KELUARAN 30 - Susula Malalaok Hehelu Palak Ma Hehelu Beuk

Mei fo mamanak soaneu tunu boomenik

¹ Manetualain nafa'da seluk Musa nae, “Taom-ma mei tunu-hotuk esa neme ai akasia mai, fo da'di mamanak tunu boomenik.

² Taom-ma mei tunu-hotuk ndia muse balakak; nanalu-loloan senti beke 45, ma dedeman-na senti 90. Tao bana susulak neu bu'un haas, fo da'di esa no mei tunu-hotuk ndia.

³ Nai lain, fo boboan haas ma bana susulak-kala muse nananakadiditak nenik lilopilas isik, ma tao su'udoo lilopilas okofefeon.

⁴ Tao suek dua neu boboan duas su'udoon-na dae, soaneu lakataka mei tunu-hotuk ndia ai ndondolon-na.

⁵ Ai ndondolok ndia muse taon neme ai akasia mai, ma nananakadiditak nenik lilopilas

⁶ Pe'da mei tunu-hotuk ndia neu temak manai Peti Hehelu-balataak-ka matan deak, nai mamanak fo neukose Au atongo o o.

⁷ Tunga-tunga fafain-na, nai lelek Harun mai sadia banuk-ka, muse ana tunu boomenik nai mei tunu-hotuk ndia lain.

⁸ Ana tao leondiak boe, nai lelek ana de'de banuk-ka nai fai le'donoson-na. Tutunu-hohotu boomenik ndia, muse taon nakandondoo henin neme bobongik leo bobongik neu.

⁹ Boso tunu-hotu boomeni fe'ek, tutunu-hohotuk bana-manu do tutunu-hohotu nana'a-nininuk nai mei tunu-hotuk ndia lain; boeo boso di'a angol leo mei tunu-hotuk ndia lain neu.

¹⁰ Harun muse tao nalalao-nalalafu mei tunu-hotuk-ka teuk esa la'iesa nenik ana pisi mei tunu-hotuk-ka bana susulan haas nenik bana fo nanatunu-hotuk soaneu sala-singok hapu do'o do ampon, daan-na. Ana muse tao leondiak tunga teuk ma neme bobongik leo bobongik neu. Mei tutunu-hohotuk ndia muse malalao-malalafuk ma nanafe hehelik soaneu Au.”

Manetualain Lalaa Teman-na bean-na

¹¹ Manetualain nafa'da Musa nae,

¹² “Nai lelek leke leoina Israel-la dede'un-na, touk lala'en-na muse bae doi soi-tefak soaneu aoinan-na leo Au mai, fo ela ana boso hapu soe nai lelek lelekek ndia la'ok.

¹³ Basa hataholi fo nanalekek nai lelekek ndia, ala muse bae doik dede'un-na tunga dede'uk fo nananaketu basak nai Au Lalaa Temang-nga, da'di leo tutulu-fafali hehelik soaneu Au.

¹⁴ Basa hataholi fo nanalekek nai lelekek ndia dalek, fo nde basa touk fo teun duahulu leo lain neu, ana muse fe tutulu-fafali hehelik ndia.

¹⁵ Hataholi kamasu'ik-ka ta bole fe lena fa, ma hataholi nuu-taa hata-taak-ka, ta bole fe kulang, nai lelek ala bae doi soi-tefak soaneu aoinan-na.

¹⁶ Moke doik sila-la neme leoina Israel-la mai, fo paken soaneu makaluku-makatele nai Au Lalaa Temang dale. Basa sila-la nde been-na, doi soi-tefak soaneu sila aoinan-na, de neukose Au afandendelek-kasa tataas esa fo Au asulu-ahapas.”

Tao baak oe neme liti mai

¹⁷ Manetualain nafa'da Musa nae,

¹⁸ “Tao-ma baak oe esa neme liti mai, ma buin-na boeo tao liti neu. Tao baak oe ndia neu Lalaa Temak-ka no mei tunu-hotuk-ka tala'da, boema sali oe leo dalek neu.

¹⁹ Oe ndia soaneu Harun no anan-nala, fo ela ala safe ei-liman

^20-21 nai lelek ala beita masok leo Lalaa Temak dale leu fa, do ala beita deka loo mei tunu-hotuk-ka soaneu leni tutunu-hohotu nanatunuk. Sila muse tao dede'ak ndia, fo daenga sila boso mates. Sila ma sila tititi-nonosin muse tunga nakanenetek ndia losa dodoon-na.”

Mina feta

²² Manetualain nafa'da Musa nae,

²³ “Ho'i-ma bumbu neulauk, laluteik kilo 6, ailou makeek kilo 3, tefu kaboomenik kilo 3, ma ai kaboomenik kilo 6.

²⁴ Tai basa-basas nenik tatais fo nanapakek nai Au Lalaa Temang-nga. Tama seluk mina setun litel 4 neu,

²⁵ ma tao mina feta, fo sese'dok-kana sama leo mina kaboomenik-ka.

²⁶ Pake minan-nanasese'dok ndia soaneu lose neu Au Lalaa Temang-nga, Peti Hehelu-balataak-ka,

²⁷ mei no basa hata-heton lala'en-na, banu eik-ka no hata-heton, mei tunu-hotuk soaneu tunu boomenik-ka,

²⁸ mei tunu-hotuk soaneu tutunu-hohotuk nanatunuk-ka no basa hata-heton lala'en-na, ma baak oe no buin-na.

²⁹ No enok ndia, o muse fe hehelik buas sila-la leo Au mai, fo ela basa-basan lala'en-na da'di malalao-malalafuk. Su'di beek fo la'e mei tunu-hotuk ndia, muse fen leo Manetualain neu, ma su'di see fo ana koila'en, neukose ana hapu soe nanahu malalao-malalafun be'i balakain-na.

³⁰ Lose mina neu Harun no anan-nala boe, fo ela sila nanandoo eik da'di imam soaneu lalalau-laoono Au.

³¹ Mafa'da leoina Israel-la mae neme tititi-nonosik leo tititi-nonosik neu, mina feta ndia nanafe hehelik soaneu Au.

³² Ta bole po'a mina ndia neu hataholi biasa fa. Boso tao mina fe'ek no sese'dok matak leondiak-ka. Mina ndia malalao-malalafuk, de muse mamahelen da'dileo buas fo malalao-malalafuk.

³³ Hataholi fo ana tao mina matak leondiak-ka, do ana losen neu hataholi fo ta imam fa soona, Au anang ta ndia so'on.”

Boomenik

³⁴ Manetualain nafa'da Musa nae, “Ho'i-ma bumbu matak de'ubee bekedede'uk, fo nde: luu-luu daa, ai lou kaboomenik, ai kaboomenik-ka daan-na ma boomeni isik.

³⁵ Pake la'iesak ai sila-la soaneu tao boomeni nanasese'dok kaboomenik. Taom-masik neu fo ela boomenik ndia da'di boomeni isik nahele ma hapu paken soaneu Au.

^36-37 Muse ha'bo boomenik ndia seli losa lutuanak. Ho'i menin leo Au Lalaa Temang-nga neu fo nggalin neu Peti Hehelu-balataak-ka uluk. Muse mamahele boomenik ndia malalao-malalafuk fo nanafe hehelik soaneu Au. Boso tao boomenik nanasese'dok nenik ai matak leo sila-kala soaneu emi manuu.

³⁸ See tao kaboomenik sama-na leondiak soona, Au anang ta ndia fa.”