KEJADIAN 20 - Susula Malalaok Hehelu Palak Ma Hehelu Beuk

Abraham ma Abimelekh

¹ Abraham lali neme Mamre leo dae Kanaan-na boboan kona neu, de ana leo nahele nai Kades ma Syur tala'da. Lelek ana leo neme Gerar-ra,

² nafa'da nae Sara nde been-na, ndia fa'din, te ta ndia saon fa. Hu ndia de, Mane Abimelekh fo neme Gerar mai, nadenu hataholi neu nala Sara, fo fen leo ndia neu.

³ Le'odaek esa boema, Manetualain natu'du aoinan-na neu manek ndia, nai me'is dale, de nafa'da nae, “Neukose mate o, nanahu o ho'i-ma inak ndia so; nana inak ndia masaok so.”

⁴ Tehu Abimelekh beita nafaloe la'e Sara boen te, manek ndia nae, “Manetualain, au ta asala fa! Ade, neukose Manetualain tao namopo-namate au ma au loinang-nga do?

⁵ Saotoun-na, nafa'da nae ndia fa'din inak ndia, ma inak ndia, nafa'da nae leo ndia boe. Au tao tataos ndia no dale malalaok, da'di au ta asala fa.”

⁶ Boema, Manetualain nataa nai me'is ndia dalek nae, “Memak, Au bubuluk ae o tao tataos ndia no dale malalaok. Hu ndia de, Au ka'i basa o, fo boso tao sala-singok soaneu Au, de Au ta po'ilotak o mafaloe la'e inak ndia fa.

⁷ Tehu besak ia, fe falik-kana leo saon-na neu. Saon-na nabi esa, de neukose ana hule-haladoi soaneu o, fo ela boso mate o. Tehu metema, o ta nau fe falik-kana fa soona, mafandendelek te, neukose mate o moo basa o laum-mala lala'en-na!”

⁸ Balahaa fafaianan-na boema, Abimelekh naloo basa hataholi mana'a ngga'din-nala, de nafa'das, basa manada'dik sila-la lala'en-na. Boema ala bii lanseli.

⁹ Basa ndia boema Abimelekh naloo Abraham de natanen nae, “Hata fo o tao basan la'eneu ami so? Ami masala o beek, de nalosa o fe soe ia la'e au aoinang-nga, ma au nusang-nga? Tete'ek-ka, ta nandaa, o tao au leo iak fa.

¹⁰ Tao le'e de, o tao leondiak?”

¹¹ Boema, Abraham nataa nae, “Au aedaenga, nai ia, ta hapu hataholi bii Manetualain fa, nalosa hataholi fo nahiik au saong-nga, neukose ana taonisa au.

¹² Bai te, memak au fa'ding ndia. Ami ama esa, tehu esak inan, de basa boema ami sao.

¹³ Boema, lelek Manetualain nadenu au la'oela au amang uman-na fo aleu-alaak leo nusa fe'ek-kala u, boema au afa'da au saong-nga ae, ‘Mafa'da o lilinekam neu au, nenik mafa'da su'di see, mae o ka'am au.’ ”

¹⁴ Basa ndia boema, Abimelekh fe falik Sara leo Abraham neu, ma ana fe ata, bi'ilopo ma sapi boe.

¹⁵ Manek ndia, nafa'da Abraham nae, “Au nusang-nga nde basa ia lala'en-na, de o mahiik mamanak bee soona, leo mahele meme mamanak ndia leona.”

¹⁶ Boema nafa'da Sara nae, “Au fe basa, o ka'am doifulak lifun esa, da'di leo buti neu basa hataholi-la, nae te'e-te'e o ta la'ok sala fa.”

^17-18 Manetualain taon-na basa inak manai Abimelekh uma manen-na, manabongi tak no'u-no'u, nanahu manada'dik no Sara, fo Abraham saon ndia. Boema, Abraham hule-haladoi neu Manetualain, de Manetualain tao nalea-nahai Abimelekh, saon-na ma ata inan-nala, nalosa inak sila-la hapu bongi seluk.