KELUARAN 16 - Susula Malalaok Hehelu Palak Ma Hehelu Beuk

Kokis manna ma manupui kukuhaak

¹ Boema, basa hataholi Israel-la, ala la'o leme Elim mai, de nai lelek ala la'oela Masir neu hataholi Yahudi-la bula ka dua-na fain sanahulu lima, boema ala losa moo solokaek Sin-na, fo nai Elim ma Letek Sinai tala'da.

² Nai moo solokaek ndia, basa-basas lakamuu-muu Musa ma Harun.

³ Lafa'da lae, “Malole lenak, leouni'ka Manetualain taonisa ami neme Masir so. Nai naa, ami mangatuuk, fo ami mi'a paa ma loti, losa ami makabete. Tehu emi moo ami leo ia mai, fo ela ami basa-basam-mala, mate no la'as-sa.”

⁴ Manetualain nafa'da Musa nae, “Besak ia, neukose Au akona fe emi basa-basam-mala, nana'a-nininuk sasikao-kao, sama leo u'dan-na. Tunga faik, emi muse hele nana'ak sila-la dadaik faik esa dalen-na. No enok ndia, Au nau so'ba su'dik Au anang-ngala, ade ala tunga Au paletang-ngala do ta.

⁵ Neu faik ka 6-na soona, emi muse hele nana'ak sila-la, dede'un-na diku la'i dua.”

⁶ Boema, Musa ma Harun lafa'da basa hataholi Israel-la lae, “Le'donosok ia, neukose emi bubuluk, mae Manetualain nde no emi kalua meme Masir mai.

⁷ Balahaa fafaik soona, neukose emi mita Manetualain mandela-masa'an. Manetualain namanene emi makamuu-muun; nana ami ia, ka'da tao hata fo Ana paletan.

⁸ Neukose, Manetualain fe emi paa nai fai le'donoson-na, ma ko'kis nai fai fafain-na, fo emi mi'a losa emi makabete, nanahu Manetualain namanene basa emi makamuu-muun so. Te'e-te'e, metema emi mamanasa ami soona, emi mamanasa Manetualain.”

⁹ Basa boema, Musa nafa'da Harun nae, “Madenu basa-basas mai lataa Manetualain, nana namanene basa sila nakamuu-muun-na so.”

¹⁰ Lelek Harun bei kola-kola no basa-basas te, ala mete leo moo solokaek-ka neu, de no kaiboik, lita Manetualain ndela-sa'an nai ko'as dale.

¹¹ Boema, Manetualain nafa'da Musa nae,

¹² “Au amanene basa hataholi Israel-la nakamuu-muun-na so. Mafa'das mae, ‘Nai fai le'donoson-na, ala hapu la'a paa, ma nai fai fafain-na, ala hapu la'a loti losa lakabete.’ Soona neukose ala bubuluk, lae Au nde Manetualain, fo sila Manetualain-na.”

¹³ Nai fai le'donoson-na soona, manupui kukuhaak makadotok nanseli, ala mai, nalosa henu la'iesak mamana oofuk-ka, ma nai fai fafain-na soona, dinis-sa mai, fo ana okofefeon-na mamana oofuk-ka.

¹⁴ Lelek dinis ndia, sanga nae mopon soona, hata esa ni'ianak, nananitak nai moo solokaek lain, sama leo hata esa sopuanak, ma mangana'uk nalupa leo ha'desopuk-ka.

¹⁵ Lelek hataholi Israel-la litan, tehu ta lalelak beek ndia fa. Boema esa natane esa nae, “Beek ndia?” Boema Musa nafa'das nae, “Manetualain, Ana fe emi nana'ak-ka, nde ndia.

¹⁶ Manetualain fe paleta, fo ela esan-na helen-na de'u ndia paluun-na, fo nde umaisi esa soona, fafa'kama kilo dua.”

¹⁷ Hataholi Israel-la tao tungan leondiak; tehu hapu nggelok, ala hele lenak neme kilo dua mai, ma nggelok soona, ala hele-la, ta dai kilo dua fa.

¹⁸ Lelek ala uku-dou, boema ala bubuluk, lae hataholi manahele-na ba'uk-ka, ta lenak fa, ma manahele-na faa anak-ka, ta kulang fa. Esa-na hele-na, de'u ndia paluun-na

¹⁹ Musa nafa'das nae, “Su'di see boe, ta bole pe'da nana'ak ndia, faa anak boen, losa balahaa fa.”

²⁰ Tehu sila de'ubee, ta taoafik neu Musa hala kokolan ndia fa. De ala pe'da nana'ak ndia nggelok boe. Balahaa te, nana'ak ndia ulek-kala, ma naboo pulu so; boema Musa namanasas nanseli.

²¹ Tunga-tunga fafain-na, ala hele nana'ak ndia, de'u sila paluun-na, ma metema le'do-a mulai nahaa soona, nana'a elak manai dae lain ndia, noehenin fo ana faa.

²² Neu fai ka neen-na soona, ala hele nana'ak ndia, dede'un-na diku la'i dua, fo nde hataholi esa soona, fafa'kama kilo haa. Basa sila mane leon-nala mai, de leu lafa'da dede'ak ndia neu Musa.

²³ Musa nafa'das nae, “Manetualain paletan-na nde ia nae: Balahaa nde been-na, fai hehelik soaneu hahaeaok, fai Sabat, faik fo fen neu Manetualain. Hata fo emi nau tunu-dalan nai faik ia soona, tunu-dalan leona, ma hata fo emi nau tunu-nasun soona, tunu-nasun leona. Metema emi paluun nai faik ia dalen-na hapu lenak soona, pe'da fe'en soaneu balahaa.”

²⁴ Da'di, nana'a lenak sila-la, ala pe'dan soaneu balahaa, sama leo Musa paletan-na; nana'ak ndia ta naboo fa, ma ulek ta.

²⁵ Musa nafa'da nae, “Emi nana'am soaneu faik ia, nde ndia, nana faik ia nde been-na, fai Sabat, fai hahaeaok soaneu fe ha'da-holomata neu Manetualain, de neukose, emi ta hapu nana'ak ndia faa anak boen, nai mamana oofuk-ka deak fa.

²⁶ Faik nee dalen-na, emi muse hele nana'ak, tehu fai ka hitun-na nde been-na, fai hahaeaok, de ta hapu nana'ak kona mai, nai faik ndia dalen-na fa.”

²⁷ Neu fai ka hitun-na, hataholi Israel de'ubee, leu hele nana'ak, tehu ala ta hapu hata esa boen.

²⁸ Boema, Manetualain, nafa'da Musa nae, “Emi ta nau tunga Au paletang-ngala losa faihi'da?

²⁹ Mafandendelek, te Au fe emi faik esa soaneu hahaeaom-mala. Hu ndia de, neu fai ka 6-na, Au fe emi nana'ak dai, soaneu faik dua dalen-na. Neu fai ka hitun-na, hataholi-la esa-esak, muse nahele nai uma, fo ta bole kalua fa.”

³⁰ Hu ndia de, nai fai ka hitun-na, ala ta tao bela-ba'uk fa.

³¹ Hataholi Israel-la loke nana'ak ndia soona lae, manna Lupan-na, sama leo aide'e lutuanak dula fula, ma la'dan-na, sama leo kokis nanasese'dok fanioe.

³² Musa nae, “Manetualain nadenu ita, fo ata ho'i-tala manna, fafa'kama kilo dua, fo ata pe'dan soaneu ita tititi-nonosin, fo ela ala lita nana'ak fo Manetualain fen neu ita nai moo solokaek-ka, nai lelek no ita kalua teme Masir mai.”

³³ Musa nafa'da Harun nae, “Ho'i-ma uledae esa, fo tao manna fafa'kama kilo dua leo dalek neu, fo makatetenen neu Manetualain matan-na, fo ata pe'dan soaneu ita tititi-nonosin.”

³⁴ Boema Harun nakatetene uledae ndia neu Peti Hehelu-balataak-ka matan-na, fo ala pe'dan, nandaa no Manetualain, paletan-na neu Musa.

³⁵ Manna ndia, da'di hataholi Israel-la nana'an-na, nai teuk haahulu manamaik-ka, losa ala losa dae Kanaan, fo mamanak ala leo latea-lahele. (

³⁶ Tatais fo hataholi-a biasa paken nai tepo-lelek ndia, isi-na, fafa'kama kilo duahulu.)