KEJADIAN 16 - Susula Malalaok Hehelu Palak Ma Hehelu Beuk

Hagar ma Ismael

¹ Sarai, fo Abram saon-na, beita bongi anak boen. Tehu, ana hapu ata esa neme Masir mai, fo anafe'oanak esa, na'de Hagar.

² Sarai nafa'da Abram nae, “Tao leo bee-o, Manetualain ta fe au bongi anak so'on. Hu ndia de, malole lenak, o sungu moo au atang ia. Fafa'kama, ana hapu bongi fe au anak.” Abram sipok Sarai nonoken-na.

³ Boema, Sarai fe atan ndia neu Abram, fo ana taon da'di sao ka dua-na. Nai lelek ndia, Abram leo nai Kanaan, teuk 12 ndia so.

⁴ Boema, Abram sungu no Hagar, de nailu. Tehu lelek Hagar bubuluk, nae ndia nailu so boema, ana koao-ndaeao, ma nakadadaek Sarai.

⁵ Boema, Sarai nafa'da Abram nae, “Au fe basa, au atang Hagar neu o so, de mulai ana bubuluk, nae ndia nailu so boema, ana nakadadaek au. O salam ndia. Sa'di leo been-na, Manetualain naketu ita dua dede'an ia.”

⁶ Boema, Abram nataa nae, “Hei, o atam ndia, de o koasan; de taon su'di bebe'ik-ka.” Boema Sarai tao Hagar, ta no ha'da hataholik fa, nalosa Hagar nalai.

⁷ Boema, Manetualain ata nusa so'dan-na, natongon-no Hagar nai mamanak esa, deka no oemata manai moo solokaek-ka, nai enok manaleo moo solokae Sur-ra neu.

⁸ Boema, ata nusa so'dak ndia nafa'da nae, “Hagar, fo Sarai atan-na, o meme bee mai, ma o sanga leo bee muu?” Boema, Hagar nataa nae, “Au alai eme au nyora Sarai mai.”

⁹ Boema, ata nusa so'dak ndia nae, “Fali mu'um-ma, fo malalau-maoonon.”

¹⁰ Boema, ata nusa so'dak ndia, nafa'da seluk nae, “Neukose, Au fe o upu-anak makadotok nanseli, nalosa ta hapu hataholi esa boen, hapu leke nala fas.

¹¹ Ta dook-ka so'on, te neukose o bongi anatouk; de foin na'de Ismael, nanahu Manetualain namanene o kikiim-ma so.

¹² Tehu o anam ndia, neukose naso'da sama leo keledei fuik-ka; neukose ana la'ban su'di see, ma neukose su'di see boe, ana la'ban-nana. Neukose, ana pasi fe'e neme basa tolanoo ka'a-fa'din-nala mai.”

¹³ Hagar dodoo nai dalen dale nae, “Tete'ek-ka au ita Manetualain, fo manataoafik neu au-a so?” Boema noke Manetualain, fo manakokolak non nana, nae, “Manetualain, Fo Manataoafik.”

¹⁴ Hu ndia de, hataholi-la loke oedolu manai Kades ma Bered tala'da ndia lae, “Ndia Oedolun Fo Maso'dak, ma Manataoafik neu au.”

¹⁵ Boema, Hagar bongi anatouk esa, de aman Abram foi ni'iiana ndia na'de Ismael.

¹⁶ Ndia te, Abram teun faluhulu nee so.