IMAMAT 27 - Susula Malalaok Hehelu Palak Ma Hehelu Beuk

Nakanenetek la'eneu tunu-hotuk soaneu Manetualain

¹ Manetualain fe Musa

² nakanenetek ia-la, soaneu leoina Israel-la. Metema, hataholi esa, nanatunu-hotuk soaneu Manetualain, fo soi-na nasar hehelik esa soona, bole soi-na hataholi ndia nenik doik,

^3-7 tunga belik fo paken nai Manetualain Lalaa Teman-na, fo nde: — teuk neehulu leo lain neu: touk: doi fulak sanahulu lima inak: doi fulak sanahulu — teuk duahulu losa neehulu: touk: doi fulak limahulu inak: doi fulak teluhulu — teuk lima losa duahulu: touk: doi fulak duahulu inak: doi fulak sanahulu — teuk lima leo dae neu: touk: doi fulak lima inak: doi fulak telu

⁸ Metema, hataholi manafe nasar-ra, ta hapu hata esa boen, soaneu bae belik nananaketuk-ka fa soona, muse noo hataholi fo nanatunu-hotu basak soaneu Manetualain ndia, leo imam-ma neu. Imam-ma, muse naketu belin-na nai dae seluk, fo nandaa no hataholi ndia bebe'in-na.

^9-10 Metema, nasar ndia la'eneu bana ta nalulik fa, de bisa sipon da'di leo tunu-hotuk soaneu Manetualain soona, hataholi manafe nasar ndia, ta bole tukan nenik bana fe'ek fa, nana basa hata lala'en fo nanatunu-hotuk soaneu Manetualain-na, ana da'di Manetualain nuun. Metema, ana da'di tukan boe, soona bana ka duak sila-la, da'di Manetualain nuun.

¹¹ Tehu, metema nasar ndia la'eneu bana nalulik, fo ta sipon da'di leo tunu-hotuk soaneu Manetualain fa soona, hataholi manafe nasar-ra, muse neni bana ndia leo imam-ma neu.

¹² Imam-ma, neukose naketu beli-na tunga bana ndia aon-na. Ma belik fo nananaketu basak-ka nde been-na belik fo ta naloe-nasa'en so'on.

¹³ Metema hataholi ndia, ana nau soi falik banan-na soona, muse ana bae belin-na ma ana popo-taman no baba'ek duahulu neme bana ndia belin-na mai.

¹⁴ Metema hataholi esa, ana tunu-hotu uman-na soaneu Manetualain soona, imam-ma muse naketu belin-na, tunga uma ndia lole-napun. Belik fo nananaketu basak-ka nde been-na, belik fo ta naloe-nasa'en so'ok.

¹⁵ Metema hataholi ndia, ana nau soi falik uman-na soona, muse ana bae belin-na, ma ana popo-taman nenik baba'ek duahulu neme uma ndia belin-na mai.

¹⁶ Metema hataholi esa, ana tunu-hotu daen-na seli soaneu Manetualain soona, muse naketu belin-na, tunga dae ndia bini-nggen baba'un-na, soaneu sele-nggali neu dae ndia. Soaneu gandum kilo duahulu soona, belin-na doi fulak sanahulu.

¹⁷ Metema dae ndia nanatunu-hotuk neme Teuk Fe Falik-ka mai soona, muse bae la'iesak belin-na.

¹⁸ Metema dae ndia nanatunu-hotuk, nai lelek basa Teuk Fe Falik-ka soona, imam-ma muse tai-dodoo belin-na, tunga bei ela teuk-kala dede'un-na, losa Teuk Fe Falik manamaik-ka, fo naketu belin-na nai dae.

¹⁹ Metema, hataholi manatunu-hotu dae tina ndia, nahiik soi falik-kana soona, muse ana bae belin-na, ma ana popo-taman no baba'ek duahulu, neme dae tina ndia belin-na mai.

²⁰ Metema nase'o dae tina ndia te ana beita soi falik nakahuluk-kana neme Manetualain mai fa soona, ta nanuu haak soaneu soi falik tina-na so'on.

²¹ Nai Teuk Fe Falik manamaik-ka dalek, tina ndia da'di Manetualain nuun losa dodoon-na, fo Ana fen leo basa imam-mala neu.

²² Metema hataholi esa asan-na tina esa so, boema ana tunu-hotu fen neu Manetualain,

²³ soona imam-ma muse tai-dodoo belin-na tunga bei ela teuk de'ubee fo besak-ka losa Teuk Fe Falik manamaik-ka. Soona hataholi ndia muse bae belin-na nai faik ndia dalen-na boe. Doik ndia da'di Manetualain nuun.

²⁴ Nai Teuk Fe Falik-ka dalek, muse fe falik tina ndia leo tina lamatuan-na do leo tititi-nonosin neu.

²⁵ Basa belik lala'en-na, muse nananaketuk tunga belik fo nanapakek nai Manetualain Lalaa Teman-na.

²⁶ Bana-manu ana makasososan-na nde been-na, Manetualain nuun, da'di ta bole fen no dale hihii-nanau mesan-na, tunu-hotu bana ndia soaneu tutunu-hohotuk fa. Sapiana, bi'ilopoana do bi'ihiiana fo nanabongi makasososak-kala nde been-na, Manetualain nuun.

²⁷ Tehu, bole soi bana nalulik-ka ana makasososan-na tunga belik fo nanapakek nai Manetualain Lalaa Teman-na, ma popo-taman no baba'ek dahulu neme bana ndia belin-na mai. Metema ta soi fan soona, bole nase'o bana ndia leo hataholi fe'ek neu, tunga belik fo nanapakek nai Manetualain Lalaa Teman-na.

²⁸ Ta hapu hataholi esa boen, hapu nase'o do soi falik hata fo ana fe basan da'di leo fe-fe hehelik, soaneu Manetualain so, nau hata ndia hataholi, bana-manu do dae boe. Sila-la da'di Manetualain nuun losa dodoon-na.

²⁹ Nakalenak, hataholi fo nanafe hehelik neu Manetualain soaneu tao namopo-namaten soona, ta bole soi falik-kana fa; muse taonisan.

³⁰ Baba'ek esa neme baba'ek sanahulu, neme basa dae buna-boan lala'en-na mai, nau gandum do ai boak boe, nde been-na soaneu Manetualain.

³¹ Metema hataholi esa, ana nau soi falik buna-boak sila-la seli soona, muse ana bae belin fo nananaketu basak-ka, ma popo-taman no baba'ek duahulu, neme buna-boak sila belin-na mai.

³² Bana esa neme bana sanahulu mai nde been-na, Manetualain nuun. Metema leke bana-manu sila-la soona, bana ka sanahuluk-ka, ana da'di Manetualain nuun.

³³ Bana-manu sila-la lamatuan-na, ta bole hele beek-ka nde malole, do beek-ka nde ta malole fa. Boeo, ana ta bole tuka fan. Metema, ana da'di tukan soona, bana ka duak sila-la, da'di Manetualain nuun, de ta bole soi falik-kasa fa.

³⁴ Paleta sila-la nde Manetualain fen neu Musa, neme Letek Sinai lain, soaneu leoina Israel-la.