KEJADIAN 21 - Susula Malalaok Hehelu Palak Ma Hehelu Beuk

Bongi Isak

¹ Manetualain ba'e-pala Sara, sama leo Ana helu basak-ka so.

² Neu lelek fo, Manetualain naketu basa ka, fo nde nai lelek Abraham namalasi so, boema Sara nailu, de ana bongi ni'iana touanak esa.

³ Abraham foi ni'iana ndia na'de Isak;

⁴ de lelek Isak faik 8 boema, Abraham sunat-ana, nandaa no Manetualain paletan-na.

⁵ Nai lelek bongi Isak te, Abraham teun natun esa so.

⁶ Sara nafa'da nae, “Manetualain taon-na au hika nanahu namahokok-ka. Hataholi see, fo namanene dede'ak ia soona, neukose ana hika, ma namahoko sama-sama no au.”

⁷ Basa boema, nakadaik-kana nae, “Dede'ak ia beita da'di fa te, ta hapu hataholi esa boen, fo nafa'da au saong-nga, nae neukose, au asu'u ni'iana. Tehu, au bongi so boe, leomae au saong-nga, namalasi nanseli so.”

⁸ Ni'iana ndia, boetai namatuak-ka, de nai faik fo finan-nana, Abraham tao feta matuaina.

Hagar ma Ismael nanausi henik

⁹ Nai faik esa boema, Ismael, fo Abraham no Hagar, ina Masir ndia anan-na, bei nakaminak no Isak, fo Sara anan-na.

¹⁰ Sara nita boema, nafa'da Abraham nae, “Usi heni ata inak ndia no anan. Fo inak ndia anan-na, ta bole hapu baba'ek, neme o su'i-betem, fo neukose o fen neu au anang Isak.”

¹¹ Sara nonoken ndia, taon-na Abraham dalen-na, ta tesa-tama makandondook fa, nanahu ndia anan Ismael boe.

¹² Tehu, Manetualain nafa'da Abraham nae, “O dalem-ma, boso naba'e la'eneu o atam Hagar no anan ndia. Tunga Sara dale hihiin-na, nanahu, neukose o hapu tititi-nonosik fo Au heluk ndia, tunga Isak dei.

¹³ Leondiak boe, neu Hagar anan-na, neukose Au fen upu-anak makadotok, fo ela ala da'di leoina esa. Nana o anam ndia boe.”

¹⁴ Balahaa fafaik boema, Abraham fe Hagar nana'ak ma alukosu bana louk esa, oe nai dalek, soaneu tua-lepa nai enok. Ana tao basa-basas neu Hagar alun lain, de nadenu inak ndia no anan, la'o leona. Boema Hagar la'o leona, de naleu-nalaak nai mook solokaek Bersyeba.

¹⁵ Lelek, leni oe-a basan boema, Hagar la'o ela anan-na nai makatemak dale,

¹⁶ de neu nangatuuk fafa'kama, metel natun esa neme mamanak ndia mai. Ana dodoo nai dalen dale nae, “Au ta akatatakak ala au daleng-nga, mete au anang-nga maten fa.” Boema ana kii leona.

¹⁷ Manetualain namanene Ismael halan-na, de Manetualain ata nusa so'dan-na, ana kokolak no Hagar neme lalai mai nae, “Hagar, o susa beek? Boso bii. Te Manetualain namanene O anam-ma, halan-na so.

¹⁸ Fali mu'um-ma, leo o anam-ma muu leona, fo ko'o-man, fo makahahauk-kana. Neukose, Au fe o tititi-nonosim, da'di leoina matuaina esa.”

¹⁹ Boema, Manetualain fe Hagar nita no le'do-le'dok, de nita oedolu esa. Boema neu leona, de ana hela oe, de ana sali leo alukosu bana louk ndia dalek neu, de ana fe anan-na ninu.

²⁰ Manetualain sama-sama no Ismael. Ni'iana ndia boetai namatuak-ka; ana leo nahele neme moo solokaek Paran-na, de ana da'di manasopu-danga malelaina.

²¹ Inan fen sao ina Masir esa.

Abraham ma Abimelekh tao hehelu-balataak

²² Nai lelek ndia, Mane Abimelek-ka, ma Pikhol, fo solda'dun-nala malanga manai lain-na, ala mai leo Abraham mai, de lafa'dan lae, “Manetualain tulu-fali o, nai basa hata lala'en, fo o taok-ka.

²³ Hu ndia de, soo-supa nai ia, fo nai Manetualain matan, mae neukose, o ta tao mangalauk soaneu au, nau soaneu au anang-ngala, do au tititi-nonosing-ngala fa. Sama leo, au daleng-nga malole soaneu o, tao leondiak boe, soaneu au, ma soaneu nusak fo o leon ia.”

²⁴ Boema, Abraham nae, “Hei, au soo-supa.”

²⁵ Tehu basa boema, Abraham nasasale dale neu Abimelekh, la'eneu manek ndia atan-nala, latona-la oedolun esa.

²⁶ Boema, Abimelekh nae, “Au ta bubuluk see kande, tataon ndia fa. O beita mafa'da au, manada'dik ndia fa. Besak-ka au amanene manada'dik ndia.”

²⁷ Boema, Abraham fe Abimelekh bi'ilopo ma sapi makadotok, de basa boema, hataholi ka duak sila-la, ala tao hehelu-balataak leona.

²⁸ Abraham ta'da fe'e bi'ilopoana hitu, neme bi'ilopon-nala dalek mai,

²⁹ boema Abimelekh natanen nae, “Tao le'e de, o tao tataos ndia?”

³⁰ Boema, Abraham nataa nae, “Sipo-ma bi'ilopoana ka hituk ia-la leona, fo da'di neu ta'du-tana nae, Tuan manaku, nae te'e-te'e, au oedolung ia.”

³¹ Boema, ala foi mamanak ndia na'de Bersyeba, nanahu hataholi ka duak sila-la, ala soo leme ndia.

³² Ala tao basa hehelu-balataak neme Bersyeba boema, Abimelekh ma Pikhol fali le'us leo hataholi Filistin-nala nusan-na leu.

³³ Boema Abraham sele ninilu esa, nai Bersyeba, de mulai faik ndia, ana pake mamanak ndia, soaneu sene-do'ok neu Amak, Manetualain, fo manaketu-basa taak-ka.

³⁴ Basa ndia boema, Abraham leo doo-doo ana faa, neme hataholi Filistin-nala nusan-na.