IMAMAT 22 - Susula Malalaok Hehelu Palak Ma Hehelu Beuk

Tunu-hotuk malalao-malalafun

¹ Manetualain nadenu Musa

² nanduku-nalosak paleta ia-la neu Harun no anan-nala nae, “Hata fo leoina Israel-la tunu-hotu hehelik-kana soaneu Au, taon no matetu-mandaak, fo ela emi boso tao manggenggeo Au na'de malalao-malalafung-nga. Au nde Manetualain.

³ Metema hataholi esa neme o tititi-nonosim nai manggenggeok-ka dalek, boema ana deka no tunu-hotu malalao-malalafuk fo leoina Israel-la hele hehelin ba'eneu Au soona, ana ta bole nalalau-naoono nai mei tunu-hotuk-ka so'on. Nakanenetek ia, nanapakek losa dodoon-na. Au nde Manetualain.

⁴ Harun tititi-nonosin esa hapu he'di lou mangalauk, do he'dis-sa nai mamaen-na de ana moe nanak soona, kena-ka'in fo boso na'a tunu-hotu malalao-malalafuk-ka, metema beita nananafa'dak, ana lea-hai fa. Imam esa, ana da'di nanggenggeo, metema ana koila'e hata esa manggenggeok, hu kande hata ndia la'e mamates-sa so. Ndia da'di nanggenggeo boe, metema bini-nggen ana kalua,

⁵ do ana koila'e bana do hataholi manggenggeok.

⁶ No enok mata beek ndia boe, imam esa da'di nanggenggeo soona, manggenggeok nahele losa le'do tenak. Ma le'do tenak basa so, tehu metema ana beita nadiu oe fa soona, ana beita bole na'a nana'ak fo nanatunu-hotuk soaneu Manetualain fa.

⁷ Le'do tenak sona, besaka ana lea-hai, de basa ndia soona, ana bole na'a neme tunu-hotu malalao-malalafuk ndia mai, nanahu nana'ak ndia nde da'di ndia nana'an-na.

⁸ Imam ndia nanakena-ka'ik soaneu na'a bana manamate aok paan-na, do bana fo bana makaak-kala kaa lisan, paan-na. Metema na'an soona, nanggenggeo. Au nde Manetualain.

⁹ Basa imam-mala muse tunga Au fe nakanenetek-kala. Metema ta soona, lasala de neukose mates, nanahu ala la'olena nakanenetek malalao-malalafuk sila-la. Au nde Manetualain, ma Au nde hele hehelik sila soaneu Au.

¹⁰ Tunu-hotuk fo nanahele hehelik ba'eneu Au-a, ka'da imam sila-la teidale-bobongin mesak-kasa, nde bole la'an; hataholi fe'ek ta bole fa, leomae hataholi ndia leo no imam-ma nai uma esa dalek, do imam-ma hataholi mana'a ngga'din-na boe.

¹¹ Tehu imam-mala asala ata sila-la nenik sila doi mesan, do bongis nai imam-ma uman dale soona, bole la'a nana'ak fo imam-mala baba'en ndia.

¹² Imam-ma anafe'on esa sao touk esa, imam ta ndia fa soona, ta bole na'a tunu-hotuk ndia fa.

¹³ Tehu imam-ma anafe'on-na inafalu so, do ela henin so te anan ta, boema ana fali ne'un leo aman uman neu, de aman mete-nakanaen soona, bole na'a aman nana'a baba'en-na. Ka'da imam-ma teidale-bobongin mesak-kasa nde bole la'a tunu-hotuk ndia.

¹⁴ Metema hataholi esa imam-ma teidale-bobongin ta ndia fa, boema ta name'da fa te na'a nana'ak fo nanatunu-hotuk ba'eneu Manetualain soona, muse ana bae ngganggatin-na leo imam-ma neu, ma ana popo-tama seluk-kana nenik baba'ek 20 neme baba'ek natun esa mai.

¹⁵ Imam-mala ta bole tao langgenggeo tunu-hotuk fo nanafe hehelik soaneu Au,

¹⁶ nenik ala po'ilotak hataholi esa ta nanuu haak soaneu na'a fan. Tataos ndia taon-na hataholi ndia da'di nasala, ma neni huhukuk soaneun. Au nde Manetualain, ma Au nde tao alalao-alalafu tunu-hotuk ndia.”

¹⁷ Manetualain nadenu Musa

^18-19 fe Harun no anan-nala ma leoina Israel-la nakanenetek ia-la. Metema hataholi Israel esa do hataholi nusa dea esa ana leo nahele nai Israel, fe tutunu-hohotu nanatunuk fo ana bae nasar, do ana fe tutunu-hohotuk no dale hihii-nanau mesan-na soona, bana ndia muse bana mane, ma ta lu'u-la'ak fa, fo ela bisa nanasipok.

²⁰ Boso tunu-hotu bana lu'u-la'ak, nana Manetualain ta nau sipo fan.

²¹ Metema hataholi esa tunu-hotu fe Manetualain tutunu-hohotuk mole-dame, fo ana bae nasar do ana fe tutunu-hohotuk no dale hihii-nanau mesan-na soona, bana ndia ta bole lu'u-la'ak fa, fo ela bana ndia bisa nanasipok.

²² Boso tunu-hotu fe Manetualain bana pokek, bana fo la'di duin-na, do bana bisuk, do bana fo mabisunggumak, do bana fo he'dis-sa nai loun-na do kosulouk. Bana leondiak-ka, boso tunu-hotun soaneu tutunu-hohotu nana'ak nai mei tunu-hotuk lain.

²³ Soaneu tutunu-hohotuk fo hataholi fe no dale hihii-nanau mesan-na, emi bole tunu-hotu bana fo ein seli manalu do ein seli keke'uk-ka; tehu soaneu bae nasar soona, bana leondiak-ka ta nanasipok fa.

²⁴ Boso tunu-hotu fe Manetualain bana lasede'e nanakabik, bana nanata'ti nahinak, bisu manakapahe'duoek, do bana nanatu'u-tapa henik. Basa sila-la, ta bole da'di nai emi nusam-ma fa.

²⁵ Bana-manu fo hapun neme hataholi nusa dea mai, ta bole tunu-hotun soaneu tutunu-hohotu nana'ak-ka fa. Bole tafa'da tae bana ndia, bana lu'u-la'ak, de ta nanasipok fa.

^26-27 Sapiana, bi'ilopoana do bi'ihiiana fo besak-ka bongin soona, muse no nehele inan faik hitu dalen-na. Basa ndia soona, besak-ka bana ndia nanasipok soaneu tutunu-hohotu nana'ak.

²⁸ Boso tunu-hotu sapiina, do bi'ilopoina, do bi'ihiiina sama-sama no anan-na, nai faik esa dalen-na.

²⁹ Metema emi tunu-hotu tutunu-hohotu makasi neu Manetualain soona, tunu-hotun tunga nakanenetek-ka, fo ela emi tutunu-hohotum nanasipok.

³⁰ Mi'a tutunu-hohotuk ndia, nai faik ndia boe, ma boso ela faaanak boen soaneu balahaa.

³¹ Manetualain nafa'da nae, “Tunga Au paletang-ngala; Au nde Manetualain.

³² Boso tao manggenggeo Au na'de malalao-malalafung-nga. Basa leoina Israel-la lala'en-na, muse sene-do'ok neu Au, da'di leo Fo Malalao-malalafuk nanseli. Au nde Manetualain, de Au tao-a emi da'di malalao-malalafuk.

³³ Au o emi kalua meme Masir mai, fo daenga Au da'di emi Manetualaim. Au nde Manetualain.”