, senti 66.

² Dea dalen nananakadiditak nenik lilopilas isik, boema ana tao su'udoo lilopilas okofefeon.

³ Basaboema, ana taon-na suek lilopilas 4 soaneu ai ndondolon-na, de ana taon neu peti ndia ein haas, fo boboan esa soona, suek dua.

⁴ Boeo ana tao ai ndondolon-na neme ai akasia mai, de nakadiditak-kana nenik lilopilas,

⁵ boema ana lo'do ai ndondolok sila-la leo suek manai peti ndia boboan-na dalek neu.

⁶ Basa boema, ana taon-na tatanak esa neme lilopilas isik-ka mai, nanalun-na senti 110, ma loloan-na senti 66.

⁷ Boeo ana taon-na kerub dua neme lilopilas nanatutuk-ka mai,

⁸ tatanak ndia pe'dan esa soona, ana tao esa neu. Kerub ka duak sila-la, ana taos da'di esa no tatanan-na,

⁹ ma ana taon-nalas lasasalematak, no li'dan-nala lakapepela-la peti ndia tatanan-na.

Tao mei soaneu loti tunu-hotuk

¹⁰ Bezaleel tao mei neme ai akasia mai, fo nanalun-na senti faluhulu falu, loloan-na senti haahulu haa, ma dedeman-na senti 66.

¹¹ Mei ndia nananakadiditak nenik lilopilas isik, ma ana tao su'udoo lilopilas okofefeon.

¹² Boema ana taon-na mei-a su'udoon-na, loloan-na senti 7,5. Nai su'udook ndia, ana tao su'udoo lilopilas okofefeok-kana.

¹³ Ana taon-na suek 4 soaneu ai ndondolon-na, de ana taon neu mei ein-na bu'un haas.

¹⁴ Suek fo nakataka ai ndondolon-na, ana ton deka nai mei su'un-na.

¹⁵ Ana tao ai ndondolok ndia neme ai akasia mai, de nakadiditak-kana nenik lilopilas.

¹⁶ Ana tao pingak, mangotee, kete ma mango boe, soaneu tunu-hotu oe angol. Basa mei ndia hata-heton lala'en-na, nanataok neme lilopilas isik-ka mai.

Banu eik-ka tataon-na

¹⁷ Bezaleel tao banu eik-ka neme lilopilas isik-ka mai. Buin-na no hoho'un-na, ana taon neme lilopilas nanatutuk-ka mai. Bunga-bunga nanabalias-sala nde bunga pakon-na no napan-na ana taos da'di esa no hoho'un-na.

¹⁸ Nai hoho'un ndia, ana tao ba'ek 6, de boboak esa soona, ba'ek 3.

¹⁹ Nai ba'ek esa soona, ana balias-sana nenik bunga badam 3 no pakon ma napan-na.

²⁰ Ana balias hoho'un-na nenik bunga badam 4 no pakon ma napan-na.

²¹ Ana tao pakok esa nai ndanak dua nisi daen-na.

²² Basa banu eik ndia lala'en-na no pakon ma napan-nala, nanataok neme lilopilas isik nanatutuk biak esa.

²³ Nai banu eik ndia lain, ana tao banuk 7 no buas fo tao balisi banuk-ka tetelun-na ma pinga anan-na nanataok neme lilopilas isik-ka mai.

²⁴ Paluu lilopilas isik kilo 35, soaneu tao banu eik ndia no hata-heton.

Tao mei tunu-hotuk fo mamanak tunu boomenik-ka

²⁵ Bezaleel tao mei tunu-hotuk esa neme ai akasia mai, soaneu mamana tutunu boomenik. Mei tutunu-hohotuk ndia balakak; nanalu loloan senti beke 45 ma dedeman-na senti 90. Nai bu'u kahaan lain, ana tao susulak sama leo bana susulak fo da'di esa no mei tunu-hotuk ndia.

²⁶ Nai boboan lai, boboa ka haan-nala ma susulan fo sama leo bana susula, nananakadiditak nenik lilopilas isik, ma ana tao su'udoo lilopilas okofefeon.

²⁷ Boeo ana tao suek duan nai su'udoo lilopilan-na dae fo nai boboan duas fo suekande lakataka mei tunu-hotuk ndia ai ndondolon-na.

²⁸ Ai ndondolok ndia nanataok neme ai akasia mai, ma nananakadiditak nenik lilopilas.

Tao mina feta ma boomenik

²⁹ Bezaleel boeo tao mina feta ma boomenik kaboomeni isik, de ana sese'dok-kana sama leo minak kaboomenik-ka.