KEJADIAN 13 - Susula Malalaok Hehelu Palak Ma Hehelu Beuk

Abram no Lot lasi'da-laba'e

¹ Abram la'oela Masir boema, no saon-na, ma hata-heton lala'en-na, ma Lot boe, de ala la'ok leo kii leu, fo ala la'ok lasale leo, Kanaan boboan kona leu.

² Abram namasu'i hatu-hatu; nanuu bi'ilopo, bi'ihiik, sapi, lilofulak ma lilopilas boe.

³ Boema, ana la'ok neme mamanak esa leo mamanak esa neu, de ana la'ok nasale leo Betel neu. Ana losa nusak manai Betel no Ai tala'da, nai ai manituk, fo makahulun-na ana ofu neme ndia,

⁴ de ana taon-na mei tunu-hotuk esa nai ndia, fo ana sene-do'ok neu Manetualain.

⁵ Lot boeo, nanuu teidale-bobongik, ma ata, boema bi'ilopo, bi'ihiik ma sapi.

⁶ Hu ndia de, mook mana'uk manai dae ndia, ta dai soaneu duas leo fan, nana duas bana-manun makadotok nanseli.

⁷ Boema, Abram manafoon-nala lale'a loo Lot manafoon-nala. (Nai lelek ndia, hataholi Kanaan-nala, ma hataholi Feris-sala, ala bei leo dae ndia.)

⁸ Abram nafa'da Lot nae, “Ita ia, tolanook, de ta malole, metema o hataholim-mala, ma au hataholing-ngala, esa nale'a no esa.

⁹ Hu ndia de, malole lenak, ata tasi'da-taba'e. O mahiik dae ia boboan beek-ka soona, helem-man, fo o soa ndia. Metema, o la'ok masale leo ia muu soona, neukose au la'ok asale leo mamana fe'ek u.”

¹⁰ Lot nakanae leo boboa-kaisun neu, boema nita la'iesak Bafak Yarden-na lala'en-na, losa leo kota Zoar-ra neu, fo oen-na makadotok, sama leo nai Manetualain Osin-na, do sama leo dae Masir-ra. (Ndia te, Manetualain beita tao namopo Sodom ma Gomora kotan-nala fa.)

¹¹ Mate'en-na, Lot hele-na Bafak Yarden-na lala'en-na, boema ana la'o leo dulu neu. Hataholi ka dua sila-la nasi'da-naba'en, tutuin-na leondiak.

¹² Abram leo nahele neme dae Kanaan-na, te Lot ofu nai kota-kota manai bafak-kala, losa deka no Sodom.

¹³ Hataholi manatao tatao-nono'i mangalauk nanseli-la, ma lasala-lasingo neu Manetualain-na, ala leo nai Sodom ndia.

Abram lali leo Hebron neu

¹⁴ Lelek, Lot la'o boema, Manetualain nafa'da Abram nae, “Memete matalolole, neme mamanak fo o mapadeik ndia, leo basa boboak lala'en-na neu;

¹⁵ Neukose Au fe basa dae, fo o mitak ndia neu o, ma neu o tititi-nonosim, fo ela ana da'di o pusakam losa dodoon-na.

¹⁶ Neukose, Au fe o tititi-nonosik makadotok nanseli, nalosa ta hapu hataholi esa boen, hapu leke-nala fas. Sama leo hataholi-a, ta hapu leke-nala daesopuk manai dae-a fa, leondiak boe, o tititi-nonosim, neukose ta hapu leke-nala fas.

¹⁷ Besak ia, la'ok okofefeo dae ia lala'en-na, nana neukose Au fen neu o.”

¹⁸ Basa ndia boema, Abram lali heok ofun-na, boema ana leo nahele deka no ai manituk-la, fo mamana nakalupu-nakatela nai Mamre, fo deka no Hebron, ma ana taon-na mei tunu-hotuk esa soaneu Manetualain.