KEJADIAN 27 - Susula Malalaok Hehelu Palak Ma Hehelu Beuk

Isak fe baba'e-papalak neu Yakob

¹ Nai faik esa, fo nai lelek Isak namalasi ma poken so boe boema, naloo na Esau fo ana ulun-na, boema nafa'dan nae, “Ana ngonei!” Esau nataa nae, “Ou ama.”

² Isak nae, “O bubuluk mae au amalasi so de neukose au ta hapu aso'da ala dook-ka so'on.

³ Da'di ho'i ma o kou-kou ma no kokou isi mala, fo muu sopu ma bana esa nai mook-ka.

⁴ Nasun fo mala'da sama leo au dale hihii nga, soona menin leo au mai. Metema au u'a basa soona, neukose au fe baba'e-papalak neu o beidai au bei aso'da ia.”

⁵ Ribka namanene Isak no Esau kokolan ndia. Boema lelek Esau la'o neu sopu boema,

⁶ Ribka nafa'da Yakob nae, “Besa ka au amanene o amam nafa'da Esau nae leoia,

⁷ ‘Muu sopu ma bana esa fo nasu man mala'da soaneu au. Metema au u'a basa soona, neukose au fe baba'e-papalak neu o nai Manetualain matan, beidai au bei aso'da ia.’ ”

⁸ Ribka nafa'da seluk nae, “Nah, anang-ngonei, mamanene ma tao hata fo au afa'dak ia leona.

⁹ Muu leo ita bi'ilopo nala mamanan-na muu fo hele ma bi'ihii ana dua mao mesa-mesan fo ela au nasu an da'di o amam nana'an fo nahiik-kana.

¹⁰ Basa soona, meni fen fo ela na'an fo basa ndia soona, neukose ana fe baba'e-papalak neu o beidai bei naso'da ia.”

¹¹ Tehu Yakob nafa'da inan nae, “Ina, ade Esau ao na kabubulus, te au ao nga ta hetu?

¹² Boso nalosak ama nafaloe au ao nga boema, ana bubuluk nae au ke'dindiun; soona neukose ana ta fe baba'e-papalak fa te, ana soo-supa au.”

¹³ Inan nataa nae, “Boso bii, Ana ngo. Neme na fo au nde lu'a-lepa soo-supan lala'en-na. Ka'da tao hata fo au afa'da ka, fo muu ho'u ma bi'ihiik sila-la leona.”

¹⁴ Boema Yakob neu ho'un-na bi'ihiik sila-la de nenis leo inan neu, boema Ribka do'de nasu Isak nana'an fo nahiik-kana.

¹⁵ Basa boema Ribka ho'i na Esau bua papake mana'ahiin nanseli a fo ana pe'dan nai uma, boema ana o'dun neu Yakob.

¹⁶ Boeo ana poti bi'ihii ana lou na neu Yakob lima boan-na ma botoliin fo bulu tak ndia.

¹⁷ Boema ana fe nana'a mala'dahiik ndia no ana tao na loti a leo Yakob neu.

¹⁸ Basa ndia boema, Yakob neu leo aman neu de nae, “Ama!” Isak nataa nae, “o see, Esau do Yakob?”

¹⁹ Yakob nataa nae, “Esau, fo ama ana ulun-na; au tao basa ama hala hehelun-na so. Mangatuuk fo mu'a paa sosopuk fo au inik ia, fo ela ama hapu ba'e-pala au.”

²⁰ Isak nae, “O hapun no lai-laik nanseli, Ana ngo.” Yakob nataa nae, “Hu kande Manetualain fo ama sene-do'ok-ka tulu-fali au so.”

²¹ Boema Isak nafa'da Yakob nae, “Mai deka-deka fo ela au hapu afaloe o. Tete'ek-ka Esau nde o do?”

²² Yakob neu deka no aman, de aman ndia nafaloen boema nae, “O hala ma sama leo Yakob hala na, tehu o lima boam, ma sama leo Esau lima boan-na.”

²³ Isak ta nalelak Yakob fa, nanahu lima noan-na kabubulus sama leo Esau lima boan-na. Tehu nai lelek ana sanga fe Yakob baba'e-papalak te,

²⁴ ana bei natane la'iesa seluk nae, “Tete'ek-ka Esau nde o do?” Yakob nataa nae, “Tete'ek-ka.”

²⁵ Boema Isak nae, “Fe au paa ndia leona. Au u'a basa soona, neukose au fe au baba'e-papalang neu o.” Yakob fen paa ndia no angol faaanak fo ninu.

²⁶ Boema aman nafa'dan nae, “Mai deka seluk, Ana ngo, fo de'i au.”

²⁷ Lelek Yakob deka soaneu de'in boema, Isak de'i hapu Esau bua papaken-na boo na, boema ana baba'e-papalan. Isak nae, “Au anang-nga boo na mala'dahiik sama leo mook fo Manetualain ba'e-pala basan, boo na.

²⁸ Sa'di leo been-na Manetualain fe o dinis neme lalai mai, ma Ana tao na o tina-osim leloaka! Sa'di leo been-na Ana fe o gandum ma angol la sasi kao-kao!

²⁹ Sa'di leo been-na leoinak-kala da'di o atam, ma leoina leo nala lakatele neu o. Sa'di leo been-na o koasa basa o tolano ka'a-fa'dim-mala, ma o inam tititi-nonosin sene-do'ok nai o matam. Sa'di leo been-na nanasoo-supak neu basa hataholi fo ana soo-supa o, ma nanaba'e-palak neu basa hataholi fo ana ba'e-pala o.”

Esau dokodoe baba'e-papalak neme Isak mai

³⁰ Isak fe basa baba'e-papalan de Yakob la'o totik boema, no lai-laik Esau, fo ka'an-na fali neme sopu-dangan mai.

³¹ Esau boeo do'de-nasu nana'a mala'da, de neni fe aman, boema nae, “Mangatuuk Ama, fo au ini paa nde ia, de mu'a leona, fo ela Ama fe au baba'e-papalak.”

³² Isak natane nae, “See o.” Boema, Esau nataa nae, “Esau, fo ama ana ulun-na.”

³³ Boema, Isak aon-na lala'en-na, mulai dele ngge'be-ngge'be, boema natane nae, “Metema leo ndiak soona, see nde sopu-na bana ndia, de na'kasa nenin leo au mai? Au u'a henin so, te o beita losa fa. Boema, au fe basa au baba'e-papalang mate'eng-nga neun so, de besak ia, baba'e-papalak ndia, ana da'di ndia nuun, losa dodoon-na.”

³⁴ Esau namanene dede'ak ndia boema, ana kii napane'e, ma dalen-na he'dis nanseli, boema nae, “Ba'e-pala au boe, Ama!”

³⁵ Boema Isak nae, “O fa'dim-ma mai leo ia mai, de ana ke'di-na au so. Ana ho'i-na baba'e-papalak, fo tunga ndoon-na au fen neu o so.”

³⁶ Esau nae, “Ana ke'di-na au, neu ka la'i duan-na nde ia so. Hu ndia de, na'den-na, Yakob. Ana ho'i-na au hak ana ulung-nga so, de besak ia, ana ho'i-na au baba'e-papalang so boe?”

³⁷ Isak nataa nae, “Au taon da'di o tuam-ma, ma Au tao basa tolanoo ka'a-fa'din-nala, da'di ndia atan-nala so. Au fe basan, gandum ma angol so. Besak ia, ta hapu hata-hata so'on, fo au bisa fe o, Anang-ngo!”

³⁸ Esau ta nau hahae dokodoe neu aman fa, de nae, “Ade, ama nanuu baba'e-papalak ka'da esa mesak-kana do? Ba'e-pala au boe, Ama!” Boema ana mulai kii seluk.

³⁹ Basa boema, Isak nafa'dan nae, “Neukose, o ta hapu dinis neme lalai mai fa, neukose, ta hapu tina manaleloakak, soaneu o fa.

⁴⁰ Neukose o so'dam-ma, neme o tafainam-ma mai, tehu o da'di ata, neu o fa'dim-ma, tehu, metema o lena-la'ban-nana soona, neukose o matapo'i neme koasan-na mai.”

⁴¹ Boema, Esau namanasa Yakob, nanahu aman fe basa ndia baba'e-papalan neu fa'din ndia so. Ana dodoo nae, “Ta dook-ka seluk fa te, mate ama so, de basa fai fafaluk-ka soona, au taoisa Yakob!”

Isak nadenu Yakob neu leo Laban neu

⁴² Lelek Ribka namanene Esau dale tutu'un ndia boema, nadenu leu laloo Yakob de nae, “Mamanene te, o ka'am Esau, sanga balas nape'da dalen-na, fo ana tao nisa o.

⁴³ Nah, tao hata fo au afa'dan ia leona. No lai-laik, muu leo au ka'ang Laban nai Haran,

⁴⁴ fo leo moon, faik de'ubee dalen-na, losa o ka'am-ma nasan-na tenak

⁴⁵ ma nafandeleheni, o tatao-nono'im neu ndia. Basa soona, au adenu hataholi neu nala falik o leo ia mai. Au ta nau mopo au anang duas, nai faik esa dalen-na fa.”

⁴⁶ Boema, Ribka nafa'da Isak nae, “Au pela-malua, mete Esau saon-nala leme leoina nusa dea sila-la mai fa. Metema Yakob boeo, ana sao anafe'oana Het soona, malole lenak ka'da mate au leona.”