KEJADIAN 22 - Susula Malalaok Hehelu Palak Ma Hehelu Beuk

Manetualain paleta Abraham, fo ana tunu-hotu Isak

¹ Basa teuk de'ubee boema, Manetualain fola Abraham namahehelen-na. Manetualain naloo nae, “Abraham!” Boema Abraham nataa nae, “Ou Manetualain.”

² Boema Manetualain nae, “Moo o anamane kisa susuem-ma, fo meu leo dae Moria meu. Neukose, Au atu'du o, letek esa nai ndia, fo nai letek ndia lain, o tunu-hotu o anam-ma, da'di neu tutunu-hohotuk nanatunuk fe Au.”

³ Balahaa fafaik boema, Abraham bia ai soaneu tutunu-hohotu nanatunuk-ka, de ana puputu ai sila-la, boema ana fuan neu keledei lain. Abraham no Isak, ma atan dua leu leo mamanak fo, Manetualain nafa'dan-nana.

⁴ Ala la'ok neu fai ka telun-na boema, Abraham mete nita mamanak ndia neme dook-ka mai.

⁵ Boema nafa'da ata ka duan sila nae, “Emi moo keledei-a, mahani meme ia, fo au, ma au anang-nga, meu leo naa meu, fo sene-do'ok neu Manetualain, fo basa soona, ami fali ma'im-ma, leo ia mai.”

⁶ Abraham fua ai, fo soaneu tutunu-hohotu nanatunuk sila, neu Isak alun lain, ma ndia ho'u dope, ma ha'ikaak, soaneu hotu ai-la. Lelek duas beela'o boema,

⁷ Isak nae, “Ama!” Boema Abraham nataa nae, “Te beek anango?” Boema, Isak natane nae, “Ita teni ha'i, ma ai so, tehu bi'ilopoana nai bee, soaneu tutunu-hohotu nanatunuk ndia?”

⁸ Boema, Abraham nataa nae, “Neukose, Manetualain nde sadia bi'ilopoana ndia.” Boema duas la'ok lakandoo.

⁹ Lelek ala losa mamanak fo, Manetualain nafa'dan neu Abraham-ma, boema ana taon-na mei tunu-hotuk esa, de nakatoto'dok ai ha'i sila-la, neu lain. Boema, ana henge anan-na, de nakandondoon neu mei tunu-hotuk lain, fo nai ai ha'i sila lain.

¹⁰ Basa ndia boema, ana lesu-na dopen-na, fo ana sanga do'do anan-na.

¹¹ Tehu Manetualain ata nusa so'dan-na, naloo bou-bou neun neme lalai mai nae, “Abraham, Abraham!” Boema, Abraham nataa nae, “Ou Manetualain!”

¹² Manetualain kokolak tunga ata nusa so'dak ndia nae, “Boso tao mahe'di ni'iana ndia, do taon le'e esa boen. Besak ia, Au bubuluk, o fe ha'da-holomata, ma o tunga Au, nanahu, o nau fe o ana kisam-ma neu Au.”

¹³ Boema, Abraham mete leo boboa-kaisun neu, de nita bi'ilopo mane esa, susulan-na kai nai makatemak dale. Abraham ho'un-na bi'ilopo ndia, boema ana tunu-hotu fen neu Manetualain, da'di neu tutunu-hohotu nanatunuk, nggati anan-na.

¹⁴ Abraham foi mamanak ndia na'de, “Manetualain sadia hata nanapaluu-ka.” De losa besak ia boeo, hataholi-la lafa'da lae, “Manetualain sadia hata nanapaluu-ka,” nai leten lain.

¹⁵ Manetualain ata nusa so'dan-na, naloo bou-bou la'iesa seluk neu Abraham nae,

¹⁶ “Manetualain nae, Au soo-supa inik au na'deng-nga mesak-kana, nanahu o tao tataos ia, de o nau fe o ana kisam ndia, neu Au.

¹⁷ Neukose, Au ba'e-pala o nenik baba'e-papalak manasasi kao-kaok-ka, ma Au fe o tititi-nonosim de'u nduuk manai lalai-a, ma solokaek manai tasi su'un-na. Neukose, o upu-anam sengi musun-nala.

¹⁸ Basa leoina manai daebafak-ka, neukose ala dokodoe neu Au, fo daenga Au ba'e-pala sila, sama leo Au ba'e-pala basa o tititi-nonosim so – nanahu o tunga Au paletang-nga so.”

¹⁹ Basa ndia boema, Abraham fali leo ata ka dua-nala neu, de basa-basas fali le'us leo Bersyeba leu, boema Abraham leo nahele neme naa.

Nahor tititi-nonosin

²⁰ Abraham ka'an esa na'de Nahor. Basa manada'dik manai Lete Moria ndia boema, Abraham namanene, lae Milka, fo Nahor saon-na, anan 8 so, fo nde:

²¹ Us, fo uluk-ka; Bus, fo fa'din-na; Kemuel, fo makabuin-na, ana da'di Aram aman;

²² Kesed, Hazo, Pildas, Yidlaf, ma Betuel;

²³ fo makabuin-na, ana da'di Ribka aman. Milka bongi fe Nahor, fo Abraham tolanon-na, ni'iana ka 8-k sila-la.

²⁴ Nahor saoinak-ka dua-na, na'de Reuma, de saoinak-ka duan ndia, ana bongin-na Tebah, Gaham, Tahas ma Maakha.