KEJADIAN 39 - Susula Malalaok Hehelu Palak Ma Hehelu Beuk

Yusuf ma Potifar saon-na

¹ Hataholi Ismael sila-la loo basa Yusuf leo Masir neu boema, lase'o basan leo Potifar, fo manek-ka malanga solda'du matuainan, ana da'di manamanea uma manek-ka malangan-na.

² Manetualain tulu-fali Yusuf, nalosa ana hapu buna-boak tataasesa nai ue-le'din na dalek. Ana leo nai Tuan na, fo hataholi Masir ndia uman.

³ Tuan na nita nae Manetualain tulu-fali Yusuf, de hu ndia de Yusuf hapu buna-boa malole nai basa hata lala'en fo ana tao-no'in.

⁴ Potifar nahiik nanseli no Yusuf, de ana so'un da'di ndia malalau-maoonon mesan-na; boema ana fe Yusuf ito-ato uma loon ma basa hata-heton lala'en-na.

⁵ Mulai hatematak ndia, hu kande Yusuf de Manetualain ba'e-pala hataholi Masir ndia uma loon, ma basa hata-heton lala'en-na, nau manai uma do manai tina osi boe.

⁶ Basa Potifar hata-heton lala'en-na, ana fe Yusuf mete-nakaes. No enok ndia, Potifar po'i liman-na neme ito-atok la'eneu uman-na, ta'da fe'e nana'a-nininuk. Yusuf ao na makadelek ma mata-panan mana'ahiik.

⁷ Basa faik de'ubee boema, Potifar saoinan-na mulai nahiik sungu no Yusuf, boema ana lelekon fo ala sungu lakabubua.

⁸ Yusuf ta nau fa, de nafa'dan nae, “Ampon, Ina, tuan Potifar fe au ito-ato basa hata-heton lala'en-na. Ana ta paluu dudu'a-dodoo seluk hata-hatan-nai uma ia dalek so'on.

⁹ Nai ia, au koasang-nga matua sama no koasan-na. Ta hapu hata esa boen, fo au ta ito-ato fan ta'da fe'e Ina. Hapu nai bee, au tao tatao-nono'i mangalauk ndia ma asala-asingo neu Manetualain?”

¹⁰ Leomae Potifar saon-na fufu'di Yusuf tunga faik, tehu touanak ndia ta nau sungu sama-sama no fan.

¹¹ Nai faik esa boema, lelek neu leo uma dale neu fo ana tao tatao-nono'in, te ta hapu hataholi esa boen nai ndia fa.

¹² Potifar saon-na ho'un-na Yusuf ba'du manalun-na de ana helan ma nae, “Mai fo ata sungu takabubua.” Yusuf naule de ana hapu natapo'i, boema nalai leo deak neu, tehu ba'du manalun-na la'oelan nai inak ndia liman na,

¹³ Lelek Potifar saoinan-na mete nae Yusuf nalai ma ba'du manalun-na ana la'oelan,

¹⁴ Ana naloo malalau-maoono nala de nafa'da nae, “So'ba mete mitak! Hataholi Ibrani fo au saong-nga non leo uma ia mai, nakamumulu-nakamamaek ita. Ana masok leo au kamang dale neu de nau hohonge no au, tehu au nggasi apane'e.

¹⁵ Lelek namanene au nggasi boema, nalai leo deak neu de ba'du manalun-na la'oelan.”

¹⁶ Boema Potifar saon-na pe'da ba'du manalu ndia losa saon-na fali ma'in.

¹⁷ Saon-na fali ma'in boema, no lai-laik ana tuin tutuik dede'ak ndia, nae, “Hataholi Ibrani fo o moon leo ia mai ndia, masok leo kama dale neu fo nakamumulu-nakamamaek au.

¹⁸ Tehu lelek au nggasi boema, anan-nalai leo deak neu de ba'du manalun-na la'oelan.”

¹⁹ Potifar da'di namanasa nanseli.

²⁰ Ma ana paleta fo ela no lai-laik ho'u la Yusuf fo taon leo bui dale neu, manek-ka mamana huhuku hataholi nanahuku kala.

²¹ Tehu Manetualain tulu-fali Yusuf ma sue-lai nahelen, nalosa malanga bui a nahiik non.

²² Ana fe Yusuf nanea hataholi bui fe'e-fe'ek-kala, ma ana fe Yusuf nanea basa tatao-nono'ik fo nanatao-no'ik nai bui ndia dalek.

²³ Malanga bui ndia ta nanea basa hata lala'en fo nanafek neu Yusuf so'on, nanahu Manetualain tulu-falin, nalosa ana hapu buna-boan nai basa ue-osan lala'en-na dalek.