KELUARAN 28 - Susula Malalaok Hehelu Palak Ma Hehelu Beuk

Imam-mala bua-papaken-na

¹ “Maloo-ma Harun fo o ka'am-ma no anan-nala, Nadab, Abihu, Eleazar ma Itamar fo hele hehelik-kasa fo ela lalalau-laoono Au da'dileo imam.

² Tao fe Harun bua-papake imam, fo daenga meten soona, ana da'di hataholi nanafe ha'da-holomata.

³ Maloo-ma basa hataholi fo Au fe basas malelak da'di manaseu-soo. Madenus fo ala seu Harun bua-papaken-na fo ela hele hehelin soaneu nalalau-naoono Au da'dileo imam.

⁴ Boeo madenus fo ala tao babaa fanak, efod, ba'du manalu, ba'du kabaek nanaseu-soo mana'a hiik, tema fefeo langak ma kalikee. Ala muse tao bua-papake imam ndia soaneu o ka'am Harum no anan-nala fo ela ala hapu lalalau-laoono Au da'di leo imam.

^5-6 Ala muse tenu bua-papakek ndia neme tema kabelik momo'dok, pilabalanggeok ma pilas, aba lilopilas ma tema abalutu. Fe'ek neme ndia mai, muse nanabalias efod-ta nenik seseu-sosoo mana'ahiik.

⁷ Efod-ta tali alun duas, muse seun da'di esa no efod-ta.

⁸ Muse seu kalikee nanatenuk neme abas matak esa mai neu efod ndia, fo ela ala da'di esa.

^9-12 Ho'i-ma batu poemata dula pilas 2. Sanga hataholi manatutu malelak lilopilas esa, fo ana dokik Yakob ana ka sanahuluduan-nala na'den-na tunga esa-esak teun neu batu ndia, fo na'dek 6 soona, dokik-kana neu batu 1. Boema batu poemata ka duak sila-la muse seun neu efod-ta su'udoo lilopilan dale, fo taon neu efod ndia talin duas, fo ana da'di ta'du-tanan-nasanene'dak neu Israel leo ka sanahuluduan-nala. No enok ndia, Harun lulu'ak sila na'den-nala nai alun lain, nalosa Au, Manetualain, afandendelek tataasesa neus.

¹³ Fe'ek neme su'udoo lilopilak-ka duan sila-la mai,

¹⁴ muse taom-ma namosina dua neme lilopilas isik-ka mai boe, fo tatalin sama leo tali-a, soaneu taon neu su'udoo lilopilas ndia.”

Babaa fanak

¹⁵ “Tao fe Imam Matuaina babaa fanak esasoaneu ana pake nai lelek anan nau bubuluk Manetualain hihii-nanaun. Babaa fanak ndia aban-na ma seseu-sosoon muse sama no efod aban-na ma seseu-sosoon.

¹⁶ Taom-man balakak ma diku duak-kana fo loloa-nanalun senti beke 22.

¹⁷ Tao batu poemata dalak 4 neu babaa fanak ndia. Nai dalak makasososak-ka tao batu poemata dula pilas, batu kabelik dula kunik, batu poemata dula fulak.

¹⁸ Nai dalak ka dua, tao batu poemata dula momo'dok, batu poemata dula balau ma batu poemata dula fula-momo'dok.

¹⁹ Nai dalak ka telu, tao batu poemata dula balau, batu poemata dula pilas, ma batu poemata dula pilabalanggeok.

²⁰ Nai dalak ka 4, tao batu poemata dula momo'do-balau, batu poemata dula momo'dok ma batu poemata dula kuni-mangadilak. Muse pa'a batu poemata ka 12 sila-la nenik lilopilas.

²¹ Nai batu poemata esa soona, muse dokik Yakob ana ka sanahulu duan-nala esa na'den-na da'dileo ta'du-tanan-nasanene'dak neu leo-leo Israel-la.

²² Taom-ma namosina dua neme lilopilas isik-ka mai fo tatalin sama leo tali-a fo taon neu babaa fanak ndia.

²³ Taom-ma suek lilopilas dua boe, fo taon neu babaa fanak ndia pe'da ka duan manai lain-na,

²⁴ boema tao namosina lilopilas ka duak sila-la leo suek-kala dalek neu.

²⁵ Namosina ndia pe'da kaduan fo bei elak-kala, muse pa'as neu su'udoon duas, fo ela babaa fanak ndia hapu natutik no efod tali alun manai uluk-ka.

²⁶ Taom-ma suek lilopilas 2 seluk, fo taon neu babaa fanak ndia pe'dan dae, pe'dan fo manala'e efod-ta dalek.

²⁷ Basa ndia soona, taom-ma suek lilopilas 2 seluk, fo taon neu efod tali alun duas uluk deka no tututin-na leo dae neu faaanak, fo nai kalikee abalutu-a lain.

²⁸ Babaa fanak-ka suen-na muse nanatutik nenik tali balau neu suek manai efod, fo ela babaa fanak ndia nahele neme kalikee lain fo ta ngga heni faan.

²⁹ Nai lelek Harun masok leo mamana malalao-malalafuk dale neu, ana muse neni leo-leo Israel-la na'den-nala fo nanadokik nai babaa fanan-na, fo ela Au, Manetualain, afandendelek Au anang-ngala tataasesa.

³⁰ Tao Urim ma Tumim leo babaa fanak ndia dalek neu fo Harun paken metema nasasale matak no Au. Nai li'u sama leo ndiak-ka, ana muse pake babaa fanak tataasesa, fo ela ana hapu bubuluk Au hihii-nanaung soaneu hataholi Israel-la.”

Bua papake fe'ek soaneu imam

³¹ “Ba'du manalu fo paken nai efod lain, muse basa-basan lala'en-na nanataok neme temak kabelik balau.

³² Taom-matea ba'du lesuha'in-na nenik temak nanatenuk fo ela boso siba'en lai-lai.

^33-34 Su'udoo daen-na, muse balias okofefeon nenik dalima boak fo tenun neme temak kabelik balau, pilabalanggeok ma pilas, fo tata'dan nenik kileik lilopilas.

³⁵ Harun muse pake ba'du manalu ndia, metema nakalala'ok bela-ba'un da'dileo imam. Nai lelek ana mai leo Au matang nai Kama Malalao-malalafuk dale, do ana la'oela mamanak ndia soona, lamanene kileik sila-la liin-na, fo daenga boso maten.

³⁶ Taom-ma bunga esa neme lilopila isik-ka mai, fo doki-dulak dede'ak-ka nde ia nae, ‘Nanahele hehelik soaneu Manetualain’.

³⁷ Pa'a buas ndia neu temak papa'a langak-ka nenik tali balau.

³⁸ Harun muse pa'a bunga lilopilas isik ndia neu dedein-na, fo ela Au, Manetualain, nau sipo basa tutunu-hohotuk fo hataholi Israel-la leni fen neu Au, leomae nai leni tutunu-hohotuk sila-la dalek, ala tao basa salak so.

³⁹ Harun ba'dun-na, muse nanatenuk neme temak abalutu mai. Taom-ma fefeo langak esa boe neme temak abalutu mai, ma kalikee nanaseu-sook esa.

⁴⁰ Tao fe Harun anan-nala ba'du, kalikee ma fefeo langak, fo ela metes soona, ala da'di hataholi nanafe ha'da-holomata.

⁴¹ Pake bua papakek ndia neu o ka'am Harun no anan-nala. Lose mina setun neus; fo no enok ndia, sila nana ndo eik ma nanahele hehelik soaneu lalalau-laoono Au da'dileo imam.

⁴² Boema tao fes lopo ei keke'uk neme temak abalutu mai, nanalun-na neme tala'dan-na losa puun-na, soaneu potiketu sila aopaan fo ta nandaa hataholi nita fan.

⁴³ Sila muse pake lopo ndia tataasesa, nai lelek ala masok leo Au Lalaa Temang dale leu, do leu deka loo mei tunu-hotuk-ka soaneu ala tao makaluku-makatele da'dileo imam nai Kama Malalao-malalafuk dale, fo ela boso mates, nanahu hataholi nita sila aopaan fo ta nandaa hataholi nita fan. Nakanenetek ndia, da'di nahele soaneu Harun no tititi-nonosin.”