KEJADIAN 48 - Susula Malalaok Hehelu Palak Ma Hehelu Beuk

Yakob fe baba'e-papalak neu Efraim ma Manasye

¹ Basa ndia boema, hataholi nafa'da Yusuf nae aman namahe'di belak. Da'di no ana duas fo nde Manasye ma Efraim leu donge-dama Yakob.

² Lelek Yakob namanene lae Yusuf mai boema, naheheleaon, boema nangatuuk nai pepe'un lain.

³ Yakob nafa'da Yusuf nae, “Manetualain Fo Manakoasa, natu'du aoinan-na neu au neme Lus, nai dae Kanaan-na de Ana fe baba'e-papalak neu au so.”

⁴ Ana nafa'da au nae, “Neukose Au fe o upu-anak makadotok, fo ela o tititi-nonosim da'di leoina ba'uk ka; neukose Au fe nusak ia neu o tititi-nonosim da'di leo sila pusakan losa dodoon-na.”

⁵ Yakob kokolak nakandoon-nae, “Yusuf, o ana ka dua mala Efraim ma Manasye fo bongis lai Masir ia te au beita losa ia fa, au sipok kasa sama leo Ruben ma Simeon.

⁶ Metema o hapu bongi seluk anak soona, neukose au ta sipok kasa da'dileo au anang fa tehu o anam; Sila baba'en-na, neukose ala sipon neme Efraim ma Manasye mai.

⁷ Au tao dede'ak ndia soaneu Rahel fo o inam. Nai au leleo-lala'ong fo fali eme Mesopotamia mai a, o inam maten nai dae Kanaan-na, fo ta dook-ka neme Efrata mai fa, de au daleng-nga he'di nanseli. Au atoin nai naa, fo nai enok leo Efrata neu, su'un na.” (Besak ia lalelak Efrata nde Betlehem.)

⁸ Lelek Yakob nita Yusuf anan sila-la boema natane nae, “See anan ia la?”

⁹ Yusuf nataa nae, “Au anang ia la, fo Manetualain fen neu au nai dae Masir ia.” Yakob nae, “Fes mai deka loo au, fo ela au fes baba'e-papalak.”

¹⁰ Yakob nita nasalalalok nanahu namalasi de matan-na keluha'buk so. Yusuf fe anan sila-la leu deka loo Yakob, de ana holu nas boema ana de'is.

¹¹ Boema Yakob nafa'da Yusuf nae, “Te'e-te'e au ta dodoo losa, neukose au atongo seluk o o fa, tehu nakalenak besak ia Manetualain fe au loak ita o ana mala boe.”

¹² Basa boema Yusuf ko'o nalas leme Yakob ifan lain mai, boema ndia mesak-kana sene-do'ok neu aman matan-na.

^13-14 Basa ndia boema, Yusuf tao anan duas deka loo Yakob, de Efraim fo mate'a tei su'uk ka nai boboa kiin-na, ma Manasye fo uluk ka, nai boboa konan-na. Tehu Yakob lane liman-na de, ana tao lima konan-na neu Efraim langan lain, ma ana tao lima kiin-na neu Manasye langan lain.

¹⁵ Basa ndia boema, ana fe Yusuf baba'e-papalak, nae, “Manetualain, Ndia nde Amak, fo Abraham ma Isak lamahelen, Ndia nde hela-nole au losa besak ia;

¹⁶ Ndia nde ata nusa so'dak fo ana se'i-po'i au eme soe lala'en-na mai so. Sa'di leo been-na Manetualain ndia, ba'e-pala ni'iana ia-la. Sa'di leo been-na, au ma Abraham ma Isak na'dem mala nanakoa-nanakiok, hu kande n'iana ia-la! Sa'di leo been-na, ala bongi upu anak, ma tititi-nonosin makadotok nai daebafak-ka.”

¹⁷ Yusuf dalen-na he'dis-sa, nai lelek nita aman tao lima konan-na neu Efraim langan lain; boema ana ho'un-na aman liman-na, de ana lali henin neme Efraim langan lain leo Manasye langan lain neu.

¹⁸ Nafa'da Aman nae, “Boso leondiak, Ama. Ana uluk ka nde ia dei; tao Ama lima konam-ma neu langan lain.”

¹⁹ Tehu aman ta sipok fa, de nae, “Au bubuluk, anang-ngo, Neukose Manasye koasan-na ba'un-na seli, ma tititi-nonosin boeo neukose da'di leoina matua. Tehu fa'din na neukose koasan-na matua lena neme ka'an ndia mai, ma fa'din ndia tititi-nonosin neukose da'di leoina matua.”

²⁰ Boema ana fe seluk baba'e-papalak neu ni'iana sila-la nai faik ndia, nae, “Hataholi Israel-la neukose seseik o na'dem ma, metema ala fe baba'e-papalak neu hataholi. Neukose lafa'da lae, ‘Sa'di leo been-na Manetualain tao na o sama leo Efraim ma Manasye.’ ” No enok ndia, Yakob sue nakahuluk Efraim neme Manasye mai.

²¹ Boema Yakob nafa'da Yusuf nae, “Sama leo o mita ka, au mamateng-nga deka so, tehu neukose Manetualain tulu-fali emi ma no falik emi leo emi be'i-ba'i kaim-mala nusan-na meu.

²² Sikhem fo nusak maisi-maminak fo au loso an neme hataholi Amori la nenik tafaina ma kokouk ka, au fen neu o, te au ta fen neu o tolanoom-mala fa.”