KELUARAN 19 - Susula Malalaok Hehelu Palak Ma Hehelu Beuk

Hataholi Israel-la lai Letek Sinai

^1-2 Basa ndia boema, leoina Israel-la la'oela Rafidim, fo nai lelek ala la'o ela Masir nai hataholi Yahudi-la bula ka telun-na, fain esa, boema ala losa moo solokaek Sinai. Ala ofu leme Letek Sinai huun-na,

³ de Musa kae leo letek ndia lain neu, fo natongo no Manetualain. Manetualain kokolak no Musa neme letek ndia lain mai, de nadenun fo ana po'a-benga Yakob tititi-nonosin neu hataholi Israel-la,

⁴ nae, “Emi mita basa hata fo Au tao-no'in neu hataholi Masir-ra, ma tao leo beek de Au oo emi leo Au mai, nai mamanak ia no koasa matuaina, sama leo manupui kaka'ka no anan-na nai li'dan lain.

⁵ Besak ia, metema emi tunga Au, ma lilineka neu Au hehelu-balataang soona, neukose Au tao emi da'di Au anang mesang. Daebafak-ka lala'en-na nde been-na Au nuung, tehu neukose emi da'di Au ana susue-lalaing,

⁶ hehelik soaneu Au mesang-nga, ma neukose emi malalau-maoono Au da'di leo imam-imam.”

⁷ Boema Musa kona neme letek lain mai, de naloo basa mauli-malangan-nala, fo ela lakabubua, boema ana tuis basa hata lala'en fo Manetualain paleta neun.

^8-9 Basa-basas lataa landaa lae, “Ami nau tao basa hata lala'en fo Manetualain nafa'dan,” de Musa nanduku-nalosak hala natataak ndia neu Manetualain. Boema Manetualain nafa'da Musa nae, “Neukose Au mai leo o mai, nai ko'as makate dale; neukose hataholi-la lamanene Au kokolak o o, de mulai hatematak ndia, neukose lamahele o tataas esa.

¹⁰ Besak ia, muu matongo moo hataholi sila-la, ma madenus fo faik ia, ma balahaa laheheleaon, soaneu makaluku-makatele. Ala muse safe-saa bua papaken-nala.

¹¹ Binesak te, sila muse laheheleaon basa so. Nai faik ndia, neukose Au kona leo Letek Sinai lain u, nai mamanak fo nai bee, basa hataholi-la bisa lita Au.

¹² Tao ta'du okofefeok letek ia, da'di leo too-lane, fo leoina ndia, ta bole lena fan. Ka'i leoina ndia, fo ala boso kae leo letek lain mai, lena-lenak ala boso deka letek ndia. Ba'eneu see, fo ana lena dae too-a soona, neukose nanahuku nisak;

¹³ muse pia hataholi ndia nenik batu, do koun, ma ta bole koila'e fan. Paleta ia la'e, nau soaneu hataholi do soaneu bana-manu boe; basa hata lala'en fo manalena dae too ndia, muse nanahuku nisak. Nai lelek pupuuk-ka nalii naladook-ka soona, hataholi sila-la muse nda'e letek-ka.”

^14-15 Basa boema, Musa kona neme letek lain mai, de nadenu hataholi sila-la laheheleaon, soaneu makaluku-makatele. Nafa'da nae, “Binesak soona, emi muse maheheleaom, ma besak ia, saotouk saoinak, ta bole sungu lakabubua fa.” Boema leoina ndia, mulai laheheleaon, ma ala safe-saa sila bua papaken-nala.

¹⁶ Nai fai ka telun-na fafaik boema, mangguluk-ka no ta'tas-sa da'di. Ko'a makateina ana da'di nai letek lain, ma lamanene pupuuk-ka liin-na, tanen-na seli. Basa hataholi manai ofu dale-la ala bii, de ala dele beengge'be.

¹⁷ Musa noos kalua, fo leu latongo loo Manetualain, boema lapadeik lai letek ndia huun-na.

¹⁸ Ha'imasuk-ka potin-na la'iesak letek ndia, nanahu Manetualain kona nai letek lain, nai ha'i dale. Ha'imasuk ndia masu-masu, sama leo ha'imasuk-ka namasu neme la'o dale mai, de letek ndia nanggengo matuaina nanseli.

¹⁹ Pupuuk-ka liin-na boetai napane'ek. Musa kokolak, ma Manetualain nataa nenik mangguluk-ka.

²⁰ Manetualain kona nai Letek Sinai poin-na, de naloo Musa, fo neu leo letek ndia poin-na neu. Boema Musa kae neu,

²¹ de Manetualain nafa'dan nae, “Kona leona, fo fe hataholi sila-la nasanene'dak, mae ala ta bole lena dae too-a, fo ala mai mete Au. Metema, ka'da ala lenan soona, neukose mate sila ba'uk-ka.

²² Nakalenak, imam-imam fo ala nau mai deka loo Au-a, muse ala tao lalalao-lalalafu aoinan-nala; metema ta soona, neukose Au hukus.”

²³ Musa nafa'da Manetualain nae, “Hataholi ia-la, ta hapu kae leo lain mai fa, nana O fe ami paleta, fo ami mamahele letek ia nde been-na, mamanak malalao-malalafuk, ma taoafik neu too manaokofefeon-na letek-ka.”

²⁴ Manetualain nataa nae, “Kona leona, fo basa soona, fali ma'im-ma leo ia mai, sama-sama moo Harun. Tehu imam-imam-mala, ma laun-na ta bole lena dae too-a, fo ala mai leo Au mai fa. Metema, ala lenan soona, neukose Au hukus.”

²⁵ Boema Musa kona, de neu natongo no leoina ndia, de nanduku-nalosak Manetualain hala hehelun-na neus.