IMAMAT 26 - Susula Malalaok Hehelu Palak Ma Hehelu Beuk

Baba'e-papalak ba'eneu hataholi manatunga paleta

¹ Manetualain nafa'da nae, “Boso tao sosongo-tatangok do mapadedeik dodoki-dudulak, do dii batu nanadoki-dulak fo sene-do'ok neun. Au nde emi Manetualaim-ma.

² Tao feta fai Sabat-tala, ma agama fai-fai malole fe'en-nala, ma fe ha'da-holomata neu mamanak fo nanahele hehelik soaneu sene-do'ok neu Au. Au nde Manetualain.

³ Metema emi maso'da tunga Au nakaneneteng-ngala, ma tunga Au paletang-ngala

⁴ soona, neukose Au akona u'dan-na mai, nandaa no fain-na, nalosa dae fe buna-boan ma ai-la laboa.

⁵ Neukose emi dae-ma buna-boan sasi kao-kao, nalosa, metema losa fai ketu-seu angol-la boan-nala, te emi bei ke'di gandum. Ma metema, fain-na losa soaneu sele gandum-ma, te emi bei seu angol-la boan-nala. Neukose emi hapu nana'ak dai, ma emi maso'da no tetu-temak nai emi nusam-ma.

⁶ Neukose, Au fe emi so'da-molek nai emi nusam ndia dalek, nalosa emi bisa sungu no nee-nee lino-linok, ma emi ta bii-mamata'u neu su'di see boen. Neukose Au tao amopo-amate bana makaa-makisuk-kala neme nusak ndia dalek mai, ma neukose ta hapu natee-natatik nai emi nusam-ma so'on.

⁷ Neukose, emi bisa sengi emi musu-mala;

⁸ Ka'da no hataholi lima mesak-kana, emi bisa sengi hataholi natun esa, ma ka'da no hataholi natun esa, emi bisa sengi hataholi lifun sanahulu.

⁹ Neukose, Au ba'e-pala emi, ma Au fe emi upu-anak makadotok. Hata fo Au helu basan neu emi, tao leo bee o, Au tao atetun.

¹⁰ Emi dae-ma buna-boan, neukose ana sasi kao-kao, nalosa nana'ak-ka dai, soaneu teuk esa dalen-na. Nakalenak, nau do ta nau fa-o, emi muse kalua heni buna-boak nanaketu-kolu palaak-kala, fo ela hapu mamanak soaneu emi pe'da-fua buna-boak nanaketu-kolu beuk-kala.

¹¹ Neukose, Au leo nai emi tala'da, fo nai Au Lalaa Temang dale, ma neukose Au ta tipa emi fa.

¹² Neukose, Au sama-sama o emi; neukose Au da'di emi Manetualaim, ma emi da'di Au anang.

¹³ Au, emi Manetualain, fo no emi kalua meme Masir mai, fo ela emi boso boe da'di ata bai. Au tao akalulutuk koasa manatuni-ndeni emi-a so, de Au tao emi da'di hataholi ao loak.”

Huhuku-dodokik soaneu hataholi manatunga taak-kala

¹⁴ Manetualain nafa'da nae, “Metema emi ta mamanene Au, ma ta tao tunga Au paletang-nga fa,

¹⁵ metema emi la'olena hehelu-balataak fo Au taon no emi, ma ta nau tunga Au nakeketung, ma Au nakaneneteng-ngala fa soona,

¹⁶ neukose, Au huku emi. Neukose, Au fe soe-a la'e emi, he'di-laus ma sumaik manalea-hai taak-ka, nalosa poke emi matam-ma, ma emi maso'da doi-doso. Neukose, emi foi-fala, tehu emi ta mi'a buna-boan fa, nana emi musum-mala mai, fo ala ho'i leni la'iesak, emi sele-nggalik-kala, buna-boan.

¹⁷ Neukose, Au huku emi, nalosa emi musu-mala sengi emi, ma hataholi fo ta lahiik loo emi fa, ana koasa emi. Neukose, emi bii-mamata'u manseli, nalosa leomae hataholi ta usi emi fa te, emi malai.

¹⁸ Metema, emi la'ola'di basa huhukuk sila-la, te emi beita nau tunga Au boen soona, neukose Au popo-tama seluk emi huhuku-ma la'i hitu.

¹⁹ Emi koao-ndaeao manseli, tehu neukose, Au akadadaek emi. Neukose, u'dan-na ta mai fa, nalosa emi dae-ma namatuu ma natea sama leo besi-a.

²⁰ Emi sosota-mamangum lala'en-na, manada'di tak, nana emi dae-ma, neukose ta fe buna-boak, ma emi bubu'u-palusam, neukose ta labuna-laboa fa.

²¹ Metema, emi bei lena-la'ban mahele Au boe, ma ta nau tunga Au fa, soona neukose, Au popo-tama seluk emi huhukum-ma la'i hitu.

²² Neukose, Au fe bana makaa-makisuk-kala leu leo emi tala'da heom leu. Neukose, bana sila-la kaa-la emi anam-mala, taolisa emi bana-manum, ma la'aheni emi, nalosa ela ka'da emi lumanak nanseli, ma enok manai emi nusam dale-la, da'di nee-nee lino-linok.

²³ Metema, emi la'o la'di basa huhukuk sila-la, te emi beita mamanene Au boen, tehu emi bei lena-la'ban Au,

²⁴ soona neukose, Au anoli emi, ma Au huku emi la'i hitu, fo belan-na lena huhuku makahuluk-kala.

²⁵ Neukose, Au akadada'dik natee-natatik-ka nai emi tala'da heom, fo soaneu huku emi, nanahu, emi la'olena Au hehelu-balataang no emi-a so. Ma metema, emi makabubua nai emi kotam dale, fo sanga nasulu-nahapak soona, neukose Au fe he'di-laus manalea-hai taak-ka mai, nalosa no nakasetik, emi makatele neu emi musum-ma.

²⁶ Neukose, emi nana'am-ma basan, nalosa inak sanahulu, ala paluu ka'da mamana tutunu loti esa, soaneu tunu sila lotin-na. Neukose, emi mi'a basa nana'ak ndia so, tehu emi bei mame'da mamala'a boe.

²⁷ Metema, emi la'ola'di basa huhukuk sila-la, te emi bei lena-la'ban mahele Au boe, fo ta nau tunga neu Au fa,

²⁸ soona neukose Au anoli emi no nasak, ma Au huku emi la'i hitu, fo belan-na lena neme huhukuk makahuluk-kala mai.

²⁹ Neukose, emi mamala'a-mamandoe, nalosa emi mi'a seluk emi anam-mala.

³⁰ Neukose, Au tao akalulutuk emi mamana sosongo-tatangom-mala nai pupukuk-kala lain, ma Au tao akalulutuk emi mei tunu-hotum, fo mamanak tunu boomenik-ka, boema Au tapa emi popolam-ma leo emi sosongo-tatangom fo nakalulutuk basak sila-la lain neu. No maluak,

³¹ Au tao akalulutuk emi kotam-mala, fo da'di ai-batu madodouk, Au tao akalulutuk emi mamana sosongo-tatangom, ma Au ta sipok emi tutunu-hohotum-mala fa.

³² Neukose, Au tao amopo-amate emi nusam-ma, nalosa musu-musu fo langatuu-la emi nusam-ma, ala nggenge, nai lelek fo lita nakalulutuk ndia, ba'un-na seli.

³³ Neukose, Au fe natee-natatik-ka, da'di nai emi nusam-ma, fo ana tao tapasasala emi, nai nusa dea-la. Neukose, emi tinam-mala, ma emi kotam-mala nanapo'ilotak, fo ala da'di ai-batu madodouk.

^34-35 Nai lelek ndia, fo nde nai lelek emi bei nai mamana tu'u-tapak, nai emi musu-mala nusan-na, emi daem fo emi ta fen hahaeaon nai lelek emi bei leo-nana, neukose nanapo'ilotak, fo ana hapu loak hahaeaon-na.

³⁶ Emi hataholim manai mamana okak nusa fe'ek-kala, neukose Au tao-alas ala bii-lamata'u lanseli, nalosa anin-na fuu akidook-ka fo nangguu boeo, ala bii fo lalai. Neukose emi malai, nono'kabai ala usi emi nai natee-natatik dale, boema emi tu'u-fo'a, leomae ta hapu musu deka no emi fa.

³⁷ Neukose emi malai, fo esa nakatunu seluk esa ein-na, leomae ta hapu hataholi usi emi fa. Ma neukose, emi ta la'ban mabe'i emi musum-mala fa.

³⁸ Neukose, emi mate nai mamana okak dale, ma nusa-nusak manamusu loo emi-a, ala tao lamopo-lamate emi.

³⁹ Bei ela emi hataholi maso'dam lumanak nai emi musum-ma nusan-na, neukose ala doi-doso, nanahu emi sala-singom, ma emi bei-ba'i kaim-mala sala-singon.

⁴⁰ Tehu emi tititi-nonosim, neukose manaku sila sala-singon, ma sila bei-ba'i kain fo manalena-la'ban Au, ma lalena langa neu Au paletang-nga, sala-singon-nala,

⁴¹ nalosa Au ho'i nakeketuk, soaneu la'ban-nasa, ma Au usi henis leo mamana okak dale, nai sila musun-nala nusan. Mate'en-na, metema emi tititi-nonosim tunga, boema nanahuku basak hu kande sila sala-singon, ma malena langan-nala soona,

⁴² neukose Au afandele Au hehelu-balataang no Yakob, Isak ma Abraham. Neukose, Au tao abebeu Au hehelu-balataang, fo Au fe dae ndia neu Au leoinang-nga.

⁴³ Tehu, muse usi heni nakahuluk laun manai dae ndia dalek-ka, fo dae ndia louk, fo ela te'e-te'e, dae ndia hapu hahaeaon. Ma Au anang-ngala, muse lakalala'ok basa huhukuk fo Au aketun soaneus, nanahu ala ta nau tunga Au nakaneneteng, ma Au paletang-ngala fa.

⁴⁴ Tehu, leomae sila bei lai musu nusan-na boeo, neukose Au ta la'oela fas, do Au tao amopo-amates makandondook fa. Nana metema Au tao amopo-amates soona, ndia sosoa-ndandaan nae Au tao ketu Au hehelu-balatang no sila, te se'kona Au ia Manetualain, fo sila Manetualain-na.

⁴⁵ Neukose, Au tao abebeu hehelu-balataak fo Au taon no sila bei-ba'i kain-nala, nai lelek Au atu'du Au koasang-nga neu basa leoina lala'en-na, nenik Au o Au anang-ngala kalua leme Masir mai, fo ela Au fo Manetualain, dadi sila Manetualain.”

⁴⁶ Hoholo-lalanek ma paleta sila-la nde Manetualain fen neu Musa neme Letek Sinai lain, soaneu leoina Israel-la.