KEJADIAN 26 - Susula Malalaok Hehelu Palak Ma Hehelu Beuk

Isak leo nai Gerar

¹ La'andoes-sa da'di seluk nai nusak ndia, sama leo ana da'di nai Abraham tepo-lelen-na so. Isak neu leo Abimelekh, fo hataholi Filistin-nala manen-na, nai Gerar, de noke fen loak fo ana leo neme ndia.

² Ana tao leondiak, nanahu Manetualain natu'du basa aoinan-na neun so, de nafa'da nae, “Boso muu leo Masir muu; leo mahele meme nusak ia, sama leo Au paleta basan neu so.

³ Neukose Au asulu-ahapa ma ba'e-pala o. Neukose Au fe basa nusak ia lala'en-na neu o, ma neu o tititi-nonosim. Neukose Au tao atetu hehelu-balataak fo Au fe basan neu o amam Abraham so.

⁴ Neukose Au fe upu anak dede'un-na leo nduuk manai lalai-a, ma neukose Au fes nusak ia lala'en-na. Basa leoina manai daebafak-ka, ala dokodoe neu Au fo ela Au fes baba'e-papalak sama leo Au ba'e-pala basa o tititi-nonosim so.

⁵ Neukose Au ba'e-pala emi, nanahu Abraham tunga basa Au ma nakaboboi basa Au hoholo-lalaneng ma Au paletang-nga la.”

⁶ Da'di Isak leo nai Gerar.

⁷ Lelek hataholi manai sila-la latane la'eneu Ribka boema, Isak nataa nae ndia fa'din ndia, te ta saon fa. Isak bii hataholi sila-la neukose taolisan, fo ela ala hapu Ribka fo mata makeek hiik ndia.

⁸ Isak leo nai naa dodoo-ana so de nai faik esa boema, Mane Abimelek-ka mete neme jendela na mai, de nita Isak no Ribka bei lade'ik.

⁹ Boema naloo na Isak de nafa'da nae, “Ade o saom inak ndia hetu? Taole'e de, o mafa'da mae o fa'dim ndia?” Isak nataa nae, “Au dodoo ae, metema au afa'da ae au saong ndia soona, neukose au nanataonisak.”

¹⁰ Abimelekh nafa'da nae, “Tao le'e de o tao ami leoiak? Au laung esa bisa sungu no o sao ma, ma metema dede'ak ndia ana da'di soona, o nde lu'a-lepa ami salam ndia.”

¹¹ Basa boema Abimelekh fe nasanene'dak neu ndia laun-na lala'en-nanae leoia, “Ba'eneu see fo ana a'du-dodoki hataholi ia do saon-na soona, neukose nanahukunisak.”

¹² Isak tao tina osi de ana sele-nggali bini-ngges nai nusak ndia, de nai teuk ndia dale na ana hapu buna-boak diku la'i natun esa neme ana sele-nggali ka mai, nanahu Manetualain ba'e-palan.

¹³ Su'i-beten boetai namaba'uk-ka de ana kamasu'i hatu-hatuk.

¹⁴ Hataholi Filistin ala dalen-nala ta malole loo fan nanahu atan ba'uk-ka, bi'ilopo, sapin makadotok nanseli.

¹⁵ Boema lakadofu ketu basa Abraham atan-nala kali oedulu la nai tepo-lelek bei naso'da.

¹⁶ Basa boema Abimelekh nafa'da Isak nae, “La'o meme ami nusa ma mai leona. O koasa lena heni neme ami so.”

¹⁷ Da'di Isak la'o leon de ana ofu neme Bafak Gerar la. Ana leo neme ndia teuk de'u bee dalen-na.

¹⁸ Ana kali seluk oedolu fo nai tepo-lelek Abraham bei naso'da fo ana kali oedolu la, de mate Abraham boema hataholi Filistin ala lakadofu ketus nenik dae. Ana foi oedolu sila-la na'den-na sama leo aman foi na'de kala.

¹⁹ Isak atan-nala kali oedolu nai Bafak Gerar ndia de oe na sasi kao-kao.

²⁰ Tehu basa manafoo manai Gerar la lale'a loo basa Isak manafoo nala. Lafa'da lae, “Oe ia ami nuum.” Hu ndia de Isak foi oedolu ndia na'de “Nale'ak.”

²¹ Isak atan-nala kali seluk oedolu fe'ek, boema nale'a ka da'di seluk la'eneu oedolu ndia boe. Hu ndia de, Isak foi oedolu ndia na'de “Musu nok.”

²² Basa boema ana lali neme ndia mai, de ana kali oedolu ka telu-a. Oek ia, nale'ak ta. Hu ndia de, Isak foi oedolu ndia na'de “Ao loak.” Nafa'da nae, “Besak ia, Manetualain fe basa ita ao loak soaneu leo nai nusak ia so, de neukose ita taua-tanale nai ia.”

²³ Basa boema Isak la'o de ana losa Bersyeba.

²⁴ Nai le'odaek ndia Manetualain natu'du aoinan-na neun de nae, “Au nde o amam Abraham Manetualain na. Boso bii; te Au asulu-ahapa o. Neukose Au ba'e-pala o ma Au fe o tititi-nonosik makadotok, nanahu Au hehelu-balataang neu Au atang Abraham.”

²⁵ Boema Isak napadedeik mei tunu-hotuk de ana sene-do'ok Manetualain nai mamanak ndia. Ana ofu neme ndia de atan-nala kali oedolu fe'ek.

Isak ma Abimelekh tao hehelu-balataak

²⁶ Nai faik esa boema, Abimelekh neme Gerar mai, no Ahuzat fo manamanolin-mafa'dan-na, ma Pikhol fo solda'dun-nala malanga matuainan-na, soaneu latongo loo Isak.

²⁷ Boema Isak natane nae, “Taole'e de besak ia emi mai matongo moo au, te se'kona makahulun-na emi musu ma usiheni au eme emi nusa ma mai?”

²⁸ Boema lataa lae, “Besak ia ami bubuluk mae Manetualain nasulu-nahapa o, de tunga ami hahapu ma, malole lenak ata tao hehelu-balataak. Soo-supa leon,

²⁹ mae neukose o ta tao mangalauk neu ami fa, sama leo ami boeo ta tao mangalauk neu o fa. Ami heo-hilun malole neu o so, de ami fe o la'o no mole-dame. Mangale'dok ba'eneu ami nae Manetualain ba'e-pala o so.”

³⁰ Basa boema Isak sadia fes nana'ak de la'a-linu.

³¹ Balahaa fafaianan-na boema esa-esak kokolak hehelu-balataan fo nanapakunisak nenik soo-supak. Boema Isak kokolak dede'a nasi'da-naba'ek, de ala lasi'da-laba'e da'dileo tia-laik.

³² Nai faik ndia boe, Isak atan-nala mai de lafa'dan la'eneu sila kali la oedolu a so. Lafa'da lae, “Ami hapu oe a so.”

³³ Boema Isak foi oedolu ndia na'de “Soo-supa.” Kota Bersyeba na'den-na momoli-dada'din nde ndia.

Esau saon-nala leme leoina nusa dea mai

³⁴ Lelek Esau teun haahulu boema, ana kabing no anafe'oanak dua leme leoina Het a leo na mai, fo nde Yudit fo Beeri anan-na ma Basmat fo Elon anan-na.

³⁵ Ina ka duak sila-la tao susa Isak ma Ribka soda nala.