IMAMAT 3 - Susula Malalaok Hehelu Palak Ma Hehelu Beuk

Tutunu-hohotuk mole-dame

¹ Metema, hataholi esa tunu-hotu sapi esa, soaneu tutunu-hohotuk mole-dame soona, sapi ndia bole sapi mane, ma bole sapi ina, tehu ta bole la'u-la'ak fa.

² Hataholi manatunu-hotuk-ka, muse lalaa liman-na neu bana ndia langan lain, boema ana ta'tin nai Manetualain Lalaa Teman-na, lelesun-na matan-na. Imam-imam fo Harun tititi-nonosin-nala, muse pisi bana ndia daan-na neu mei tunu-hotuk-ka boboan haas.

³ Soaneu tutunu-hohotuk mole-dame ba'eneu Manetualain-na, imam-ma muse tunu-hotu bana ndia paan-na, fo nde: mina tei-aten,

⁴ bode'en-na no minan-na, ma aten-na.

⁵ Muse tunu basa sila-la, sama-sama no tutunu-hohotuk fe'ek-kala, nai mei tunu-hotuk lain. Tutunu-hohotuk nana'ak ndia boon-na, nandaa no Manetualain dalen-na.

⁶ Metema, nanatunu-hotuk soaneu tutunu-hohotuk mole-dame ndia, bi'ilopo esa do bi'ihiik esa soona, bana ndia bole mane, bole ina, tehu ta bole lu'u-la'ak fa.

⁷ Metema, hataholi esa tunu-hotu bi'ilopo esa soona, muse nenin leo Manetualain Lalaa Teman-na neu.

⁸ Nai ndia, ana muse lalaa liman-na neu bi'ilopo ndia langan lain, boema ana do'don nai Lalaa Temak-ka matan-na. Boema, imam-ma muse pisi bi'ilopo ndia daan-na, neu mei tunu-hotuk-ka boboan haas.

⁹ Soaneu tutunu-hohotuk mole-dame ba'eneu Manetualain-na, imam-ma muse tunu-hotu: bi'ilopo ndia minan-na, iko maminan-na la'iesak, keen deka no dui muliha'in-na, mina tei-aten,

¹⁰ bode'en-na no minan-na, ma aten-na.

¹¹ Imam malalau-maoonok-ka, muse tunu la'iesak paa sila-la nai mei tunu-hotuk lain, soaneu tutunu-hohotuk nana'ak neu Manetualain.

¹² Metema, nanatunu-hotuk ndia bi'ihiik esa soona, hataholi manatunu-hotuk-ka, muse nenin leo Manetualain Lalaa Teman-na neu.

¹³ Nai ndia, muse ana lalaa liman-na neu bi'ihiik ndia langan lain, boema ana do'don nai Lalaa Temak-ka matan-na. Imam-ma muse pisi bana ndia daan-na neu mei tunu-hotuk-ka boboan haas.

¹⁴ Soaneu tutunu-hohotu nana'ak ba'eneu Manetualain-na, imam-ma muse tunu-hotu: bi'ihiik ndia mina tei-aten, minan-na,

¹⁵ bode'en-na no minan-na, ma aten-na.

¹⁶ Imam malalau-maoonok-ka, muse tunu basa paa sila-la nai mei tunu-hotuk lain. Tutunu-hohotu nana'ak ndia boon-na, nandaa no Manetualain dalen-na. Bana ndia minan-na lala'en-na, soaneu Manetualain.

¹⁷ Hataholi Israel-la, ta bole la'a minak do daak makandondook fa. Nakanenetek ndia, nanapakek losa dodoon-na, de hataholi Israel-la muse tungan, leomae ana leo su'di nai bee boe.