KEJADIAN 43 - Susula Malalaok Hehelu Palak Ma Hehelu Beuk

Yusuf ka'an-nala sama-sama loo Benyamin leu leo Masir leu

^1-2 La'andoes-sa nai Kanaan boetai namatuak-ka, de lelek Yakob umaisin-nala la'a basa gandum fo lenin neme Masir mai boema, Yakob nafa'da anan-nala nae, “Meu seluk leo Masir meu, fo asa gandum soaneu ita dei.”

³ Boema Yehuda nae, “Filana Masir-ra fe ami nasanene'dak mahelek nae ami ta bole meu leo Masir meu so'on, metema ami ta moo ami fa'dim ndia fa.

⁴ Metema Ama po'i ami fa'dim-ma tunga soona, ami nau meu asa nana'ak nai naa.

⁵ Tehu metema Ama ta po'i Benyamin tunga fa soona, ami ta nau meu fa, nana filana ndia nafa'da basa nae ami ta bole meu mataa fa, metema ami fa'dim-ma, ta tunga fa.”

⁶ Yakob nae, “Taole'e de emi tao susa au nenik emi mafa'da hataholi ndia mae emi bei mafa'dik?”

⁷ Ala lataa lae, “Hataholi ndia natane nakandondoohenin la'eneu ami ma la'eneu ita umaisin-nala, nae, ‘Emi amam bei kaso'dak do? Ade emi bei mafa'di fe'ek do ta?’ No nakasetik ami mataa basa natatanen lala'en-na. Tao leo bee fo ami hapu neuk malan mae neukose ndia nadenu ami moo ami fa'dim ndia?”

⁸ Boema Yehuda nafa'da aman nae, “Po'i ni'iana ndia ana tunga, fo au nde anea ni'iana ndia. Neukose ami la'o no lai-laik, fo ela boso mate ita esa boen no la'a ndoes sa.

⁹ Au nde da'di neu bua pepe'dak esa, ma Ama bole moke ni'iana ndia neme au mai. Metema au ta o falik-kana no so'da-molek fa soona, au lu'a-lepa huhuku na losa mate.

¹⁰ Leounik-ka ita ta tahani losa dodoo basa ndia fa soona, tao leo bee o besak ia ami neu mai la'i dua so.”

¹¹ Boema sila aman nae, metema memak muse leondiak soona, “Ho'i ma nusak ia isimina malolehii nala fo taos leo emi lafa lapik mala dalek neu, fo da'dileo bua palsen soaneu filana ndia: Luu-luu, fanioe, bumbu, kamiri boak ma ketapang boak.

¹² Boeo meni doi lenak la'i dua, nanahu emi mita doik manai emi lafa lapik mala dalek-ka, muse emi fe fali kasa. Fafa'kama ndia, salak esa.

¹³ Moo o fa'dim ndia leon fo fali no lai-laik.

¹⁴ Sa'di leo been-na Manetualain Fo Manakoasa tao na filana ndia dalen-na tu'da neu emi, nalosa anan nau fe falik Benyamin ma Simeon leo emi neu. La'eneu au ia soona, metema memak au muse amopo au anang-ngala boeo, ta da'di hata-hata fa.”

¹⁵ Basa boema Yusuf tolanoon-nala leni bua palsen sila-la ma doik fo dede'un-na lenak la'i dua, de ala la'o sama-sama loo Benyamin leo Masir leu. Lelek ala losa naa boema, leu lataa Yusuf.

¹⁶ Lelek Yusuf nita Benyamin ma ka'an-nala boema, nafa'damalalau-maoonon fo mana malanga uma loon-na nae, “Moo hataholi sila-la leo au umang neu. Neukose lele'dok ia, ala la'a sama-sama loo au, hu ndia de do'do bana esa fo tunu-nasu man.”

¹⁷ Malalau-maoono ndia nakalala'ok paleta ndia, de no Yusuf tolanoon-nala leo filana-la uman dale neu.

¹⁸ Lelek loos leo Yusuf uman dale neu boema, ala bii ma ala bee doo lae, “Loo ita leo ia mai, nanahu doik fo ita titas leme ita lafa lapik ngala dalek, nai lelek makahulun-na ita mai leo ia mai a. Neukose ala ho'u ita no kaiboik, boema ala ho'i la ita keledein-nala, ma tao ita da'di sila atan.”

¹⁹ Hu ndia de, lafa'da malanga uma loo nai deka no Yusuf uma lelesun-na lae,

²⁰ “Ampon, Tuan, ami mai hai leo ia mai, soaneu asa nana'ak so.

^21-22 Lelek ami fali de ami losa mamanak fo ami sanga sungu nai eno tala'dak boema, ami se'i ami lafa lapik mala. Tehu ami mita doik fo ami bae gandum mala nai gandum mala poin-na. Ami ta bubuluk see kande tao doik sila-la fa. Besak ia ami meni fali kasa leo Tuan mai. Ami meni doi fe'ek boe fo asa seluk nana'ak.”

²³ Malalau-maoono ndia nae, “Boso bii. Dalem mala boso falahaa. Emi Manetualaim, fo nde emi amam sene-do'ok Manetualain na, Ndia nde tao doik sila-la leo emi lafa lapik dale neu. Au sipo-a gandum sila-la belin-na so.” Basa boema no falik Simeon leo sila neu,

²⁴ boema nos leo uma dale neu. Ana fes oe soaneu safe ein-nala, ma nana'ak soaneu keledein-nala boe.

²⁵ Basa ndia boema, ala sadia sila bua palsen soaneu ala fen neu Yusuf metema Yusuf mai nai lelek le'dohana, nanahu sila nananafa'da basak lae neukose ala la'a sama-sama loon.

²⁶ Lelek Yusuf losa uma boema, ala fe bua palsen sila-la neu Yusuf ma ala sene-do'ok neun.

²⁷ Yusuf natane la'eneu sila so'dan-na, boema nae, “Emi tui basa au la'eneu emi amam fo namalasi ndia so. So'dan-na leo beek? Malole do?”

²⁸ Ala lataa lae, “Tuan ata ma, fo ami amam, so'dan-na malole.” Boema ala sene-do'ok neun.

²⁹ Lelek Yusuf nita Benyamin fo fa'din na boema nafa'da nae, “Da'di emi seseik emi fa'dim-mate'a teisu'um neu au a, nde ia do? Sa'di leo been-na Manetualain ba'e-pala o, anang-ngo.”

³⁰ Yusuf dalen-na lua ponu-ponu nanahu dalen-na nahiik ma sue fa'din na. Ana hii nae ta hapu nakatatakak na dalen-na, hu ndia de no kaibaoik, ana la'oela mamanak ndia, boema neu leo kaman dale neu de ana kii.

³¹ Basa ndia boema nalou oe, boema ana kalua seluk, de no dalen-nakatatakak, ana nadenu sadia nana'a-nininuk.

³² Yusuf na'a mesak-kanan-nai mei esa, ma tolanoon-nala lai mei fe'ek. Hataholi Masir fo manai sila-la, la'a lai mei fe'ek esa seluk, nanahu ala lame'da nananakamumulu-nakadadaek metema la'a sama-sama loo hataholi Ibrani la.

³³ Ala fe Yusuf tolanoon-nala langatuuk leu mei fo nasasalematak no Yusuf mei na, tunga esa-esak teun, mulai neme uluk ka losa mate'a teisu'uk ka. Lelek ala lita mamanan-nangatuuk ndia ito-aton leondiak boema, esa nakanae esa no dodoodoak.

³⁴ Ala fe sila nana'a-nininun neme Yusuf mei na mai, ma lalalau-laoono Benyamin la'i lima fo lena ba'uk ka neme ka'an-nala mai. Boema ala la'a ma linu sama-sama loo Yusuf losa lakabete.