KEJADIAN 35 - Susula Malalaok Hehelu Palak Ma Hehelu Beuk

Yakob no hataholin-nala leu leo Betel leu

¹ Nai faik esa boema, Manetualain nafa'da Yakob nae, “Au nde Manetualain fo natu'du aoinan-na neu o nai lelek o malai meme o ka'am Esau mai. La'o lai-lai leo Betel muu leona. Leo meme ndia, ma mapadedeik-ma mei tunu-hotuk esa ba'eneu Au.”

^2-3 Boema Yakob nafa'da teidale-bobongin-nala ma basa hataholi manasama-sama loo nana nae, “Neukose ata la'o teme ia mai fo teu leo Betel teu. Nai ndia, neukose au apadedeik mei tunu-hotuk ba'eneu Manetualain fo manatulu-fali basa au nai tepo lelek au to'a taa ma manamasulu-mahapa basa au nai lelek au leo su'di bee u a. Da'di tu'u-tapaheni dodoki-dudula lamatua daebafak nusa dea fo emi ho'uk-kala; tao feta tao nalalao aoinak-ka ma pake bua-lo'a balisi leona.”

⁴ Boema ala fe basa dodoki-dudula lamatua daebafak nusa dea fo ala ho'uk-kala leo Yakob neu, ma sila lolo'en manai di'idoon-nala boe. Yakob natoi basa bua-lo'as sila-la nai ai manituk huun-na nai deka no Sikhem.

⁵ Nai lelek Yakob no teidale-bobongin-nala la'o boema, Manetualain fe bibii-namata'uk-ka poti na laun manai kota-kota boboa-kaisun-nala, nalosa ala ta usi tunga Yakob no hataholin-nala fa.

⁶ Boema ala losa dae Kanaan-na fo nai kota Betel la fo makahulun-na na'de Lus.

⁷ Nai ndia, Yakob napadedeik mei tunu-hotuk de ana foi mamanak nida na'de “El-Betel”, nanahu Manetualain natu'du aoinan-na neun nai lelek nalai neme ka'an-na mai.

⁸ Nai naa boe Debora, fo inak manamasu'u Ribka nai lelek bei anan-na, maten boema latoin nai ai manituk huun-na fo nai kota ndia boboa konan-na. Hu ndia de, ai ndia nanafoik na'de “Ai Kikii-makaleleuk.”

Manetualain ba'e-pala Yakob nai Betel

⁹ Basa ndia boema Yakob fali leo Mesopotamia neu, de Manetualain natu'du aoinan-na seluk neun de Ana ba'e-palan.

¹⁰ Manetualain nafa'dan nae, “Neukose ta loke o lae Yakob so'on, tehu Israel.” Leondiak Manetualain foin na'de Israel.

¹¹ Boema Manetualain boeo nafa'da nae, “Au nde Manetualain Fo Manakoasa. Ela leo been-na o bongi upu-anak makadotok! Neukose o bongi leoinak-kala ma o da'di mane-manek-kala ama kain.

¹² Nusak fo Au fe basan neu Abraham ma Isak, neukose Au fen neu o ma o tititi-nonosim-mala.”

¹³ Basa ndia boema, Manetualain la'oela Yakob.

¹⁴ Nai mamanak fo Manetualain kokolak no Yakob ndia, anan-napadedeik batu nasa nene'dak esa. Boema Yakob tunu-hotu fe Manetualain angol ma mina setun nai batu ndia lain.

¹⁵ Ana foi mamanak ndia na'de “Betel.”

Mate Rahel

¹⁶ Basa ndia boema Yakob ma hataholin-nala la'oela Betel. Lelek ala bei lala dodoana faa neme Efrata mai te, Rahel fai na losa soaneu ana bongi. Tehu ana bongi nakalele'ok.

¹⁷ Lelek he'di bobongin-na namabela boema, inak fo manamakabobongik-kana nafa'dan nae, “Mamatutua o dale ma, Rahel, te o anam-ma touanak seluk.”

¹⁸ Tehu Rahel mamaten-na sanga deka so de lelek sanga ketu hahaen-na boema, ana foi ni'iana ndia na'de Ben-Oni tehu aman foin na'de Benyamin.

¹⁹ Mate Rahel boema, latoin nai enok manaleo Efrata neu a, su'un-na, fo besak ia na'de Betlehem.

²⁰ Yakob napadedeik batu nasanene'dak esa nai ndia, de losa besak ia boeo Rahel laten-na bei nanata'duk nenik batu ndia.

²¹ Basa ndia boema, Yakob la'ok nakandoo, boema napadedeik lalaa teman-na nai mamanak esa nai uma puni madema Eder-ra selik.

²² Lelek ala bei lai mamanak ndia, Ruben sungu no Bilha, fo ama sao makahatun-na. Yakob namanene dede'ak ndia boema, namanasa nanseli. Yakob ana toun sanahulu dua.

Yakob anan-nala

²³ Lea anan-nala nde Ruben (Yakob ana ulun-na), Simeon, Lewi, Yehuda, Isakhar, ma Zebulon.

²⁴ Rahel anan-nala nde Yusuf ma Benyamin.

²⁵ Bilha fo Rahel atan-na, anan-nala nde Dan boema Naftali.

²⁶ Zilpa fo Lea atan-na, anan-nala nde Gad ma Asyer. Ni'iana sila-la bongis lai Mesopotamia.

Mate Isak

²⁷ Boema Yakob losa aman Isak, fo nai mamana leleon-na nai Mamre deka no Hebron. (Makahulun-na ba'in Abraham, leo neme naa boe).

^28-29 Nai lelek Isak namalasin-nanseli, fo nde teun 180 boema, maten boema anan-nala fo Yakob ma Esau latoin.