IMAMAT 25 - Susula Malalaok Hehelu Palak Ma Hehelu Beuk

Teu ka hitu

¹ Manetualain kokolak no Musa nai Lete Sinai lain, de nadenun fo

² nanduku-nalosak nakanenetek ia-la neu leoina Israel-la. Metema, emi masok leo nusak fo neukose Manetualain fen neu emi soona, emi muse fe ha'da-holomata neu Manetualain, nenik enok-ka nde ia: Nai teu ka hitun-na, emi ta bole foi-fala dae, fo sele-tani fa.

³ Nai teuk nee dalen-na, emi muse sele emi tinam-mala, ke'di emi osi angom-mala, ma pe'da-fua emi dae-oem buna-boan.

⁴ Tehu neu teu ka hitun-na, nanafe hehelik soaneu Manetualain. Da'di, nai teuk ndia dalen-na, muse po'ilotak dae-a, fo ta bole foi-fala fan. Boso sele tina-la, ma boso ke'di emi ai angom-mala.

⁵ Nakalenak, gandum manamoliaok-kala, do emi angom-mala boan nanaseu taak-kala, emi ta bole seus fo pe'da-fuan, nana teuk ndia nde been-na, teuk hahaeaok ba'eneu dae-a

⁶ Leomae leondiak boe, neukose dae ndia fe isi-minan boe, fo ana da'di nana'ak ba'eneu emi, emi atam-mala, emi hataholi mana'a ngga'dim-mala, ma hataholi nusa dea manaleo loo emi-a.

⁷ Boeo ba'eneu emi makaboboi bana-manu-la, ma bana fuik manai emi nusam-ma. Basa hata lala'en fo dae-a fen ndia, bole mi'an.

Teuk fo fe falik

⁸ Leke teuk hitu la'i hitu soona, dede'un-na teuk 49.

⁹ Boema nai hataholi Yahudi-la bula ka hitun-na, fain sanahulu, fo nde faik fo sala-singok hapu ampon-na soona, madenu hataholi puu puuk-ka nai basa mamanak lala'en-na, nai nusak dale.

¹⁰ Emi muse hele hehelik teu ka limahuluk ndia, fo po'a-benga fai soi-po'ik-ka neu basa laun manai nusak-ka lala'en-na. Nai teuk ndia dalen-na, basa hata-heto nananase'o basak-kala, muse fe falik-kasa leo manonuuk-ka, do leo tititi-nonosin neu. See nananase'ok da'di leo ata soona, muse fe falik-kana leo teidale-bobongin neu.

¹¹ Boso sele-nggali emi tinam-ma. Gandum manamoliaok, do angol nanake'di taak manai emi osim dale-a, ta bole ketu-seun fo pe'da fas.

¹² Teuk ndia nalupa teu malalao-malalafuk ba'eneu emi. Emi bole mi'a ka'da hata fo ana moliaon nai emi tinam dale.

¹³ Nai teuk ndia dalen-na, basa dae fo nananase'o basak-kala, muse fe falik-kana leo manonuuk-ka neu.

¹⁴ Da'di, metema emi mase'o dae leo emi nonoo hataholim, fo hataholi Israel, do asa dae neme emi nonoom ndia mai soona, boso mase'o-banasa no eno puta-paik.

¹⁵ Dae ndia belin-na muse nananaketuk tunga teu-ka dede'un-na, nai lelek dae ndia fe buna-boak losa Teuk Fe Falik manamaik-ka.

¹⁶ Metema, leke teun-na te ba'uk-ka soona, dae ndia belin-na seli. Tehu metema, leke teun-na te ta ba'uk-ka fa soona, belin-na muse nai dae, nanahu nase'ok-ka nde ketu-kolu dae ndia la'i de'u bee.

¹⁷ Boso tipu-dai emi nonoom hataholi Israe la, tehu ela leo been-na, emi bii-mamata'u neu Amak, fo emi Manetualaim-ma.

Teu ka hitu

¹⁸ Tunga basa Manetualain hoholo-lalanen ma paletan-nala, fo ela emi maso'da no nee-nee lino-linok nai nusak ndia.

¹⁹ Nusak ndia daen-na, neukose ana fe buna-boan, nalosa emi hapu nana'ak dai, fo emi leo nai naa no tetu-temak.

²⁰ Tehu, fafa'kama hapu nggelok latane lae, neukose na'a beek nai teu ka hituk-ka dalek, nai lelek ana ta sele-nggali daen-na, fo ana ketu-kolu buna-boan fa.

²¹ Nai teu ka neen-na dalek, neukose Manetualain ba'e-pala dae-a, nalosa buna-boan dai soaneu teuk telu.

²² Ma nai lelek, emi sele-nggali emi tinam-ma, nai teu ka falun-na, te bei hapu keketu-kokolu teu ka neek-ka buna-boan soaneu emi mi'a. Nakalenak, emi nana'a nanape'dam-mala neukose bei dai, losa faik fo emi ketu-kolu buna-boak nai teuk ndia.

Fe falik dae ma uma

²³ Boso mase'o misa emi daem-ma, nana dae ndia emi nuum ta ndia fa, te Manetualain nuun. Emi ka'da sama leo hataholi manamai, fo Manetualain fe emi loak, soaneu mi'a-pake dae ndia buna-boan.

²⁴ Metema dae duduik esa nananase'ok soona, muse fe dae lamatuak soi falik-kana.

²⁵ Metema, hataholi Israel esa tu'da leo nuu-taa hata-taak-ka dalek neu, nalosa nau do ta nau fa, muse nase'o dae-na soona, tolanoo ka'a-fa'di matadalen-nala, muse soi falik dae ndia.

²⁶ Metema, ta hapu hataholi soi falik-kana fa, tehu neu fai makabuin boema, dae lamatuak hapu doik, de ana soi falik dae-na,

²⁷ soona muse ana bae hataholi manaasa basa dae-na, belin-na de'u dae ndia buna-boan, nai teu-teu manamaik-ka dalek, losa Teuk Fe Falik manamaik-ka. No enok ndia, ana hapu falik ndia dae-na.

²⁸ Tehu metema tali-doin ta, de ana ta soi falik dae-na fa soona, hataholi manaasak-ka, ana koasa nahele dae ndia losa Teuk Fe Falik manamaik-ka. Nai teuk ndia dalen-na, muse fe falik dae ndia leo dae lamatuak neu.

²⁹ Metema, hataholi esa nase'o uma esa nai kota, fo nanadama okofefeok nenik papala nanadamak, soona nanuu hak soi falik uman-na nai teuk esa dalen-na, leken neme faik fo nase'on-nana.

³⁰ Tehu, metema nai teuk esa dalen-na, ana ta soi falik uma ndia fa soona, mopo ndia haak soaneu soi falik-kana. Hataholi manaasa-ka no tititi-nonosin lanuu lahele uma ndia. Ta fe falik uma ndia, nai Teuk Fe Falik-ka dalek fa.

³¹ Soaneu uma manai nggolok fo ta nanadama okofefeok nenik papala nanadamak fa soona, pake nakanenetek fo sama, sama leo nakanenetek soaneu dae-a, fo nde: uma lamatuak makasososak-ka, nanuu haak soi falik-kana, de muse fe falik uma ndia, nai Teuk Fe Falik-ka dalek.

³² Tehu hataholi Lewi-la lanuu hak, su'di faihi'da ala soi falik sila hata-heton manai kota-kota fo nananaketu basak, soaneu sila.

³³ Metema hataholi Lewi esa, nase'o uman-na nai kota esa dalek, de ana ta soi falik-kana fa soona, muse fe falik uma ndia nai Teuk Fe Falik-ka dalek. Nana hataholi Lewi-la uman manai sila kota-nala dalek nde been-na, sila nuun nahele nai leoina Israel-la dalek.

³⁴ Tehu, ta bole nase'o mook fo mana'uk manai leo Lewi-a kota-kota-nala boboa-kaisun fa. Mook sila-la nde been-na, hataholi Lewi-la nuun losa dodoon-na.

Fe hataholi nuu-taa hata-taak-kala tona-asa

³⁵ Metema emi leoinam esa, ana leo nai emi tala'da, boema ana tu'da leo nuu-taa hata-taak-ka dalek neu, de ana tu'da-to'a nanseli, soona emi muse tulu-falin, sama leo hataholi nusa dea, do hataholi manamai, fo ela ana hapu naso'da nahele nai emi tala'da.

^36-37 Boso makasetin fo ana tona beek neme emi mai soona, ana fe falik-kana no bunak, tehu ela leo been-na, emi bii-mamata'u neu Manetualain, de nemen-na fo hataholi ndia leo nai emi tala'da. Boeo, boso sanga nanalak neme nana'ak fo emi mase'o fen-na.

³⁸ Emi Manetualaim-ma fo no emi kalua meme Masir mai, soaneu Ana fe nusa Kanaan-na neu emi, fo ela Ana da'di emi Manetualaim-ma, paletan-na nde ndia.

Po'i ata nanaasanak-ka

³⁹ Metema, emi leoinam-ma hataholin esa, ana leo nai emi tala'da, boema ana tu'da leo nuu-taa hata-taak-ka dalek neu, nalosa nase'o aoinan-na neu emi da'di leo ata soona, ta bole madenu hataholi ndia tao tatao-nono'ik sama leo ata fa.

⁴⁰ Muse ana leo no emi, sama leo hataholi mana'a ngga'di esa, fo naue-nale'di fe emi, losa Teuk Fe Falik-ka.

⁴¹ Nai lelek ndia, hataholi ndia no anan-nala bole kalua leme emi umam-ma mai, fo ala fali leo teidale-bobongin neu, fo ala fali le'us leo bei-ba'i kain dae-oen neu.

⁴² Hataholi Israel-la nde been-na Manetualain atan-nala; Ndia nde nos kalua leme Masir mai, hu ndia de ta bole mase'os da'di leo ata fa.

⁴³ Da'di, hataholi Israel fo nase'o aoinan-na neu emi-a, emi ta bole tao balakaik neu fan. Ela leo been-na, emi bii-mamata'u neu emi Manetualaim-ma.

⁴⁴ Metema, emi paluu ata soona, emi bole asa neme leoina manaleo nai emi titia-tataim-mala.

⁴⁵ Emi boeo, bole asa ni'iana neme hataholi manamai, fo ana leo nahele nai emi tala'da. Ni'iana fo hataholi manamai-a bongin nai emi nusam-ma, bole da'di emi nuum,

⁴⁶ ma emi boeo, bole fe emi anam-mala, da'di sila atan losa mate. Tehu emi ta bole tao balakaik neu emi nonoom fo hataholi Israel-la fa.

⁴⁷ Metema, hataholi manamai esa, ana leo nai emi tala'da, boema ana da'di hataholi kamasu'i-makabetek, ma emi nonoom fo hataholi Israel-la, ana tu'da leo nuu-taa hata-taak-ka dalek neu, nalosa nase'o aoinan-na da'di leo ata neu hataholi manamai ndia, do neu teidale-bobongin soona,

⁴⁸ hataholi Israel ndia, nanuu haak nahele, soaneu soi-tefan. Hataholi esa neme tolanoo toun-na mai,

⁴⁹ do to'on, do tolanoo daen, do hataholi fe'ek esa, neme tia-lai manadeka noon-na, bole soi nalan. Do metema, neu fai makabuin nabe'i soi-nan soona, bole ana soi-na aoinan-na mesak-kana.

⁵⁰ Ata ndia muse nakokolaok no hataholi manaasa nan-na. Muse ala leken neme mulai lase'on da'di ata, teuk de'ubee, losa Teuk Fe Falik manamaik-ka, soona laketu sosoin-na belin-na. Belik ndia, muse nananaketuk tunga ngga'di fo ana fen neu hataholi mana'a ngga'di-a.

^51-52 Ata ndia, muse ana fe falik ndia belin-na, de'u hataholi mana'a ngga'di esa ngga'din-na, nai lelek teuk fo ana da'di ata, beita dai fa, de

⁵³ nono'kabai naue-nale'di sama leo hataholi mana'a ngga'di, fo basa teuk-ka besak-ka bae ngga'din-na. Ata ndia tuan-na, ta bole taon no balakaik fa.

⁵⁴ Metema, ta hapu soin nenik enok sila-la esa boen soona, muse po'in no anan-nala nai Teuk Fe Falik manamaik-ka.

⁵⁵ Hataholi Israel esa, ta bole da'di ata losa mate fa, nanahu leoina Israel-la nde been-na, Manetualain atan-nala. Manetualain nde nos kalua leme Masir mai. Ndia nde Amak, fo sila Manetualain-na.