KELUARAN 34 - Susula Malalaok Hehelu Palak Ma Hehelu Beuk

Batu lei beuk dua

¹ Basa boema, Manetualain nafa'da Musa nae, “Pa'a ma batu bebelak dua sama leo batu makahuluk-ka. Nai batu ka duak sila-la, neukose Au sulak dede'a-kokolak fo sama no manai batu fo o tao maba'ek sila-la.

² Balahaa fafaik soona, maheheleaom soaneu kae Letek Sinai fo muu mataa Au nai letek ndia poin-na.

³ Ta bole hataholi esa boen tunga o, do nai letek ndia boboan bee boe. Boso po'ilotak sapi, bi'ilopo la'a na'u lai letek ndia huun-na.”

⁴ Boema Musa pa'a-na batu bebelak dua seluk, de balahaa fafaianak nanseli boema, ana ho'i nenis de ana kae leo Letek Sinai lain neu, sama leo Manetualain paleta neun.

⁵ Boema Manetualain kona mai nai ko'as esa dalek; napadeik no Musa nai mamanak ndia, de nafa'da na'de malalao-malalafun, fo nde Manetualain.

⁶ Basa boema Manetualain la'ok leo Musa uluk neu, de nafa'da nae, “Au Manetualain, nde been-na Manetualain fo dalen-na henuk no dale malole ma susue-lalaik. Au susue-lalaing sasi kao-kao, Au manalilinekak ma ta haelai namanasa fa.

⁷ Au sue-lai lahele tititi-nonosi lifu-lifuk kala, ma manafe do'o do ampon neu salak ma sala-singok; tehu hataholi masalak-ka, Au ta soi-po'in makandondook neme huhukun-na mai fa, ma Au huku upu-anan losa bobongi ka telu ma ka haa boe, nanahu sila ina-aman, bei-ba'in sala-singon-nala.”

⁸ Hatematak ndia boe, Musa sene-do'ok.

⁹ Nafa'da nae, “Manetualain, metema te'e-te'e au andaa o O dalem-ma soona, au dokodoe, ela leo been-na Manetualain tunga moo ami. Memak leoina ndia langa batuk, tehu fe do'o do ampon neu ami tatao-nono'i mangalaum-ma, ma ami sala-singom, ma sipok-ma ami, da'dileo O ana mesam.”

Hehelu-balataak nanatao nabebeuk

¹⁰ Manetualain nafa'da Musa nae, “Besak ia, Au tao hehelu-balataak o leoina Israel-la. Nai sila matan, neukose Au tao manada'di beuk, fo leoina manai daebafak-ka beita la'iesa fo ala tao hain. Basa leoinak-kala, neukose lita manada'di beuk fo Au taok-kala, nana Au, Manetualain neukose tao hata esa neni bibii-namata'uk nanseli ba'eneu emi.

¹¹ Emi muse tunga hoholo-lalanek fo faik ia Au fen neu emi. Neukose Au usiheni leoina Amori, Kanaan, Het, Feris, Hewi ma Yebus nai lelek emi tutulumatak.

¹² Boso tao hehelu-balataak moo hataholi manai nusak fo emi meu, nana dede'ak ndia ana bisa da'di hihi'ik esa, fo nenenin-na mamates ba'eneu emi.

¹³ Da'di, boso tao leondiak, tehu tao makalulutuk sila mei tunu-hotun-nala, ma lo'oheni sila sosongo-tatangon Asyera, diin-nala.

¹⁴ Boso sene-do'ok neu lamatua fe'ek, nana Au Manetualain, nde been-na Manetualain fo ta nau nakasasamak-kana no su'di beek-ka fa.

¹⁵ Boso tao hehelu-balataak moo nusak ndia leoinan-nala, nana nai lelek ala sene-do'ok fo fe tutunu-hohotuk neu sila-lamatuan-nala soona, neukose ala leleko emi, fo emi tunga.

¹⁶ Metema emi anam-mala sao ina nusa dea soona, neukose inak sila-la fufu'di-oo'dok-kasa soaneu ala la'oela Au fo ala sene-do'ok neu sila lamatuan-nala.

¹⁷ Boso tao lamatua fe'ek neme liti mai, fo sene-do'ok neun.

¹⁸ Tao feta Loti Fo Ta Pake Laluteik fa. Sama leo Au paleta basan neu emi so, de emi muse mi'a loti fo ta pake laluteik, faik hitu dalen-na nai bulak Abib dale, nanahu nai bulak ndia dalen-na, emi la'oela Masir.

¹⁹ Basa anatouk uluk-kala ma bana maneanak fo nanabongi makasososak-kala nde been-na, Au nuung,

²⁰ tehu emi muse soi-ma keledei ana fo nanabongi makasososak-ka nenik tunu-hotu bi'ilopoana esa da'dileo ngganggatin-na. Metema emi ta nau nggati fan soona, emi muse po'de mala'di keledei ana ndia lesuha'in-na. Emi muse soi-ma emi anatou ulum-mala. Hataholi esa boen ta bole mai leo Au mai fa, metema ta neni tutunu-hohotuk fa.

²¹ Hapu faik nee soaneu naue-nale'di; boso maue-male'di nai faik-ka hitun-na, leomae nai fai sele-nggalik do fai ketu-koluk.

²² Tao Feta Keketu-kokoluk nai lelek emi mulai ketu-kolu gandum-ma buna-boan makasososan-na. Boeo tao Feta Lalaa Akidook-ka nai basa teuk-ka, nai lelek emi ketu-seu ai boak-kala.

²³ Basa touk-kala muse mai sene-do'ok neu Au, Manetualain Israel Manetualain-na, la'i telu nai teuk esa dalen-na.

²⁴ Metema Au usiheni leoinak-kala leme emi matam, ma Au tao amaloa emi nusam-ma soona, ta hapu hataholi esa boen napalani natona na emi nusam-ma, nai lelek emi meu tao Feta Loti Fo Ta Pake Laluteik, Feta Keketu-kokoluk ma Feta Lalaa Akidook-ka.

²⁵ Nai lelek emi tunu-hotu banan-nanado'dok soona, boso tunu-hotu hata-hata fo taon pake laluteik. Bana-manu fo do'don soaneu feta Paskah, emi muse mi'aheni paan-na le'odaek ndia boe; ta bole ela losa balahaa fafaik fa.

²⁶ Tunga teuk, emi muse meni emi daem-ma buna-boa makasososan-na leo emi Manetualain fo emi Manetualain-na Uman neu. Ta bole nasu bi'ilopoana do bi'ihiiana paan-na, nenik inan su'u oen-na fa.”

²⁷ Manetualain nafa'da Musa nae, “Sulak-ma dede'a-kokolak sila-la, nanahu no dede'a-kokolak sila-la de Au tao hehelu-balataak no o ma no leoina Israel-la.”

²⁸ Musa leo no Manetualain nai ndia, lele'dok 40, le'odaek 40, ma nai lelek ndia, ta na'a-ninu fa. Hehelu-balataak ndia isin-na nde, Manetualain Paletak-ka 10n-na, fo nanasulak nai batu bebelak ndia lain.

Musa kona neme Letek Sinai lain mai

²⁹ Lelek Musa kona neme Letek Sinai lain mai, te neni Paleta ka Sanahuluk sila-la, mata-panan nandela-nasa'a nanahu ana kokolak no Manetualain so, tehu Musa ta bubuluk nae mata-panan nandela-nasa'a fa.

³⁰ Harun no basa laun-na lala'en-na lita Musa mata-panan nandela-nasa'a, de ta lapalani deka fan.

³¹ Tehu Musa naloos, boema Harun ma basa sila mauli-malangan-nala mai deka loon, de Musa kokolak nos.

³² Basa ndia boema, basa laun Israel-la lala'en-na lakabubua de okofefeo-lan, boema Musa nanduku-nalosak neu sila basa-basan, basa hoholo-lalanek fo Manetualain fen neme Letek Sinai lain.

³³ Musa kokolak basa nos boema, ana potiketu mata-panan nenik temak.

³⁴ Metema Musa masok leo Manetualain Lalaa Teman dale neu fo ana kokolak no Manetualain soona, ana bukaheni temak ndia losa ana kalua. Nanduku-nalosak basa neu leoina Israel-la, basa Manetualain hala hehelun-na,

³⁵ ma lita Musa mata-panan nandela-nasa'a. Boema ana potiketu mata-panan seluk losa fai manamaik-ka, metema ana kokolak seluk no Manetualain.