KEJADIAN 9 - Susula Malalaok Hehelu Palak Ma Hehelu Beuk

Manetualain tao hehelu-balataak no Noh

¹ Manetualain ba'e-pala Noh no anan-nala, boema nae, “Bongi upu-anak makadotok, fo ela emi tititi-nonosim, leo lahenu daebafak-ka lala'en-na.

² Basa manupui-la, ma i'ak-kala, boema bana fe'e-fe'ek lala'en-na, neukose ala bii-lamata'u neu o. Basa-basas lai o koasam-ma dalek.

³ Basa sila lala'en-na, bole da'di o nana'am-ma, fo nde bubu'u-palusa momo'dok-kala boe; Au fe o basa sila-la, fo ala da'di neu o nana'am-ma.

⁴ Ka'da esa mesak-kana, nde o ta bole mu'a fan, fo nde paa bei madaak-ka, nana ani hahaek ndia, nai daak dale.

⁵ Ba'eneu hataholi, ma bana, metema ala taolisa hataholi soona, neukose Au hukuisan.

⁶ Hataholi daebafak-ka, nananakadada'dik sama leo Au; hu ndia de, ba'eneu see, fo ana taonisa hataholi soona, neukose hataholi taonisa hataholi ndia boe.

⁷ Hei, emi muse bongi upu-anak makadotok, fo ela emi tititi-nonosim-mala, ala leo lahenu daebafak-ka lala'en-na.”

⁸ Manetualain nafa'da Noh no anan-nala nae,

⁹ “Besak ia, Au tao hehelu-balataak no o, ma no o tititi-nonosim,

¹⁰ ma no basa mahahae maso'dak fo kaso'dak lala'en-na, fo nde manupui-la ma basa bana manai ma'dak lain-na, hei, basa hata fo manakalua sama-sama loo emi, neme ofak ndia dalek mai.

¹¹ Au hehelu-balataang no emi-a, nde ia nae; Au aheluk, ae basa mahahae maso'dak, fo kaso'dak-kala, neukose faa tuak-ka, ta tao namopo-namates so'on. Neukose, ta hapu seluk faa tuak, fo ana tao namopo-namate daebafak ia so'on.

¹² Da'di leo ta'du-tana neu hehelu-balataak, fo manaketu basa taak, fo Au taon no emi, ma no basa mahahae maso'dak, fo kaso'dak-kala,

¹³ de Au tao elus-sa nai ko'as-sa, fo da'di leo ta'du-tana neu Au hehelu-balataang no daebafak-ka.

¹⁴ Nai lelek, fo metema Au poti ketu lalai-a nenik ko'as, boema elus ndia da'di soona,

¹⁵ neukose Au afandele Au hehelu-balataang neu emi, ma neu basa mahahae maso'dak, fo kaso'dak-kala, fo nde nae faa tuak-ka, neukose, ta tao namopo-namate basa hata maso'dak lala'en-na so'on.

¹⁶ Neu faik bee, fo elus-sa da'di nai ko'as-sa soona, neukose Au itan ma afandele Au hehelu-balataang fo manaketu-basa taak ndia, no basa mahahae maso'dak, fo laso'da nai daebafak-ka.

¹⁷ Elus ndia, ana da'di ta'du-tana neu Au hehelu-balataang, fo Au fen neu basa mahahae maso'dak, fo laso'da nai daebafak-ka.”

Noh, ma anan-nala

¹⁸ Noh anan fo, manakalua leme ofak ndia dalek mai-a nde, Sem, Ham ma Yafet. (Ham nde been-na Kanaan aman nde ndia.)

¹⁹ Basa hataholi manai daebafak-ka, bei-ba'i kain nde Noh ana ka telu sila-la.

²⁰ Noh hataholi manatao tina-osi esa, de ndia nde makasososa, tao osi angol-la.

²¹ Lelek Noh ninu angol boema, ana mafuk. Ana po'iheni bua-lo'a papaken-na lala'en-na, de ana sungu no makaholak, nai lalaa teman dale.

²² Lelek Ham, fo nde Kanaan aman ndia, nita aman nakahola-la boema, ana leo deak neu, de nafa'da manada'dik ndia neu tolanoon duas.

²³ Basa boema, Sem ma Yafet ho'i-la ba'du manalu esa, de lakapepelan neu duas alun lain. Ala la'ok lasadedea-la leo lalaa temak ndia dalek leu, de ala popoti-papalu aman nenik ba'du manalu ndia. Ala mete leo fe'ek leu, fo ela ala boso lita sila aman nakaholan ndia.

²⁴ Lelek fo Noh langan-na lea, de ana bubulu hata fo, ana mate'a tei su'un-na taon soaneu ndia boema,

²⁵ nafa'da nae, “Kanaan nanasoo-supak! Neukose, ana da'di ata nakamumulu-nakamamaek nanseli, ba'eneu tolanoon-nala.

²⁶ Koa-kio Amak, fo Sem Manetualain-na! Neukose, Kanaan da'di Sem atan-na.

²⁷ Sa'di leo been-na, Manetualain popo-tama seluk baba'e-papalak neu Yafet nenik tao namaloa mamana leleon-na. Sa'di leo been-na, tititi-nonosin leo sama-sama loo Sem tititi-nonosin. Neukose, Kanaan da'di ata neu Yafet.”

²⁸ Basa faa tuak ndia, te Noh bei naso'da teuk natun telu limahulu seluk.

²⁹ Maten nai teun natun sio limahulu.