IMAMAT 5 - Susula Malalaok Hehelu Palak Ma Hehelu Beuk

Neu faik bee, nde paluu tunu-hotu tutunu-hohotu sala-singok hapu do'o do ampon

¹ Paluu tunu-hotu tutunu-hohotu sala-singok hapu do'o do ampon: Metema, loke hataholi esa da'di sakasii matetuk nai manakee-mafula matan, tehu ana ta tui hata fo nitan do namanenen fa soona, ana muse lu'a-lepa tatao-nono'in buna-boan.

² Metema, hataholi esa nasala, nanahu ta name'da fa te ana da'di nanggenggeo, nana ana koila'e hata manggenggeok esa, fo leo bana manamatek popolan-na, de basa boema, name'da-na tatao-nono'in ndia.

³ Metema, hataholi esa nasala, nanahu ta name'da fa te ana koila'e hataholi daebafak-ka bua manggenggeon esa, basa boema, name'da-na tatao-nono'in ndia.

⁴ Metema, hataholi esa nasala, nanahu ana soo-supa pepekok nenik ana tao tofa-tafi, fo ana tao su'di beek-ka, basa boema, name'da-na tatao-nono'in ndia.

⁵ Nai basa tatao-nono'ik sila-la dalek, hataholi masalak-ka, muse manaku salan-na.

⁶ Ma soaneu sala-singon nanasoi-tefak, muse neni bi'ilopo esa, do bi'ihiiina esa, soaneu Manetualain. Imam-ma muse tunu-hotu tutunu-hohotuk ndia, fo ela hataholi ndia sala-singon, hapu do'o do ampon.

⁷ Tehu, metema hataholi masalak-ka, ta nalak sadia bi'ilopo do bi'ihiik soaneu soi-tefa sala-singon fa soona, muse neni manupui kateu dua, do kalua ana dua, fo esa soaneu tutunu-hohotuk sala-singok hapu do'o do ampon, ma esa seluk, soaneu tutunu-hohotu nanatunuk.

⁸ Muse neni manupui sila-la leo imam-ma neu. Fo imam-ma, muse tunu-hotu nakahuluk manupui fo, nanatunu-hotuk soaneu tutunu-hohotuk sala-singok hapu do'o do ampon-na. Muse po'de-la'di manupui ndia lesuha'in-na, tehu ta bole ketu langan-na fa.

⁹ Muse pisi manupui ndia daan-na neu mei tunu-hotuk-ka boboan-na, ma keke'e bei ela daak manai maupui ndia aon dale-a, fo ana pisok leo mei tunu-hotuk-ka sosolon dale neu, fo soaneu tutunu-hohotuk sala-singok hapu do'o do ampon.

¹⁰ Basa ndia soona, Imam-ma tunu-hotu manupui ka dua, fo soaneu tutunu-hohotu nanatunuk-ka, nandaa no nakanenetek-ka. Enon-na leondiak, imam-ma tunu-hotu tutunu-hohotuk soaneu hataholi ndia, soona neukose, Manetualain fe do'o do ampon neu hataholi ndia sala-singon.

¹¹ Metema, hataholi masalak-ka ta nalak sadia manupui kateu dua, do manupui kalua dua, soaneu tutunu-hohotuk sala-singok hapu do'o do ampon fa soona, muse neni ha'desopuk kilo esa. Ha'desopuk ndia, ta bole nanasese'dok mina setun, do tao boomenik neu fa, nana tutunu-hohotuk ndia nde been-na, tutunu-hohotuk sala-singok hapu do'o do ampon, te ta tutunu-hohotuk nana'ak fa.

¹² Muse neni ha'desopuk ndia leo imam-ma neu. Fo imam-ma, muse ho'in-na ha'desopuk ndia nafanggetek esa da'di leo ta'du-tana, nae basa-basan lala'en-na, nanatunu-hotu basak neu Manetualain so. Muse tunu ha'desopu nafanggetek kisak ndia, nai mei tunu-hotuk lain, fo da'di leo tutunu-hohotu nana'ak. Ndia tutunu-hohotun nde ndia, soaneu tutunu-hohotuk sala-singok hapu do'o do ampon.

¹³ Enon-na leondiak, imam-ma tunu-hotu tutunu-hohotuk soaneu hataholi ndia sala-singon, soona neukose, Manetualain fe do'o do ampon neun. Imam-ma baba'en-na nde ha'desopu lenak ndia, sama leo tutunu-hohotuk gandum-ma boe.

Tutunu-hohotuk bae hutak-ka

¹⁴ Manetualain fe Musa nakanenetek-kala nde ia nae,

¹⁵ Metema, hataholi esa ta name'da fa te ana tao sala-singok, nanahu nafandele henin, de ana ta fe tutunu-hohotun fo muse ana fen leo Manetualain neu fa, soona hataholi ndia, muse neni tutunu-hohotuk bae hutak. Tutunu-hohotuk ndia, muse bi'ilopo esa, do bi'ihii mane esa, ta lu'u-la'ak fa, ma puku belin-na, sama no belik fo nanapakek nai Manetualain Lalaa Teman-na.

¹⁶ Hataholi ndia, muse bae tunu-hotuk fo ana ta fe ndia fa, ma ana popo-tama seluk baba'ek lima neme bi'ilopo do bi'ihiik-ka belin-na mai. Basa soona, muse neni bana ndia leo imam-ma neu, fo imam-ma tunu-hotun soaneu hataholi ndia, soona neukose, Manetualain fe do'o do ampon neun.

¹⁷ Metema, hataholi esa ta name'da fa te ana tao sala-singok, nanahu ana la'olena Manetualain paletan esa soona, hataholi ndia nasala so, de muse ana lu'a-lepa tatao-nono'in ndia buna-boan.

¹⁸ Soaneu tutunu-hohotuk bae hutak-ka, muse neni bi'ilopo esa, do bi'ihii mane, fo ta lu'u-la'ak fa, ma puku belin-na tunga belik fo nanapakek nai Manetualain Lalaa Teman-na. Imam-ma tunu-hotun soaneu hataholi ndia sala-singon, soona Manetualain fe do'o do ampon neun.

¹⁹ Ndia nde tutunu-hohotuk bae hutak, soaneu salak fo ana taon soaneu Manetualain.