KEJADIAN 15 - Susula Malalaok Hehelu Palak Ma Hehelu Beuk

Manetualain tao hehelu-balataak no Abram

¹ Basa ndia boema, Abram hapu ninitak, de namanene Manetualain nafa'dan nae, “Boso bii, Abram, te neukose, Au asulu-ahapa o neme soe-a mai, ma Au fe o ngga'di matuaina.”

^2-3 Tehu Abram nae, “Amak Fo Mademaina, Amak-ka ta fe au anak fa. Hataholi fo, neukose ana hapu au hata-hetong-ngala, ka'da Eliezer, fo au atang-nga neme Damsyik mai. Da'di, sosoak hata, Manetualain fe au ngga'di?”

⁴ Basa boema, Abram namanene Manetualain nafa'da seluk-kana nae, “O neukose o atam-ma, ta nde da'di hataholi fo, manahapu o hata-hetom fa, te o anatoum-ma mesak-kana.”

⁵ Manetualain no Abram leo deak leu, boema nafa'dan nae, “Mete leo lalai neu, fo so'ba leke nduuk-kala; neukose o hapu tititi-nonosik de'u nduuk sila-la.”

⁶ Abram namahele neu Manetualain, hu ndia de, Manetualain sipok-kana da'di leo hataholi fo nandaa no dalen-na.

⁷ Basa boema, Manetualainnafa'da seluk-kana nae, “Au nde Manetualain, fo hela-nole o kalua meme nusa Ur-ra, nai Babilonia, soaneu fe o dae ia, da'di o pusakam.”

⁸ Tehu Abram natane nae, “Ou Manetualain, Fo Mademaina, tao leo bee, fo au hapu bubuluk, ae neukose dae ia da'di au pusakang?”

⁹ Manetualain nataa nae, “Pa'a-ma sapi ina esa, bi'ihii ina esa, ma bi'ilopo mane esa, teuk beke teluk, ma boeo, manupui kateu esa ma manupui kalua esa soaneu Au.”

¹⁰ Boema, Abram tao fe'e bana sila-la, soaneu Manetualain. Ana seseli ba'e sapi, bi'ihiik ma bi'ilopo sila-la neu beke duak, de ana pe'das lasasalematak nai ta'dak dua dalek. Tehu ana ta seseli ba'e manupui sila-la fa.

¹¹ Manupui mana'a popolak-kala, ala sa'e leu paa sila lain, tehu Abram usi henis.

¹² Lelek le'do-a mulai tenak boema, Abram sungu namanee. No kaiboik, ana bii nanseli.

¹³ Manetualain nafa'dan nae, “Mafandendelek, te neukose o tititi-nonosim da'di hataholi manamai, nai nusa fe'ek; neukose ala da'di ata nai ndia, ma neukose nanatuni-ndenik teuk natun haa dalen-na.

¹⁴ Tehu, leoina fo manatao o tititi-nonosim da'di ata ndia, neukose Au hukun, ma nai lelek fo, o tititi-nonosim la'o ela nusak ndia, neukose leni hata-heto makadotok.

¹⁵ Neukose, o nde hapu teu manalua; neukose o mate no nee-nee lino-linok, boema nananatoi-natonok.

¹⁶ Basa tititi-nonosik 4 soona, besak-ka o upu-anam fali ma'is leo ia mai, nanahu Au ta usi heni hataholi Amori-la fa, nana tatao-nono'i mangalaun-nala beita dai, soaneu ala hapu huhukuk fa.”

¹⁷ Lelek le'odae boema, no kaiboik la'o esa masu-masu, ana to'da mai no obol manapilak, boema ala la'ok tunga paa bibiak sila-la tala'da.

¹⁸ Nai lelek ndia boe, Manetualain tao hehelu-balataak no Abram. Manetualain nae, “Au helu ae neukose, Au fe dae ia lala'en-na neu o tititi-nonosim, mulai neme too no nusa Masir-ra, losa Lee Efrat-ta,

¹⁹ ma hataholi Keni, Kenas, Kadmon,

²⁰ Het, Feris, Refaim,

²¹ Amori, Kanaan, Girgasi, ma Yebus daen-nala, nai dalek boe.”