KELUARAN 36 - Susula Malalaok Hehelu Palak Ma Hehelu Beuk

¹ Bezaleel, Aholiab, ma basa tuka fo manahapu dudu'a-aafi maneu ma malelaina neme Manetualain mai, ala tao-no'i lalelak basa hatan-nanapaluuk soaneu tao Manetualain Lalaa Teman-na. Sila muse tao basa hata lala'en-na, sama leo hata fo Manetualain paleta basan so.”

Leoina Israel-la fe tutulu-fafalik makadotok

² Musa naloo Bezaleel, Aholiab ma basa hataholi fo manahapu malelaina neme Manetualain mai, ma hataholi fo no dale hihii mesan-na, ana fe tutulu-fafalik, boema nadenus mulai leona.

³ Musa fes basa hata lala'en fo hataholi Israel-la tulu-falin soaneu Manetualain Lalaa Teman-na nafofo'an-na. Tehu leoina Israel-la tunga-tunga fafain-na, ka'da bei leni lahele tunu-hotuk sila leo Musa neu.

⁴ Boema basa tuka fo manatao-no'i tatao-nono'ik ndia,

⁵ leni halak leo Musa neu lae, “Dii-ai fo hataholi-la tulu-falik sla-la, lena neme nanapaluuk soaneu tatao-nono'ik fo Manetualain fen neu ami so.”

⁶ Boema Musa po'a-benga neu basa uma ofu lala'en-na, nae tutulu-fafalik soaneu Manetualain Lalaa Teman-na, dai so; da'di hataholi-la ta leni hata-hata so'on.

⁷ Dii-ai fo ala tulu-falik-kala, dai-ma lena so, soaneu ala tao lakababasak tatao-nono'ik ndia.

Manetualain Lalaa Teman-na tataon-na

⁸ Basa boema, tuka malelaina manai basa tuka-la dalek, tao Manetualain Lalaa Teman-na. Ala tao Lalaa Temak ndia neme tema abalutu biak sanahulu, fo nanatenuk neme tema kabelik balau, pilabalanggeok ma pilas, boema nanaseu-sook nenik kerub-pa dulan-na.

⁹ Basa tema bibiak sila-la, uukun-na sama; nanalun-na metel sanahulu dua, ma loloan-na metel dua.

¹⁰ Temak biak 5 nanatutik da'di neu temak bia matua esa, ma biak 5, ala tao taon leondiak boe.

¹¹ Nai bia ka-5-k sila-la su'u doon-na, ala tao ndeli neme tema balau mai,

¹² temak esa soona, ndeli 50, nalosa nalupa tema maloa pasan esa.

¹³ Boema ala taok soloka'do lilopilas 50 neu, soaneu tuti nakabubua temak maloa ka duak sila-la.

¹⁴ Basa ndia boema, ala tao Lalaa Temak ndia sinin-na neme temak biak 11, fo neme bi'ihiik-ka bulun-na mai.

¹⁵ Temak sila-la uukun-na sama, nanalun-na metel 13, ma loloan-na metel dua.

¹⁶ Tuti biak 5 da'di tema maloa esa, ma bia ka 6k-kala ala tao taon leondiak boe.

¹⁷ Ala tao ndeli 50 neu temak-ka esa su'udoon-na, ma ndeli 50 neu temak-ka dua su'udoon-na.

¹⁸ Boema ala tao la soloka'do 50 neme liti mai, soaneu tuti lakabubua tema maloa ka duak sila-la, fo ana da'di Lalaa Temak sinin-na.

¹⁹ Basa ndia boema, ala tao-la tatanak 2 soaneu Lalaa Temak, esa neme bi'ilopo mane bulun-na, fo nanalosek nenik dula pilas, ma esak-ka neme bana louk mangana'uk-ka mai.

²⁰ Basa boema, ala tao-la Lalaa Temak diin-nala ndos, fo neme ai akasia mai.

²¹ Dii esa soona, nanalun-na metel 4, ma loloan-na senti 66.

²² Ala tao ai papakuk 2 neu dii esa, nalosa dii sila-la esa natutik no esa.

²³ Ala tao dii 20 neu Lalaa Temak boboan kona,

²⁴ no dii eik lilofulak 40, fo dii esa soona, dii eik duan nai dii dae, soaneu ai papaku ka duak-kala.

²⁵ Ala tao dii duahulu neu Lalaa Temak boboan kii,

²⁶ no dii eik lilofulak 40, fo dii esa soona, dii eik duan nai dii dae.

²⁷ Ala tao dii 6 neu Lalaa Temak buin muli,

²⁸ ma dii 2 neu bu'un-na.

²⁹ Dii bu'uk sila-la nanatutik nai ein-na, losa nakandoo leo lain neu. Dii ka duak manai bu'un-na, ala tao taon leondiak boe.

³⁰ Da'di basa-basan hapu dii 8 loo dii eik lilofulak 16, de dii esa soona, dii eik duan nai dii dae.

³¹ Boema ala tao-la ai betubalak 15 neme ai akasia mai, fo 5 soaneu dii manai Lalaa Temak boboan esa,

³² 5 soaneu Lalaa Temak boboan esa seluk bai, ma 5 soaneu Lalaa Temak buin muli.

³³ Ai betubala tala'dak-ka dedeman-na ba'e duak dii tala'dak-ka, fo neme Lalaa Temak ndia pe'dak leo pe'dak neu.

³⁴ Lalaa Temak diin-nala loo ai betubalan sila-la nananakadiditak nenik lilopilas, boema ala tao sue lilopilas neu fo nakataka ai sila-la.

³⁵ Boeo ala tao tema lelesu-a neme tema abalutu mai fo nanatenuk nenik tema kabelik balau, pilabalanggeok ma pilas, boema nanaseu-sook nenik kerub dulan-na.

³⁶ Soaneu lolo'e temak ndia neu de, ala tao la dii 4 neme ai akasia mai de lakadiditak-kana nenik lilopilas ma soloka'do lilopilas, de ala taon neu dii ei lilopilas ka 4k-kala lain.

³⁷ Boema ala tao tema lelesu soaneu Lalaa Temak lelesun-na neme tema abalutu mai, fo nanatenuk nenik tema kabelik balau, pilabalanggeok ma pilas, de nanabalias nenik seseu-sosoo mana'ahiik.

³⁸ Soaneu tema lelesu ndia, de ala tao-la dii lima fo nanatutik nenik soloka'do. Dii ka 5k fo pe'dan-nala nanatutik ndia, nananakadiditak nenik lilopilas, te dii eik ka 5k-kala nanataok neme liti mai.