KELUARAN 32 - Susula Malalaok Hehelu Palak Ma Hehelu Beuk

Sapi lilopilas

¹ Lelek leoina Israel-la bubuluk lae doon-na seli Musa ta kona neme letek lain mai fa, tehu bei nai naa boe, boema leu lakamomotu-la Harun de lafa'dan lae, “Ita ta bubuluk hata da'di neu Musa fa, hataholi fo mana no ita kalua teme Masir mai; da'di tao fe ami lamatua fe'ek fo nauli-nalanga ami.”

² Boema Harun nafa'das nae, “Lui-ma emi sao anam lolo'e lilopilan-nala fo menis leo au mai.”

³ Boema sila esa-esak luin-na lolo'e lilopilan-na, de ninin leo Harun neu.

⁴ Harun ho'in-na lolo'ek sila-la de natanoes boema ana di'an leo mamana dodoki-dudulak esa dalek neu, de ana taon-na sapi nanadoki-dulak esa. Leoina ndia nafa'da nae, “Hai Israel, Ita lamatuan fo manahela-nole ita kalua teme Masir mai-a, nde ia!”

⁵ Boema Harun napadedeik mei tunu-hotuk esa neu sapi lilopilas ndia matan-na, de ana po'a-benga nae, “Balahaa hapu feta soaneu fe ha'da-holomata neu Manetualain.”

⁶ Balahaa fafaianak te, hataholi Israel-la leni bana de'ubee soaneu tutunu-hohotu nanatunuk, ma de'ubee seluk soaneu tutunu-hohotu mole-dame. Langatuuk de la'a ma linu mafuk, boema ala fo'a de ala dole dasa.

⁷ Boema Manetualain nafa'da Musa nae, “Kona lai-lai, nana o leoinam fo o hela-noles kalua leme Masir mai-a, ala tao tatao-nono'i mangalauk so.

⁸ Ala la'ok sala leme Au paletang-ngala mai so. Ala tao sapi nanadoki-dulak neme lilopilas nananatanoek-ka mai, boema ala sene-do'ok neun ma ala tunu-hotu fen tutunu-hohotuk. Lafa'da lae, ndia nde sila-lamatuan fo mana no sila kalua leme Masir mai.

⁹ Au bubuluk ae leoina ndia, nalanga batu nanseli

¹⁰ Boso so'ba-so'ba mapanggengge Au. Au amanasas de Au sanga tao amopo-amates. Tehu neukose Au tao-a o ma o tititi-nonosim da'di leoina esa, matuaina.”

¹¹ Musa dokodoe neu Manetualain fo ndia Manetualain-na nae, “Manetualain tao le'e de O muse tao leondiak neu hataholi sila? Ade O ta soi-tefa-malas leme Masir mai, fo nenik koasa ma be'i-balakaik matuaina fa do?

¹² Metema O tao mamate-mamopos soona, neukose hataholi Masir-rala lafa'da lae O mauli-malanga leoina ndia kalua leme Masir mai, soaneu taomisas lai letelepak-kala ma tao mamate-mamopo makandondook-kasa. Boso tao leondiak, ou Manetualain, dodoo masafali o dalem-ma, fo boso tao soe leoina ndia.

¹³ Mafandendelek O atam Abraham, Isak ma Yakob. Mafandendelek mae O maheluk pake sosoo-susupak soaneu O fe sila tititi-nonosin de'u nduuk manai lalai, boeo mafandendelek mae O fe la'iesak dae fo O heluk ndia, fo neukose ana da'di sila tititi-nonosin pusakan losa dodoon-na.”

¹⁴ Boema Manetualain dodoo nasafali dalen-na, de Ana ta da'di huku leoina ndia nenik susa-soe fa.

¹⁵ Musa kona falik neme letek ndia lain mai, ma neni batu bebelak ka duak fo Manetualain paletan-nala nanasulak nai boboan duas.

¹⁶ Manetualain mesak-kana nde tao batu ndia, de Ana doki-dulak paletan-nala nai ndia.

¹⁷ Lelek ana bei kona mai te, Yosua namanene hataholi Israel-la eki, boema nafa'da Musa nae, “Amanene nakote natee-natatik-ka nai mamana ofu.”

¹⁸ Musa nae, “Nene'nen soona, eeki sesengik ta ndia, do ngganggasi hataholi manakalak fa; halak ndia, hataholi manamakameek halan.”

¹⁹ Lelek Musa deka no mamana ofu ndia boema, nita sapi lilopilas ndia, ma hataholi-la foti-longe, boema namanasa. Nai ndia boe, fo nai letek ndia huun-na, Musa pesi batu fo nenik ndia neu dae lain, nalosa lutu-lutu.

²⁰ Basa boema, ana ho'in-na hataholi Israel-la tao-la sapi nanadoki-dulak ndia de ana hotun, boema ana ha'bo nan lutu-lutu sama leo daesopuk, boema ana nggalin leo oe lain neu. Basa boema, nadenu hataholi Israel-la linun.

²¹ Boema nafa'da Harun nae, “Ala tao hata neu o, de nalosa o po'ilotak-kasa tao sala-singok matuaina?”

²² Harun nataa nae, “Boso mamanasa au; o bubuluk, leoina ia mangalaun na seli.

²³ Lafa'da au lae, ‘Ita ta bubuluk, hata da'di neu Musa, fo hataholi mana no ita kalua teme Masir mai; da'di tao fe ami lamatua fe'ek fo nauli-nalanga ami.’

²⁴ Au adenus fo ala fe bua pilan-nala, boema ala fes leo au mai. Au atanoe basa bua lilopilas sila-la neme ha'i dale, boema sapi ia, ana da'di!”

²⁵ Musa name'da nae Harun po'ilotak leoina Israel-la sama leo ndala po'ihenin neme lalae dale mai, nalosa musu non-nala hikas.

²⁶ Boema napadeik neu mamana ofu lelesuinan-na matan-na de ana eki nae, “See nok Manetualain soona, muse ana mai leo ia mai!” Boema leo Lewi mai de ala okofefeo-la Musa,

²⁷ de nafa'das nae, “Israel Manetualain fo emi Manetualaim-ma paleta emi esa-esak fo fe'a na emi tafainam-ma, fo ana la'ok tunga mamana ofu ia, neme lelesuina ia leo lelesuina eli neu boema ana taonisa emi tolanom-mala, tia laim-mala ma uma titia-tataim-mala.”

²⁸ Leo Lewi tao tunga paleta ndia, de nai faik ndia dalen-na, fafa'kama hataholi lifun telu nanataonisak.

²⁹ Musa nafa'da leo Lewi nae, “Faik ia, emi hele hehelik emi aoinam-ma da'di imam fo nalalau-naoono Manetualain nenik ana taonisa emi anam-mala ma emi tolanom-mala, boema Manetualain fe baba'e-papalan neu emi.”

³⁰ Balahaa boema, Musa nafa'da leoina ndia nae, “Emi tao basa sala-singok matuaina so. Tehu besak ia, au sanga kae seluk leo letek ndia lain soaneu asasalematak o Manetualain; sanga tao leondia fo au hapu do'o do ampon soaneu emi sala-singom.”

³¹ Boema Musa neu nasasalematak seluk no Manetualain de nafa'da nae, “Leoina ndia tao basa sala-singok matuaina so. Ala tao lamatua fe'ek neme lilopilas-sa mai.

³² Sa'di leo been-na, O fe do'o do ampon neu sala-singon-nala; metema ta soona, loseheni au na'deng fo O sulak basan nai O Susalam dale.”

³³ Manetualain nataa nae, “Ka'da hataholi fo nasala-nasingo basa neu Au, neukose Au loseheni na'den-na neme susulak ndia dalek mai.

³⁴ Besak ia, muu leona, fo moo hataholi sila-la leo mamanak fo Au afa'da basan neu o so. Neukose Au ata nusa so'dang-nga hela nole o, tehu neukose fain-na losa soaneu Au huku hataholi sila nanahu sala-singon-nala.”

³⁵ Boema Manetualain fe soe-a tuni-ndeni-na hataholi sila-la, nanahu lakaseti Harun tao sapi lilopilas nanadoki-dulak ndia.