KELUARAN 31 - Susula Malalaok Hehelu Palak Ma Hehelu Beuk

Manetualain hele hataholi soaneu tao Lalaa Temak no hata-heton.

¹ Manetualain nafa'da Musa nae,

² “Au hele basa Bezaleel, fo Uri anan-na, ma Hur neme leo Yehuda upun-na,

³ de Au ba'e-bati fen Au koasang-nga. Au fen dudu'a-aafi maneu, malelak ma be'i-balakaik nai doki-dula mata-matak lala'en-na dalek:

⁴ soaneu ana tutu'u dodoki-dudulak leo beek-ka, fo ana taon neme lilopilas, lilofulak ma liti-a mai;

⁵ soaneu fofola batu poemata fo ana sanga pa'an; soaneu doki-dulak ai ma soaneu dodoki-dudula mata fe'ek lala'en-na.

⁶ Boeo Au hele basa Oholiab, fo Ahisamakh neme leo Dan, anan-na fo ana tulu-falin. Au fe tuka malelak-kala malelak matuaina boe, fo ela ala hapu tao su'di beek fo Au paleta neus:

⁷ Au Lalaa Temang-nga, Peti Hehelu-balataak-ka no tatanan-na, Basa Lalaa Temak lou-laan,

⁸ fo nde: mei no hata-heton, banu eik lilopilas isik-ka no hata-heton, mei tunu-hotuk fo mamanak tunu boomenik-ka,

⁹ mei tunu-hotuk fo mamanak tutunu-hohotuk nanatunuk-ka no basa hata-heton lala'en-na, baak oe no buin-na,

¹⁰ bua-lo'a makaluku-makatele soaneu Harun no anan-nala, fo muse ala paken nai lelek lalalau-laoono da'dileo imam,

¹¹ mina feta, ma boomenik kaboomenik soaneu Kama Malalao-malalafuk-ka. Sila muse tao basa sila-la nandaa no natutu'duk fo Au fen neu o.”

Sabat, fai hahaeaok

¹² Manetualain paleta Musa

¹³ fo po'a-benga neu leoina Israel-la nae, “Makaboboi fai Sabat, faik fo Au aketu basan da'dileo fai hahaeaok. Faik ndia da'di nasanene'dak neu emi ma Au losa dodoon-na, fo ela emi bubuluk mae Au nde Manetualain, ma mae Au tao emi da'di Au leoinang so.

^14-15 Emi muse fe ha'da-holomata neu fai hahaeaok ndia da'dileo fai malalao-malalafuk. Au fe emi faik 6 soaneu maue-male'di, tehu faik-ka hitun-na nde been-na fai matua fo nanafe hehelik soaneu Au. See ta fe ha'da-holomata neu fan, tehu naue-nale'di nai faik ndia soona, muse nanahukunisak.

¹⁶ Leoina Israel-la muse lakaboboi faik ndia neme tititi-nonosik leo tititi-nonosik neu, fo da'dileo ta'du-tana neme hehelu-balataak-ka mai.

¹⁷ Faik ndia nde been-na fai nasanene'dak esa fo nahele neu leoina Israel-la ma Au, nanahu Au, fo Manetualain, akadada'dik basa lalai ma daebafak-ka nai faik nee dalen-na, de nai faik ka hitun-na Au hahae ue-le'dis de Au hahaeaong.”

¹⁸ Manetualain kokolak basa no Musa nai Letek Sinai lain boema, Ana fen batu bebelak dua, fo Manetualain sulak paletan-nala nai dalek.