KELUARAN 21 - Susula Malalaok Hehelu Palak Ma Hehelu Beuk

Nakanenetek la'eneu ata Ibrani-la

¹ Boema Manetualain nafa'da Musa nae, “Fe hataholi Israel-la nakanenetek-kala nde ia:

² Metema emi asa-ma, ata esa neme emi leoinam-ma mai soona, muse naue-nale'di fe emi teuk nee dalen-na. Nai teu ka hitun-na dalek, emi muse po'in, ma ta paluu ana bae hata esa boen.

³ Metema ana mai ndia mesak-kana, soona ana kalua boeo mesak-kana; tehu nai lelek ana da'di emi atam ndia masaoinak soona, saoinan ndia bole tunga non.

⁴ Metema atan ndia tuan-na, ana fen sao inak esa, boema ana hapu anak, soona saoinan-na, ma anan ndia nde been-na, tuan-na nuun, de nai lelek ata ndia nanasoi-po'ik-ka, ana ta bole tunga no ata ndia fa.

⁵ Tehu metema, ata ndia nafa'da nae ana sue nahele saon-na, anan-nala, ma tuan-na, boema ana nau da'di ata nahele,

⁶ soona tuan-na muse noon leo mamana makaluku-makatele-a neu. Losa naa soona, ladenu ata ndia napadeik nasala'da mamana makaluku-makatele-a lelesun-na do dii lelesu-a, fo tuan-na so'bo ata ndia di'idoon-na. Soona ata ndia, neukose ana da'di tuan-na atan losa dodoon-na.

⁷ Metema inak Ibrani esa, aman nase'on, fo ana da'di ata soona, leomae basa teu ka neek-ka boeo, ta bole po'i fan, da'di ta sama leo ata touk-ka fa.

⁸ Metema tuan-na, dalen-na ta nahiik sao inak ndia fa, soona muse nase'o falik-kana leo ina-aman neu. Ta bole nase'o inak ndia leo hataholi nusa dea neu fa, nana tuan fo ana ta tao natetu hala hehelun ndia fa, ana tao inak ndia, ta no ndoos ma matetuk fa.

⁹ Metema hataholi esa, ana asa-na ata inak ndia, de ana fen leo anan-na neu, fo ana taon da'di saoinan soona, muse tao ata inak ndia, sama leo ndia ana bongin.

¹⁰ Metema anatouk ndia sao seluk soona, ana fe nahele inak ndia nana'a-nininuk, ma bua-lo'as papake-ngganggaok, boema inak ndia haak-ka, sama leo biasa ana fen neu saoina makasososan-na.

¹¹ Metema ana ta tao natetu basa dede'ak sila-la fa soona, muse ana po'i inak ndia, no ana ta hapu doi sosoi-tetefak fa.”

Nakanenetek la'eneu tutu-fepak ma kanisak.

¹² “See fepa hataholi fe'ek losa maten soona, muse hukunisan.

¹³ Tehu metema ta name'da fa, te ana fepan, do ana ta dudu'a soaneu nanisa fa soona, ana bole nalai leo mamanak esa neu, fo neukose Au atu'du mamanak ndia neu emi, fo ana hapu nasulu-nahapak nai naa.

¹⁴ Tehu metema hataholi esa daak-ka sa'en, fo ta name'da fa, te ana taonisa hataholi fe'ek, de basa boema, nalai leo Au mei tunu-hotung-nga neu, fo ana hapu nasulu-nahapak soona, muse hela heni hataholi ndia neme mei tunu-hotuk-ka mai, fo hukunisan.

¹⁵ See fepa-li'u aman do inan soona, muse hukunisan.

¹⁶ See noo neok hataholi esa soona, muse hukunisan, leomae fafa'kama hataholi ndia nananase'ok so, do bei nai uman.

¹⁷ See supa-soo aman do inan soona, muse hukunisan.

¹⁸ Metema nai nahotek esa dalek, hataholi esa tutu hataholi fe'ek nenik batu, do ana tutun nenik liman-na, tehu ana ta taonisa fan soona, neukose ta huku fan. Metema hataholi nanatutuk ndia namahe'di, losa muse nangape'uk nai pepe'uk lain, hu kande tututuk ndia,

¹⁹ tehu basa boema, ana pake aitete'ek de ana bisa fo'a, fo ana la'ok soona, hataholi manatutun-nana, muse puli-namo'don losa ana lea-hai, ma ana nggati hataholi ndia kalua tali-doin, nai lelek namahe'di-a.

²⁰ See fepa-li'u ata toun, do ata inan-na, losa ata ndia maten tu'tik soona, muse hukun.

²¹ Tehu metema, ta mate ata ndia, nai faik esa do dua dalen-na fa soona, ta huku tuan ndia fa. Nana ana kalua tali-doin hu kande atan ndia he'di-laun, de ndia nalupa huhukuk ba'eneun so.

²² Metema touk de'ubee lahote, de esa tutu la'e ina kailus esa, nalosa ana kalaheni, tehu aoinan-na ta name'da he'dis fa, soona muse fe hataholi ndia nahuta, nandaa no inak ndia saotoun-na nonoken-na, ma muse tunga manakee-manafula nakeketun-na.

²³ Tehu metema inak ndia nakahina belak, soona huhukuk soaneu tatao-nono'i mangalauk ndia nde been-na, samanek nggati samanek,

²⁴ matak nggati matak, nisik nggati nisik, limak nggati limak, eik nggati eik,

²⁵ hinak nggati hinak, hina ha'i na'ak nggati hina ha'i na'ak, peta-paek nggati peta-paek.

²⁶ See fepa atan-na matan-na losa poken soona, muse fe falik ata ndia da'di leo soi-tefak soaneu matan-na.

²⁷ Metema hataholi esa fepa atan-na, losa la'di nisin-na soona, muse fe falik ata ndia da'di leo soi-tefak soaneu nisin ndia.”

Hataholi manuu-mahatak-ka lulu'a-lelepan

²⁸ “Metema sapi mane esa, ana foi hataholi esa losa maten soona, muse tapanisa sapi ndia nenik batu, ma ta bole na'a paan-na fa, tehu ta huku hataholi masapik-ka fa.

²⁹ Metema sapi mane ndia, biasa nafoi, de masapik-ka nanafe nasanene'dak so, tehu ta nanea sapi ndia fa, boema sapi ndia foi hataholi esa losa maten, soona muse tapanisa bana ndia nenik batu, ma muse hukunisa masapik-ka.

³⁰ Tehu metema fe masapik ndia loak, fo ana bae soona, ana muse baen, nandaa no nakeketuk-ka, fo ana soi-na samanen-na.

³¹ Metema nanafoenisak ndia ni'iana touanak, do ni'iana inaanak esa soona, nakanenetek ndia, la'e manoosapik-ka boe.

³² Metema nanafoenisak ndia ata touk do ata inak soona, masapik-ka muse bae doi fulak teluhulu leo ata ndia tuan-na neu, ma muse tapa sapi mane ndia nenik batu, losa maten.

³³ See ho'in-na oedolu esa tatanan-na, do ana kali oedolu te ana ta tatana fan, boema sapi mane esa, do keledei tu'da leo dalek neu,

³⁴ soona oedolu ndia lamatuan-na, muse bae leo bana ndia lamatuan-na neu, tehu ndia bole soa bana manamatek ndia.

³⁵ Metema hataholi esa, sapi manen-na foenisa hataholi fe'ek sapin soona, sapi lamatua ka duak-kala, muse lase'o bana fo bei maso'dak ndia, fo laba'e doin-na. Ala muse laba'e bana manamatek ndia paan-na boe.

³⁶ Tehu ala bubuluk lae sapi mane ndia, biasa nafoi, te sapi lamatuak ta nanea fan soona, ana muse nggatin nenik sapi mane maso'dak esa, ma ndia bole soa sapi manamatek ndia.”