KEJADIAN 42 - Susula Malalaok Hehelu Palak Ma Hehelu Beuk

Yusuf ka'an-nala leu leo Masir soaneu asa gandum

¹ Lelek Yakob namanene lae hapu gandum nai Masir boema, nafa'da anan-nala nae, “Taole'e de emi ka'da benee-belino?

² Au amanene lae hapu gandum nai Masir; meu leo naa meu, fo asa gandum fo ela boso mate ita too la'andoes-sa.”

³ Boema Yusuf ka'a ka 10-n sila-la, leu asa gandum nai Masir.

⁴ Tehu Yakob ta po'i Benyamin, fo Yusuf fa'di bongin-na, neu sama-sama no fas, nanahu ana bii, boso nalosak anan ndia hapu soe.

⁵ Nanahu la'andoes-sa nai nusa Kanaan-na boema, Yakob anan-nala loo hataholi fe'ek makadotok leu asa gandum nai Masir.

⁶ Fo manamase'o gandum neu hataholi fo maleme daebafak-ka lala'en-na mai ndia, nde Yusuf, fo ana da'di filana nai Masir. Hu ndia de, Yusuf ka'an-nala mai, de ala senek leu matan-na.

⁷ Lelek Yusuf nita ka'an-nala boema, nalelak-kasa, tehu ana tao nono'kabai ta nalelak-kasa fa. Natanes no balakaik nae, “Emi hataholi beek?” Boema lataa lae, “Ami hataholi Kanaan. Ami mai asa nana'ak.”

⁸ Leomae Yusuf nalelak ka'an-nala, tehu ala ta lalelak-kana fa.

⁹ Boema nafandele me'in-na la'e neus. De nafa'das nae, “Emi ia mata-mata; emi mai soaneu palisak matalolole ami nusam-ma malole-mangalaun.”

¹⁰ Ala lataa lae, “Ta, Tuan. Ami, fo Tuan atan-nala mai, fo ka'da asa nana'ak.

¹¹ Ami ia tolanook-kala, Tuan. Ami ia hataholi malole, te ta mata-mata fa.”

¹² Yusuf nafa'das nae, “Emi pepeko! Emi mai leo ia mai, fo palisak matalolole nusak ia malole-mangalaun nai bee.”

¹³ Ala lataa lae, “Ami ia, hataholi sanahulu dua, tolanook-kala Tuan, ami ama esa, de nai nusa Kanaan-na. Mate esa so, ma mate'a teisu'uk-ka, besak ia no ami amam nai Kanaan.”

¹⁴ Yusuf nataa nae, “Memak tete'ek-ka, sama leo au halang-nga. Emi ia mata-mata.

¹⁵ De au sanga fola emi: Au soo enik manek-ka na'den-na ae neukose emi ta la'o meme nusak ia mai fa, metema emi fa'dim mate'a teisu'uk ndia, emi ta moon leo ia mai fa.

¹⁶ Emi esa muse fali neu nalan. Neukose au akanete ahele fe'e-fe'ek-kala, losa emi hala-kokolam ndia nananitak tete'ek-ka. Metema ta soona, no manek-ka na'den-na, emi ia musu-a mata-matan!”

¹⁷ Basa boema, ala taos leo bui dale, faik telu dalen-na.

¹⁸ Neu faik ka telun-na boema, Yusuf nafa'das nae, “Au hataholi fo bii ma tunga neu Manetualain. Neukose au po'i emi no nonokek esa.

¹⁹ Soaneu da'di buti, nae emi ia hataholi ndoos soona, emi esa nahele neme bui dale; fo fe'ek-kala bole fali ma meni gandum fo emi asa maak-ka soaneu emi uma isim fo doidoso loo la'andoes-sa.

²⁰ Basa ndia soona, emi muse moo emi fa'dim mate'a teisu'um-ma leo au mai. Fo neukose ndia nde da'di buti, nae emi hala-kokolam ndia tete'ek-ka, ma neukose au ta hukuisa emi fa.” Ala sipok filana ndia nakeketun-na.

²¹ Boema sila esa kokolak no esa nae, “Naa, besak ia, ita nanahukuk, hu kande makahulun-na ita tao salak neu ita fa'din-na; ana noke tutulu-fafalik, tehu ita ta nau taoafik neu fan, leomae ita tita tae ana doidoso nanseli. Hu ndia de, besak ia, ita tame'da tita doidosok ia.”

²² Ruben nae, “Makahulun-na au afa'da emi, fo daenga boso tao hata-hata neu ni'iana ndia. Tehu emi ta nau mamanene fa. De besak ia, mamaten-na nanabalas neu ita.”

²³ Yusuf nalak sila dede'an-na, tehu ala ta bubuluk fa, de ala kokolak loo Yusuf soona, ala pake hataholi manasalin dede'ak esa.

²⁴ Yusuf la'oelas, de ana kii. Lelek ana kii nate'e boema, ana fali ma'in, boema naloo Simeon, de ana hengen nai basa tolanoon-nala matan-na.

Yusuf ka'an-nala fali leo Kanaan leu

²⁵ Yusuf paleta fo daenga tao lahenu ka'an-nala kalong-nala nenik gandum, ma ana tao falik sila esa-esak doin-na leo kalong sila-la dalek neu. Ana fe paleta boe, fo ela ala fes nana'ak soaneu tua-lepa nai enok. Lakalala'ok Yusuf paletan ndia.

²⁶ Basa ndia boema, Yusuf ka'an-nala fua gandum fo ala asa laak-kala leo sila keledein lain neu, boema ala la'o leme mamanak ndia mai leona.

²⁷ Nai mamanak fo ala sungu-a, esa se'i ndia kalong gandum-ma, fo ana hani keledein-na. Ana nita doin-na nai gandum ndia poin-na.

²⁸ Ana bouk tolanoon-nala nae, “Ala fe falik au doing-nga. Mitak, nai au kalong dale.” Tenen-na dele, no bibii-namata'uk, esa natane esa nae, “Manetualain tao ita le'e ia?”

²⁹ Lelek ala losa Kanaan boema, ala tui sila aman, basa hata lala'en fo ala la'ola'din. Lafa'da lae,

³⁰ “Filana Masir-ra kokolak no hala belak neu ami, ma nakasasa'ek dede'ak neu ami, nae ami mata-matan nai nusan-na.

³¹ Ami mataa mae, ‘Ami hataholi malole, te ta mata-mata fa, ami hataholi fo tunga ka'da ndoon-na.

³² Ami basa-basam-mala hataholi sanahulu dua, ama esa, de mate 1 so, boema mate'a teisu'uk-ka no ama nai Kanaan.’

³³ Filana ndia nafa'da nae, ‘Au sanga fola emi, fo au bubuluk, ade emi hataholi fo, manatao tunga ndoon-na do ta: Muse ela emi hataholim esa; fo fe'ek-kala bole fali le'us, leni gandum soaneu emi uma isim fo mates loo la'andoes-sa ndia.

³⁴ Emi fali fo, moo emi fa'dim mate'a teisu'uk-ka mai soona, neukose au bubuluk ae emi ta mata-mata fa, te emi hataholi fo manatao tunga ndoon-na. Soona neukose au fe falik emi tolanoom fo au akataka ahelen ndia leo emi neu, ma emi bole leo nai nusak ia, ma emi bole dangan no su'di bebe'ik-ka.’ ”

³⁵ Basa boema, nai lelek ala po'a sila kalong-nala boema, esa-esak nita tas doin-na, doik nai dalek; boema ala bii lanseli, ma sila aman boeo ana bii.

³⁶ Boema sila aman nafa'da nae, “Emi nde taom-ma au amopo basa au anang-ngala. Yusuf tak-kana so; Simeon tak-kana seluk so; ma besak ia, neukose emi ho'i-ma Benyamin boe. Au doi-dosong ba'un-na seli!”

³⁷ Boema Ruben nafa'da aman nae, “Fe Benyamin leo au mai, Ama; mahani te, neukose au o falik-kana, metema ta soona, Ama bole taomisa au ana toung duas.”

³⁸ Tehu Yakob nae, “Ta! Emi ta bole moo Benyamin fa; ka'an-na maten so, de besak ia ela ka'da ndia so. Boso nalosak ana hapu soe nai leleo-lala'ok ndia dalek. Au ia, amalasi so, ma dale he'dik fo neukose emi menin neu au ndia, neukose neni au mamateng-nga.”