KEJADIAN 10 - Susula Malalaok Hehelu Palak Ma Hehelu Beuk

Noh anan-nala tititi-nonosin

¹ Noh anan-nala tititi-nonosin nde ia, Sem, Ham ma Yafet. Basa faa tuak-ka boema, telus bongi anatouk.

² Yafet anan-nala nde Gomer, Magog, Madai, Yawan, Tubal, Mesekh ma Tiras.

³ Gomer tititi-nonosin nde, laun manaleo nai Askenas, Rifat ma Togarma.

⁴ Yawan tititi-nonosin nde, laun manaleo nai Elisa, Spanyol, Siprus ma Rodes.

⁵ Leoina fo manaleo ndolo-ndolo tasi su'uk-kala, ma nai pulu-pulu-la, bei-ba'i kain-nala nde hataholi sila-la. Fo Yafet tititi-nonosin nde basa hataholi sila-la. Leoina esa no leo anan-nala, ala leo nai esa-esak nusan-na, ma esa-esak dede'an.

⁶ Ham anan-nala nde Kus, Masir, Libia ma Kanaan.

⁷ Kus tititi-nonosin nde, laun manaleo nai Seba, Hawila, Sapta, Raema ma Sabtekha. Raema tititi-nonosin nde laun manaleo nai Syeba ma Dedan.

⁸ Kus bongin-na ana touanak esa, na'de Nimrod, fo hataholi ao makadelek makasososak-ka, nai daebafak-ka.

⁹ No Manetualain tutulu-fafalin, de ana da'di hataholi manasopu-manadanga malelaina. Hu ndia de, hataholi-a biasa nafa'da-nae, “Sa'di leo been-na, Manetualain tao o da'di manasopu-manadanga malelaina, sama leo Nimrod.”

¹⁰ Nai makasososan-na, Nimrod nusan-na neni Babel, Erekh, ma Akad, fo telus lai Babilonia.

¹¹ Neme naa mai, de neu leo Asyur neu, boema napadedeik kota Niniwe, Rehobot-Ir, Kalah,

¹² ma Resen, fo nai Niniwe ma Kalah tala'da. Kota sila-la basa-basas, kota matuina mesa-mesan.

¹³ Masir tititi-nonosin nde, laun manaleo nai Lidia, Anamim, Lehabim, Naftuhim,

¹⁴ Patrusim, Kasluhim, ma Kaftorim. Fo leoina Filistin-na, bei-ba'i kain nde leoina Kasluhim ndia.

¹⁵ Kanaan anan-nala nde Sidon, fo ana uluk-ka, ma Het.

¹⁶ Kanaan boeo bei-ba'i kaik neme leoina Yebusi, Amori, Girgasi,

¹⁷ hataholi Hewi-la, Arki, Sini,

¹⁸ Arwadi, Semari, ma Hamati. Leoina Kanaan sila-la, leoanan-nala, ala tapasasala losa dook-ka,

¹⁹ nalosa sila nusan-na dae toon-na, namaloa neme Sidon leo kona neu, fo nakandoo leo Gerar neu, losa ana deka no Gaza, boema ana leo dulu neu, fo leo Sodom, Gamora, Adma, ma Zeboim, losa ana deka no Lasa.

²⁰ Ham tititi-nonosin, nde basa sila-la. Leoina esa no leo anan-nala, ala leo nai esa-esak nusan-na, ma esa-esak dede'an.

²¹ Basa leoina Ibrani-la, bei-ba'i kain nde Sem, fo Yafet ka'an-na.

²² Sem anan-nala nde Elam, Asyur, Arpakhsad, Lud ma Aram.

²³ Aram tititi-nonosin nde, laun manaleo nai Us, Hul, Geter ma Mas.

²⁴ Sela aman nde Arpakhsad. Ma Eber aman nde Sela.

²⁵ Eber bongin-na anatouk dua; ana uluk-ka, na'de Peleg, nanahu nai tepo-lelen-na, leoina manai daebafak-ka, nanababa'ek; ana ka dua-na, na'de Yoktan.

²⁶ Fo Yoktan tititi-nonosin nde, laun manaleo nai Almodad, Selef, Hazar-Mawet ma Yerah,

²⁷ Hadoram, Uzal, Dikla,

²⁸ Obal, Abimael, Syeba,

²⁹ Ofir, Hawila ma Yobab.

³⁰ Sila nusan fo mamana leleon-na, namaloa neme Mesa leo Sefar neu, fo nde nusa letelepak manai boboak dulu.

³¹ Sem tititi-nonosin nde, basa sila-la. Leoina esa no leo anan-nala, ala leo nai esa-esak nusan-na, ma esa-esak dede'an.

³² Noh tititi-nonosin nde basa sila-la, fo neme leoina leo leoina neu, tunga sila esa-esak tititi-nonosin. Sila nde bongi basa leoina manai daebafak ia lala'en-na, nai lelek basa faa tuak matuaina ndia.