IMAMAT 8 - Susula Malalaok Hehelu Palak Ma Hehelu Beuk

Musa ndo ei Harun no anan-nala

¹ Manetualain nafa'da Musa nae,

² “Maloo Harun no anan-nala, ma ho'i meni bua papake imam-ma, mina feta, sapi maneanak esa, soaneu tutunu-hohotuk sala-singok hapu ampon, bi'ilopo mane dua, ma loti ta pake laluteik, lepeneu esa.

³ Boema madenu basa leoina Israel-la lala'en-na, lakabubua nai Au Lalaa Temang-nga lelesun-na bafan-na.”

⁴ Musa tao tunga hata fo Manetualain paletan. Lelek basa hataholi Israel-la lala'en-na lakabubua nai mamanak ndia boema,

⁵ Musa nafa'das nae, “Hata fo au taon besak ia nde been-na, Manetualain paletan ndia.”

⁶ Boema nadenu Harun no anan-nala leo uluk leu, fo ala safe-saa aoinan-nala.

⁷ Basa ndia boema, ana pake bua papake imam-ma neu Harun: ba'du kabaek, kalikee ma ba'du manalu. Boeo efod de ana pa'an nenik tema a'ba lutu neu kale'bon-na.

⁸ Boema ana tao babaa fanak-ka neu Harun, ma ana tao Urim ma Tumim-ma, leo babaa fanak ndia dalek neu

⁹ Boema, ana pa'a fefeo langak-ka neu Harun langan-na, ma ana so'dok lilopilas neu fefeo langak ndia, fo da'di ta'du-tana, nae Harun da'di Manetualain nuun so. Musa tao basa sila-la tunga Manetualain paletan-na.

¹⁰ Boema Musa ho'i-na mina feta, de ana losen neu Manetualain Lalaa Teman-na no basa oe-isin lala'en-na. No enok ndia, basa-basan lala'en-na nanafe hehelik ba'eneu Manetualain so.

¹¹ Ana pisi mina ndia faaanak la'i hitu leo mei tunu-hotuk lain neu, no basa oe-isin lala'en-na, boeo ana pisin neu baak oe no buin-na. No enok ndia, basa hata lala'en-na, nanafe hehelik ba'eneu Manetualain so.

¹² Basa ndia boema, Musa ndo ei Harun, nenik ana po'a mina feta faaanak leo Harun langan lain neu.

¹³ Boema, nadenu Harun anan-nala leo mata leu. Ana pakes ba'du kabaek ma kalikee. Boema ana pa'a fefeo langak-ka neu langan-nala, sama leo Manetualain paleta neun.

¹⁴ Basa ndia boema, Musa hela-na sapi maneanak esa, soaneu tutunu-hohotu sala-singok hapu ampon. Harun no anan-nala, lalaa liman-nala neu bana ndia langan lain.

¹⁵ Boema, Musa ta'ti sapi ndia, de ana ho'i-na daan-na seli. Ana lose daak ndia, nenik limaku'un-na neu mei tunu-hotuk-ka susulan manai bu'un haas, fo ela mei tunu-hotuk ndia, nanafe hehelik ba'eneu Manetualain. Ana pisi daa lenak-ka leo mei tunu-hotuk-ka sosolon dale neu. Enon-na leondiak, mei tunu-hotuk ndia nanatao nalalao-nalalafuk, ma nanafe hehelik ba'eneu Manetualain.

¹⁶ Musa ho'i-na la'iesak sapi fo besak-ka ta'tin ndia, mina tei dalen-na, bade'en-na no minan-na, ma ate neulaun-na. De ana tunus nai mei tunu-hotuk lain.

¹⁷ Tehu, sapi ndia paan-na, loun-na ma tei-ate lenan-nala, ma tei lutun-na boe, da'di sapi ndia paan-na lala'en-na, ta'da fe'ek bibiak nanatao kofe'ek-kala, ana tunun nai mamana ofu-a deak, sama leo Manetualain paletan-na.

¹⁸ Basa boema, Musa hela-na bi'ilopo mane fo soaneu tutunu-hohotu nanatunuk-ka, de Harun no anan-nala lalaa liman-nala neu bi'ilopo ndia langan lain.

¹⁹ Musa do'do bi'ilopo ndia, de ana lose daan-na neu mei tunu-hotuk-ka boboan haas.

^20-21 Boema ana tete'te bana ndia paan-na, de ana safe tei-aten ma ein-na nenik oe. Ana tunu bi'ilopo mane ndia langan-na, minan-na, ma paa lenak-kala, soaneu tutunu-hohotu nanatunuk-ka, nai mei tunu-hotuk lain, sama leo Manetualain paleta neun. Tutunu-hohotu nana'ak ndia, boon-na nandaa no Manetualain dalen-na.

²² Boema, Musa hela-na bi'ilopo mane esak-ka seluk, fo soaneu tutunu-hohotuk ndo ei imam-ma. Harun no anan-nala lalaa liman-nala neu bi'ilopo ndia langan lain,

²³ boema, Musa do'don. Basa ndia boema, ana ho'i-na bana ndia daan faaanak, de ana losen neu Harun di'idoo konan-na, neu limaku'uina konan-na, ma eiku'uina konan-na.

²⁴ Basa boema, nadenu Harun anan-nala mai deka, boema ana lose daak faaanak boe, neu di'idoo konan-nala, limaku'uina konan-nala, boema eiku'uina konan-nala. Ana pisi daa lenak-ka, neu mei tunu-hotuk-ka boboan haas.

²⁵ Musa ho'i-na bi'ilopo ndia minan-na, iko maminan-na, mina tei-aten, aten-na, bade'en-na no minan-na, boema sakibolo konan-na.

²⁶ Neme lepeneu fo isin-na loti fo taon ta pake laluteik fa, fo nanatunu-hotu basak neu Manetualain so, Musa ho'i-na loti makate esa, taon nenik mina ma loti ni'ianak esa. Ana tao loti ndia neu bi'ilopo minan-na ma sakibolo konan lain.

²⁷ Ana fe basa-basas leo Harun no anan-nala neu, boema ala tunu-hotun, da'di leo tunu-hotu natutu'duk ba'eneu Manetualain.

²⁸ Basa ndia boema, Musa ho'i-na nana'ak sila-la neme Harun no anan-nala liman-na mai, de ana tunus nai mei tunu-hotuk lain, sama-sama no tutunu-hohotu nanatunuk soaneu tutunu-hohotu ndo ei imam-ma. Tutunu-hohotu nana'ak ndia, boon-na nandaa no Manetualain dalen-na.

²⁹ Boema Musa ho'i-na bi'ilopo ndia tenen-na, de ana tunu-hotun da'di leo tutunu-hohotu natutu'duk neu Manetualain. Musa baba'en-na nde ndia, neme bi'ilopo mane fo nanatunu-hotuk soaneu feta ndo ei imam-ma. Basa sila-la Musa taon, sama leo Manetualain paleta neun.

³⁰ Basa ndia boema, Musa ho'i-na mina feta seli, ma daak manai mei tunu-hotuk lain-na seli, de ana pisin neu Harun no anan-nala, ma bua papaken-nala. No enok ndia, Musa fe hehelik sila loo sila bua papaken-nala leo Manetualain neu.

³¹ Basa boema, Musa nafa'da Harun no anan-nala nae, “Tunu-nasu paa tutunu-hohotuk ndia, nai Manetualain Lalaa Teman-na lelesun-na bafan-na. Tunga Manetualain paletan-na, de emi muse mi'an nai mamanak ndia, no loti tutunu-hohotuk ndo ei imam manai lepeneu dale-a.

³² Emi muse hotu heni, paa ma loti na'a elak-kala.

³³ Faik hitu dalen-na, emi ta bole la'oela Manetualain Lalaa Teman-na, losa basa feta fo ndo ei emi-a.

³⁴ Manetualain paleta, fo ela hata fo ita taon faik ia, boeo nanataok nai fai-fai manamaik-kala. No feta ndo eik ndia, de emi sala-singom hapu do'o do ampon.

³⁵ Nai faik hitu dalen-na, lele'do-le'odaen, emi muse mahele nai Lalaa Temak-ka lelesun-na bafan-na, fo tao hata fo Manetualain paletan. Metema, emi ta tao tunga fan soona, neukose mate emi. Dede'ak ndia, nde Manetualain paletan neu au.”

³⁶ Boema, Harun no anan-nala, tao basa hata fo Manetualain paletan tunga Musa.