KELUARAN 29 - Susula Malalaok Hehelu Palak Ma Hehelu Beuk

Nakanenetek la'eneu Harun no anan-nala nana ndo eik da'dileo imam

¹ “Harun no anan-nala nana ndo ein-na leoiak, fo ela ala hapu lalalau-laoono Au da'dileo imam. Ho'u-ma sapi maneanak esa ma bi'ilopo mane dua ta lu'u la'ak fa.

² Ho'i ha'desopu neulauk fo kamen, tehu boso kamen no laluteik. Ho'i-ma ha'desopuk nanakamek ndia seli, fo tao loti nenik mina setun, ma seli boso pake mina, ma ha'desopu ela-ka, taon neu kokis fo lose mina neu.

³ Taon neu lepeneu esa dalek, fo tunu-hotu fen neu Au sama-sama no sapi manem-ma bi'ilopo manek-ka duak nanatunu-hotuk-kala.

⁴ Madenu Harun no anan-nala mai leo Au Lalaa Temang-nga lelesun-na mai, fo ala safe-saa aoinan-nala.

⁵ Pake papake imam ia-la neu Harun: ba'du, efod, ba'du manalu fo manapotiketu efod-ta, babaa fanak ma kalikee.

⁶ Pa'a fefeo langak neu langan-na, ma lolo'e lilopilas fo nanabalias nenik dodoki-dudulak ‘Nanahele hehelik soaneu Manetualain-na’, neu fefeo langak ndia.

⁷ Boema ho'i-ma mina feta fo po'an neu langan lain ma lose neu aon-na.

⁸ Basa ndia soona, madenu anan-nala mai fo pakes ba'du

⁹ ma kalikee, boema pa'a fefeo langak neu langan-nala. Harun no anan-nala ndo ein-na leondiak. Sila ma sila tititi-nonosin muse lalalau-laoono Au da'dileo imam losa dodoon-na.

¹⁰ Basa soona, o muse hela meni sapi mane ndia leo Au Lalaa Temang-nga matan-na neu. Harun no anan-nala muse lalaa liman-nala neu bana ndia langan lain.

¹¹ Do'do sapi mane ndia nai Au matang, fo nai Lalaa Temak lelesun-na.

¹² Ho'i-ma sapi ndia daan seli, fo lose menik o limaku'um-ma neu mei tunu-hotuk-ka susulan-nala. Daak fo bei elak ndia O muse po'an leo mei tunu-hotuk-ka dae neu.

¹³ Basa ndia soona, ho'i-ma mina teidalen-na, aten-na, boade'en duas loo minan-na, fo tao basa-basas neu mei tunu-hotuk lain fo tunus soaneu tutunu-hohotuk ba'eneu Au.

¹⁴ Sapi mane ndia paan-na, loun-na ma ganggaen-na, muse tunus nai mamana oofuk-ka deak. Ndia nde da'di tutunu-hohotuk soaneu basa imam-mala sala-singon hapu do'o do ampon.

¹⁵ Basa soona, ho'i-ma bi'ilopo manek-ka duak sila-la. Fo Harun no anan-nala muse lalaa liman-nala neu bana sila-langan lain.

¹⁶ Soona, do'do bana sila-la fo ho'i-ma daan-nala fo pisin neu mei tunu-hotuk-ka boboan haas.

¹⁷ Muse tete'te bi'ilopo ndia paan-na. Muse safe tei-aten ma sakibolon-na, fo taos leu langan lain boema neu bibia fe'ek-kala lain.

¹⁸ Tunu-hotu bi'ilopo mane ndia paan-na lala'en-na neu mei tunu-hotuk lain, soaneu da'di tutunu-hohotu nanatunuk. Tutunu-hohotuk ndia boon-na nandaa no Au daleng-nga.

¹⁹ Ho'i-ma bi'ilopo mane esa, fo nde bi'ilopo mane soaneu feta ndo eik-ka. Madenu Harun no anan-nala lalaa sila liman-nala neu bana ndia langan lain.

²⁰ Boema do'do bi'ilopo mane ndia, fo ho'i-ma daan faaanak fo losen neu Harun no anan-nala di'idoo konan-na, neu lima ku'uina konan ma ei ku'uina konan-nala. Daak fo bei elak ndia, muse pisin neu mei tunu-hotuk-ka boboan haas.

²¹ Ho'i-ma daak manai mei tunu-hotuk lain-na, faaanak ma mina feta fo pisin neu Harun no anan-nala, boema bua-lo'a papaken-nala. No enok ndia, Harun no anan-nala boema bua-lo'a papaken-nala nanahele hehelik ba'eneu Au.

²² Ho'i-ma bi'ilopo mane ndia minan-na, iko maminan-na, mina teidalen-na, aten-na, boade'en duas no minan-na, ma sakibolo konan-na.

²³ Ho'i-ma loti esa neme loti mata-matak-kala neme lepeneu loti fo nanatunu-hotu basak soaneu Au so: esa nanataok nenik mina setun, esa ta pake mina fa, ma kokis esa.

²⁴ Pe'da basa nana'ak sila-la neu Harun no anan-nala liman dale, fo madenus latu'dun neu Au da'dileo tunu-hotu natutu'duk.

²⁵ Boema ho'i-ma loti ndia neme sila liman dale mai, fo tunun nai mei tunu-hotuk lain, fo nai tutunu-hohotu nanatunuk ndia lain. Tutunu-hohotuk ndia boon-na nandaa no An daleng-nga.

²⁶ Ho'i-ma bi'ilopo mane ndia sosolon-na fo tunu-hotun soaneu da'di tutunu-hohotu natutu'duk ba'eneu Au. Fo o baba'em-ma nde ndia.

²⁷ Nai feta ndo eik imam-mala dalek, muse tunu-hotu bi'ilopo mane fo paken nai feta ndia, sosolon-na, ma sakibolon-na da'dileo tutunu-hohotu natutu'duk ba'eneu Au, de pe'da fe'en soaneu basa imam-mala.

²⁸ Au nakeketung fo ta hapu nggati fan-na nde ia: Nai lelek Au anang-ngala mai fo ala tunu-hotu tutunu-hohotu mole-dame soona, bana ndia sosolon-na no sakibolon-na nde been-na, basa imam-mala baba'en-na nde ndia. Au anang-ngala tutunu-hohotun soaneu Au-a, nde ndia.

²⁹ Harun bua-lo'a makaluku-makatelen muse fes leo anan-nala da'dileo bua-lo'a pusaka, fo ela ala hapu pake nai lelek sila nana ndo eik.

³⁰ Harun anan manada'di imam nggati aman-na, fo ana masok leo Au Lalaa Temang dale neu soaneu ana tao makaluku-makatele nai Kama Malalao-malafuk dale, muse ana pake bua-lo'as ndia, faik hitu dalen-na.

³¹ Ho'i-ma bi'ilopo mane paan-na fo nana pakek nai lelek Harun no anan-nala feta ndo ein-na dalek, fo nasu paa ndia nai mamanak esa malalao-malalafuk.

³² Sila muse la'a paa ndia nai Au Lalaa Temang-nga lelesun-na no bei ela loti manai lepeneu dale.

³³ Sila muse la'a nana'ak fo nanatunu-hotuk nai feta sala-singok hapu do'o do ampon nai fai ndo eik-ka. Ka'da imam-mala nde bole la'a nana'ak fo nanafe hehelik soaneu Au ndia.

³⁴ Metema losa balahaa fafaik te bei ela paa do loti, soona muse hotuheni nana'a elak sila-la, fo ta bole na'a fan, nanahu nanahele hehelik so.

³⁵ Harun no anan-nala feta ndo ein-na, muse taon faik-katemak 7 dalen-na, sama leo Au paleta basan neu o so.

³⁶ Tunga faik, muse tunu-hotu sapi mane esa soaneu sala-singok hapu do'o do ampon. No tutunu-hohotuk ndia, mei tunu-hotuk nanatao nalalao-nalalafuk. Boema o muse lose mina neu mei tunu-hotuk ndia nenik mina setun, fo ela nanafe hehelik soaneu Au.

³⁷ Tao leondiak tunga faik, nai faik hitu dalen-na. Soona mei tunu-hotuk-ka aoinan-na lala'en-na da'di malalao-malalafuk; su'di beek fo la'e mei tunu-hotuk ndia soona, muse fen neu Manetualain, ma su'di see fo ana koila'en soona, neukose ana hapu soe, nanahu mei tunu-hotuk ndia malalao-malalafun bei-balakain.”

Tutunu-hohotu tunga faik-ka

³⁸ “Tunga faik soaneu losa dodoon-na, muse tunu-hotu bi'ilopo dua teuk beke esak nai mei tunu-hotuk ndia lain.

³⁹ Esa soaneu tutunu-hohotu fafain-na, ma esak-ka soaneu tutunu-hohotu le'donoson-na.

⁴⁰ Bi'ilopo soaneu tutunu-hohotu fafain-na, muse tunu-hotun sama-sama no ha'desopu neulauk kilo 1, ma sese'dok-kana no mina setun isik litel 1. Fe'ek neme ndia mai boe, sese'dok-kana no angol litel 1.

⁴¹ Bi'ilopo soaneu tutunu-hohotu le'donoson-na, tutunu-hohotun muse sama no tutunu-hohotu fafain-na, fo sama-sama no ha'desopuk, mina setun ma angol. Tutunu-hohotu nanatunuk ndia boon-na, nandaa no Au daleng-nga.

⁴² Basa soona, soaneu tepo-lelek lala'en-na, tutunu-hohotuk nanatunuk ndia muse nanatunu-hotuk nai Au matang-nga, fo nai Au Lalaa Temang-nga lelesun-na. Nai ndia nde, neukose Au atongo o Au anang-ngala, ma Au kokolak o o.

⁴³ Nai ndia nde, neukose Au atongo o leoina Israel-la, ma Au ndela-sa'ang neukose taon-na mamanak ndia da'di malalao-malalafuk.

⁴⁴ Neukose Au tao-a Lalaa Temak ma mei tunu-hotuk ndia da'di malalao-malalafuk. Harun no anan-nala, neukose Au hele fe'es leme fe'ek-kala mai, fo ela lalau-laoono Au da'dileo imam.

⁴⁵ Neukose Au leo nai leoina Israel-la tala'da heon, fo da'di sila Manetualain.

⁴⁶ Neukose ala bubuluk lae Au nde Manetualain fo sila Manetualain-na fo mana no sila kalua leme Masir mai, fo ela Au hapu leo nai sila tala'daheon. Au nde sila Manetualain-na.”