KEJADIAN 12 - Susula Malalaok Hehelu Palak Ma Hehelu Beuk

Manetualain naloo Abram

¹ Manetualain nafa'da Abram nae, “La'oela o nusa-namom, o teidale-bobongim, ma o amam uman-na, fo muu leo nusak fo neukose Au atu'dun neu o.

² Neukose, Au fe o tititi-nonosik makadotok, fo neukose, ala da'di leoina matuaina. Neukose, Au ba'e-pala o, ma Au fe o na'dem-ma nanakoa-nanakiok, nalosa neukose, o da'di baba'e-papalak.

³ Neukose, Au ba'e-pala hataholi fo, manafe o baba'e-papalak, ma Au soo-supa hataholi fo, manasoo-supa o-a. Ma hu kande o, de neukose Au ba'e-pala basa leoina manai daebafak-ka lala'en-na.”

^4-5 Lelek Abram teun hituhulu lima, boema ana la'oela Haran, nandaa no Manetualain fen paleta. Abram neu leo dae Kanaan-na, sama-sama no saoinan Sarai, ma Lot, fo tolanoon-na anan-na, ma basa hata-heton lala'en-na, boema basa ata, fo ana hapus neme Haran. Lelek, ala losa Kanaan boema,

⁶ Abram la'ok okofefeo dae ndia, nalosa ana losa ai manituk esa nai More, fo mamana makaluku-makatele nai Sikhem. (Nai tepo-lelek ndia, hataholi Kanaan-nala bei leo mamanak ndia.)

⁷ Boema, Manetualain natu'du aoinan-na neu Abram, de nafa'dan nae, “Nusak ia, nde neukose Au fen neu o tititi-nonosim-mala.” Boema, Abram taon-na mei tunu-hotuk esa, neu mamanak ndia, soaneu Manetualain, fo natu'du aoinan-na neun-na.

⁸ Basa ndia boema, ana la'ok nakandoo leo kona neu, fo leo nusa mapupukuk-kala, nai kota Betel-la boboan dulu, de ana ofu neme Betel ma kota Ai tala'da; Betel nai boboak muli, ma Ai nai boboak dulu. Boeo, ana taon-na mei tunu-hotuk esa nai ndia, fo ana sene-do'ok neu Manetualain.

⁹ Basa boema, ana la'ok nakandoo seluk, neme mamanak esa leo mamanak esa neu, de ana la'ok nasale leo dae Kanaan-na, boboan kona neu.

Abram nai Masir

¹⁰ Tehu, la'a-ndoes matuaina nai Kanaan, nalosa Abram la'ok dook-ka seluk, leo kona neu, fo leo nusa Masir-ra neu, fo ana leo neme ndia, losa basa la'a-ndoes ndia.

¹¹ Nai lelek, ana sanga lena dae too-a, fo ana masok leo nusa Masir-ra neu, boema nafa'da saoinan Sarai nae, “Au saoinang-ngonei, o mata makeek nanseli,

¹² de metema, hataholi Masir-rala lita o soona, neukose ala dodoo, lae au saoinang o, soona tao leo bee-o, ala taolisa au, ma ala po'ilotak o maso'da.

¹³ Da'di, malole lenak ka'da au afa'da ae au fa'ding o, fo ela ala po'ilotak au aso'da, ma ala ta tao mangalalau au fa, hu kande o.”

¹⁴ De tete'ek-ka, lelek Abram lena dae too-a, de ana losa nusa Masir-ra boema, hataholi Masir-rala lita Sarai mata makeek nanseli.

¹⁵ Boema, uma manek-ka hataholi mana'a ngga'din de'u bee litan, de leu lafa'da manek-ka lae, inak ia, mata makeek nanseli; hu ndia de, loo Sarai leo manek-ka uma manen-na neu.

¹⁶ Hu kande Sarai, de manek-ka ta tao mangalalau Abram fa, ma ana fen ata, bi'ilopo lalae esa, bi'ihiik, sapi, keledei ma onta.

¹⁷ Tehu, hu kande manek-ka ho'in-na Sarai, de Manetualain fe he'di mangalauk-ka neu manek-ka, ma hataholi manai uma manen-na dalek.

¹⁸ Boema, manek-ka naloo Abram, de natanen nae, “Hata fo o taon neu au ia so? Tao le'e de, o ta mafa'da mae, o saom ndia fa?

¹⁹ Tao le'e de, o mafa'da mae, o fa'dim ndia, de o po'ilotak au ho'i-an, da'di neu au saong-nga? O saom-ma nde ia; de ho'i-man, fo la'o leona!”

²⁰ Manek-ka, fe paleta neu hataholi mana'a ngga'din de'ubee, fo ala usi heni Abram neme nusak ndia mai, sama-sama no saon-na, ma basa hata-heton lala'en-na.