IMAMAT 24 - Susula Malalaok Hehelu Palak Ma Hehelu Beuk

Pe'da-fua banuk-ka leo beek

¹ Manetualain nadenu Musa

² fo ana fe nakanenetek ia-la neu leoina Israel-la nae: Ho'i meni mina setun isik neulauk soaneu banuk manai Manetualain Lalaa Teman dale, fo ela de'den soona, ana pila nakandoo.

³ Harun muse ito-ato banuk sila-la, neme le'donoso losa fafaik, nai mamanak fo Manetualain nai ndia, nai tema lelesu fo manapoti ketu Peti Hehelu-balataak-ka, nai Kama Malalao-malalafuk nanseli-a deak. Muse tao tunga paleta ndia, losa dodoon-na.

⁴ Harun muse ito-ato banu-banuk manai banu eik lilopilas isik-ka, fo daenga ala pila lahele nai Manetualain Lalaa Teman dale.

Loti nana'ak

⁵ Ho'i-ma ha'desopu neulauk kilo sanahulu dua, fo taom-ma loti bobongok sanahulu dua, loti esan-na na'a ha'desopuk kilo esa.

⁶ Pe'da loti sila-la nai ta'dak dua dalek, ta'dak esan-na, loti nee, fo nai mei nakadidita lilopilas isik-ka nai Manetualain Lalaa Teman dale.

⁷ Tao boomeni isik neu loti tata'dak-kala esa-esak lain, fo ana da'di ta'du-tana, nae loti ndia nde been-na, tutunu-hohotu nana'ak ba'eneu Manetualain.

⁸ Tunga-tunga fai Sabat-ta, muse hapu loti nanasadiak nai Manetualain Lalaa Teman dale. Fo leoina Israel-la bela-ba'un nde ndia, losa dodoon-na.

⁹ Loti ndia nde been-na, soaneu Harun no tititi-nonosin. Ala muse la'an nai mamanak malalao-malalafuk, nanahu loti ndia nalupa loti malalao-malalafuk nanseli, neme tutunu-hohotu nana'ak fo nanatunu-hotuk neu Manetualain, fo soaneu imam-mala.

Huhukuk ba'eneu hataholi manasoo-supa Manetualain-na, ma huhukuk-ka babalan-na.

^10-11 Hapu touk esa nai hataholi Israel-la mamana ofun-na. Aman hataholi Masir, ma inan hataholi Israel, na'de Selomit, fo Dibri neme leo Dan-na anan ndia. Nai faik esa boema, hataholi ndia nale'a no hataholi Israel esa, nai mamana ofuk-ka. Hu ndia de, hataholi Israel-la loon neu nataa Musa,

¹² de ala ta po'i fan, fo lahani nakeketuk neme Manetualain mai, la'eneu hata fo sila muse taon soaneu hataholi ndia.

¹³ Boema, Manetualain nafa'da Musa nae,

¹⁴ “Moo hataholi ndia leo mamana ofuk-ka deak neu. Basa hataholi fo lamanenen ana soo-supa, muse ala lalaa liman-nala neu hataholi ndia langan lain, fo ala sakasii, lae hataholi ndia nasala. Soona basa hataholi-la tapan nenik batu, losa maten.

¹⁵ Basa ndia soona, po'a-benga dede'ak-ka nde ia neu leoina Israel-la mae, Ba'eneu see, fo ana soo-supa Manetualain soona, muse ana lu'a-lepa tatao-nono'in buna-boan,

¹⁶ ma hukunisan. Su'di see, fo ana soo-supa Manetualain soona, basa salanik-kala lala'en-na tapan nenik batu losa maten. Hoholo-lalanek ndia nanapakek soaneu hataholi Israel-la, ma hataholi nusa dea manaleo lahele nai Israel-la boe.

¹⁷ Ba'eneu see, fo ana taonisa hataholi fe'ek soona, muse hukunisan.

¹⁸ Ba'eneu see, fo ana taonisa hataholi fe'ek bana-manun soona, muse ana nggatin. Dede'ak-ka nahuu nae, ‘samanek nggati samanek’.

¹⁹ Metema hataholi esa, ana tao-na hataholi fe'ek nakahina, soona hataholi ndia tataon-na leo beek soona, muse tao seluk-kana leondiak neu hataholi ndia boe.

²⁰ Metema, ana tao nala'di duik, soona muse tao nala'di duin-na boe. Metema, ana tao napoke hataholi fe'ek matan seli, soona muse tao napoke ndia matan seli boe. Metema, ana fepa hataholi fe'ek losa la'di heni nisin-na, soona muse fepa la'di nisin-na boe. Ana tao su'di beek-ka, nalosa nalutu nakandoo hataholi fe'ek aopaan-na soona, muse tao nasafalin leondiak neu hataholi ndia, fo da'di neu babalan-na.

²¹ Ba'eneu see, fo ana taonisa bana soona, muse ana nggatin, tehu ba'eneu see, fo ana taonisa hataholi soona, muse hukunisan.

²² Pake hoholo-lalanek ndia soaneu emi basa-basam-mala, ma soaneu hataholi nusa dea manaleo lahele nai emi tala'da boe, nanahu, Au nde emi Amam Manetualaim-ma.”

²³ Musa nanduku-nalosak basa dede'a-kokolak sila-la neu leoina Israel-la, boema loo hataholi fo ana soo-supa basa Manetualain ndia, leo mamana oofuk-ka deak neu, de ala tapan nenik batu losa maten. No enok ndia, leoina Israel-la tao hata fo Manetualain paleta basan neu Musa so.